ލ. މާމެންދޫގައި ދެ ބިދޭސީންގެ ދެމެދުގައި ހިންގި މާރާމާރީއެއްގައި އެކަކު ކަރަށް ވަޅިހަރައި މިއަދު ޒަހަމް ކޮށްލައިފި އެވެ.
ފުލުހުން ބުނީ މާރާމާރީ ހިންގީ އެ ރަށު ބަނދަރުގައި އޮތް ދޯންޏެއްގައި ތިބި ދެ ބިދޭސީއަކު ކަމަށެވެ. އެ ދެ މީހުންނަށް މާމެންދޫގެ ހެލްތު ސެންޓަރުގައި އަންނަނީ ފަރުވާ ދެމުންނެވެ.
އެ ރަށު ހެލްތް ސެންޓަރުގެ ސީނިއާ އެޑްމިނިސްޓްރޭޓާ މިސްބާހު "އަދަދު" އަށް ވިދާޅުވީ ދެ މީހުންނަށް ވެސް ވަރަށް ބޮޑަށް ވަނީ އަނިޔާވެފައި ކަމަށެވެ. އެކަމަކު އޭގެ ތެރެއިން އެކަކަށް ވަރަށް ބޮޑަށް އަނިޔާ ވެފައިވާ ކަމަށް އޭނާ ވިދާޅުވި އެވެ.
އެކަކުގެ ކަރަށް ވަޅިހަރާފައިވާ އިރު އަނެކަކުގެ މޫނުމަތީގައި އެއްޗަކުން ޖަހާފައި ހުރި ކަމަށް ވެސް ވިދާޅުވި އެވެ. އޭގެ އިތުރުން ތަންތަން މަށައިގެންގޮސް އެކި ވަރުގެ އަނިޔާ ލިބިފައިވާ ކަމަށް އޭނާ ވިދާޅުވި އެވެ.
