ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއަށްފަހު ފުލުހުންނާއި ސިފައިން ހިންގި އޮޕަރޭޝަނުގައި ހައްޔަރުކުރި މީހުންގެ ތެރެއިން ތިން މީހަކު ދޫކޮށްލާފައިވަނިކޮށް އޭގެ ތެރެއިން ދެ މީހަކު އަނެއްކާވެސް ހައްޔަރުކޮށްފި އެވެ.
ހަރުކަށި ފިކުރާ ފަތުރައި، ޓެރަރިޒަމްގެ ތުހުމަތުވާ ތިން މީހުން އިއްޔެ ކުރިމިނަލް ކޯޓުގެ ގާޒީ ހަސަން ސައީދު ދޫކޮށްލީ، އެމީހުން އިތުރަށް ބަންދުގައި ބަހައްޓަން ޖެހޭ މިންވަރަށް ހެކި ނެތް ކަމަށް ބުނެފަ އެވެ.
ނަމަވެސް، ދޫކޮށްލި ތިން މީހުންގެ ދެ މީހަކު ކޯޓު އަމުރެއްގެ ދަށުން ރޭގެ ވަގުތެއްގައި ވަނީ ހައްޔަރުކޮށްފަ އެވެ.
ފުލުހުންގެ މީޑިއާ އޮފިޝަލް "އަދަދު"އަށް ވިދާޅުވި ގޮތުގައި، އެ ދެ މީހުން އަލުން ހައްޔަރުކޮށްފައިވަނީ ނަޝީދަށް އަމާޒުކޮށް ދިން ހަމަލާއާ ގުޅުން އޮތް ކަމުގެ ތުހުމަތަށެވެ. އެމީހުންގެ ބަންދާމެދު ގޮތެއް ނިންމުމަށް މިއަދު ކުރިމިނަލް ކޯޓަށް ހާޒިރުކުރާނެ އެވެ.
ފުލުހުން އެދިގެން މި މައްސަލާގެ ބަންދު މަޖިލިސްތައް ކުރިއަށް ގެންދަނީ ސިއްރުކޮށްގެންނެވެ.
ހަމަލާއާ ގުޅޭ ތުހުމަތުގައި އިތުރު ދެ މީހަކު ހައްޔަރުކުރުމާއެކު ހަމަލާގެ ތުހުމަތުވާ މީހުންގެ އަދަދު 10 އަކަށް ވަނީ އަރާފަ އެވެ. މީގެކުރިން ފުލުހުން ހާމަކޮށްފައިވާ ގޮތުގައި، ހަމަލާގައި އަމަލީ ގޮތުން ބައިވެރިވި ކަމުގެ ތުހުމަތު ހަތަރު މީހެއްގެ މައްޗަށް ކުރެވެ އެވެ.
ހަމަލާއަށް މާގިނަ ދުވަހެއް ނުވަނީސް އެ ހަތަރު މީހުން ހައްޔަރުކުރި އެވެ. އެމީހުންގެ ބައި ނިންމައި ދައުވާކުރަން ފޮނުވުމުގެ މަސައްކަތް އަންނަނީ ކުރަމުންނެވެ. އެއީ، އަދުހަމް އަހުމަދާއި މުޖާޒް އަހުމަދާއި ތަހުމީން އަހުމަދު އަދި އަހުމަދު ފާތިހެވެ.
ހަމަލާއާ ގުޅުން އޮތް ކަމުގެ ތުހުމަތުވާ އަނެއް ހަތަރު މީހުންނަކީ ހަރުކަށި ފިކުރާ ދެކޮޅަށް ފުލުހުން ހިންގި އޮޕަރޭޝަނުގެ ތެރެއިން ހައްޔަރުކުރި ބައެކެވެ. އެމީހުންގެ މައްޗަށް ހަމަލާއާ ގުޅުން އޮތް ކަމުގެ ތުހުމަތު ކުރެވުނީ ހައްޔަރުކޮށް ހިންގި ތަހުގީގުންނެވެ.
އޭގެތެރެއިން ފުލުހުން ވަނަވަރު ހާމަކޮށްފައިވަނީ އެންމެ މީހެއްގެ އެވެ. އެއީ، އަލީ ހައިޝަމް އެވެ.
ކުރިމިނަލް ކޯޓުން އިއްޔެ ތިން މީހުން ދޫކޮށްލާފައިވަނީ ހެކި ނެތް ކަމަށް ބުނެ ނަމަވެސް، ޕްރޮސިކިއުޓާ ޖެނަރަލް ހުސެއިން ޝަމީމް ވިދާޅުވި ގޮތުގައި، އެމީހުން ބަންދުކުރެވޭ މިންވަރަށް ހެކި އެބަ ހުއްޓެވެ. އެހެންވެ، ކުރިމިނަލް ކޯޓުގެ އަމުރު އިސްތިއުނާފުކުރުމަށް ވަނީ ނިންމަވާފަ އެވެ.
ހަރުކަށި ފިކުރު ފަތުރައި ޓެރަރިޒަމްގެ ތުހުމަތަށް އައްޑޫން ހައްޔަރުކުރި މީހުންގެ ތެރެއިން ވެސް ފަސް މީހަކު މީގެކުރިން ދޫކޮށްލި އެވެ. ނަމަވެސް، އެ އެންމެން އަލުން ހައްޔަރުކުރުމަށް ހައިކޯޓުން އެންގި އެވެ. އެގޮތަށް އަންގާފައިވަނިކޮށް އޭގެ ތެރެއިން އެކަކު ސުޕްރީމް ކޯޓަށް ދިޔުމުން އޭނާ ދޫކޮށްލުމަށް އަމުރުކުރި އެވެ. ނަމަވެސް، މިހާރު ފުލުހުން ވަނީ އެމީހާ އަލުން ހައްޔަރުކޮށްފަ އެވެ.
