ރިސޯޓްތަކާއި އަމިއްލަ ކުންފުނިތަކުގައި މަސައްކަތްކުރާ ދެކުނު އޭޝިއާ ގައުމުތަކުން އަންނަ ވޯކް ޕާމިޓް ހޯލްޑަރުން ކަރަންޓީނު ކުރަން ސަރުކާރުގެ ކަރަންޓީން ފެސިލިޓީއެއްގެ ބަދަލުގައި އަމިއްލަ ތަނެއް ބޭނުން ކުރަން ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހުއްދަ ދީފި އެވެ.
ކުރިން އޮތް އުސޫލުގެ ތެރެއިން މި ގައުމުތަކުން އަންނަ ވޯކް ޕާމިޓް އޮންނަ މީހުން 14 ދުވަހަށް ކަރަންޓީނު ވާން ޖެހެނީ ސަރުކާރުން އެކަމަށް ހާއްސަކުރެވިފައިވާ ގެސްޓްހައުސްތަކާއި ހޮޓާތަކުގަ އެވެ. އަދި އެކަމަށް ހިނގާ ހަރަދުތަކަށް ޒިންމާ ވާން ޖެހެނީ ވޯކް ޕާމިޓް ހޯލްޑަރުންނެވެ.
މި އުސޫލު މިގޮތަށް ކަނޑައެޅުމާއި ގުޅިގެން އަމިއްލައަށް ކަރަންޓީނު ކުރެވޭނެ ތަންތަނާއި ވަސީލަތްތައް ހުރި ވިޔަފާރިތަކުން އުސޫލާ މެދު ކަންބޮޑުވުން ފާޅުކުރި އެވެ. އޭގެ ތެރޭގައި ގިނައީ ރާއްޖޭގެ އެންމެ ބޮޑު ސިނާއަތްތައް ކަމުގައިވާ ޓޫރިޒަމާއި އިމާރާތްކުރުމުގެ ވިޔަފާރިތަކެވެ. އަދި އެ އިންތިޒާމްތައް ހަމަޖައްސައިދޭން ސަރުކާރުގައި އެދުނު ކަމުގެ މައުލޫމާތު ލިބުނެވެ.
އަމިއްލަ ތަންތަނުގައި ކަރަންޓީނު ކުރަން ހުއްދަ ދިނުމާ ގުޅިގެން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ގޮތުގައި، މިހެން ކަރަންޓީނު ކުރާ ތަންތަނަށް ހުއްދަ ދޭނީ އެޗްޕީއޭއިން ކަނޑައަޅާ އުސޫލަކަށް ފެތޭ ނަމަ އެވެ. އަދި މިހެން ހުއްދަ ލިބިފައި ހުންނަ އަމިއްލަ ތަންތަނުގައި ކަރަންޓީނު ވާން ހުއްދަ ލިބޭނެ ކަމަށް އޭނާ ވިދާޅުވި އެވެ.
މިހެން އަމިއްލަ ފެސިލިޓީއެއްގައި ކަރަންޓީނު ކުރަން ހުއްދަ ދިން ނަމަވެސް މީހުން ދިރިއުޅޭ ގެޔެއްގައި ކަރަންޓީނު ވުން މަނަލެވެ. އޭގެ ތެރޭގައި ގޭބިސީތަކުގައި މަސައްކަތް ކުރާ މީހުންނާއި ރާއްޖޭގައި ދިރިއުޅޭ ބިދޭސީ ޓީޗަރުން ހިމެނެ އެވެ.
ގޭގޭގައި މަސައްކަތްކުރާ ޑޮމެސްޓިކް ވޯކަރުންނާއި ކެއާ ވޯކަރުންގެ އިތުރުން ޓީޗަރުން ކަރަންޓީނު ވާން ޖެހެނީ އެކަމަށް ސަރުކާރުން ކަނޑައަޅާ ހާއްސަ ފެސިލިޓީތަކެއްގަ އެވެ. އަދި އޮންނަ އުސޫލުގެ ތެރެއިން އެތެރެވުމުގެ ކުރިން 96 ގަޑިއިރު ނުވާ ޕީސީއާރް ނެގެޓިވް ނަތީޖާއަކާއި، ކަރަންޓީނު ވުމަށް ފަހު 72 ގަޑިއިރުގެ ތެރޭގައި އިތުރު ސާމްޕަލެއް ނެގޭނެ އެވެ.
