"އަޅުގަނޑު ހަމަ ފިތްކަނޑައިގެން ގޮސްފި،!"
ރާއްޖޭގެ ސިއްހީ ނިޒާމުގެ ތެރެއިން ލިބިވަޑައިގެންނެވި ބޭސްފަރުވާއާ ގުޅޭ ގޮތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މިހެންނެވެ.
ކާރުކޮޅަށް އަރާވަޑައިގަންނަވަނިކޮށް މޭ މަހުގެ 6 ވަނަ ދުވަހުގެރޭ މަޖީދީމަގުގައި ބޮމެއް ގޮއްވާލައިގެން ދިން ހަމަލާގައި ނަޝީދުގެ ހަށިކޮޅަށް ގިނަ ޒަހަމްތަކެއް ލިބުނެވެ. އެ ޒަހަމްތަކަށް ފަރުވާދިނުމަށް އޭޑީކޭ ހޮސްޕިޓަލްގައި ގިނަ ސާޖަރީތަކެއް ކުރި އެވެ.
އެތައް ގަޑިއިރެއްގެ ސާޖާރީތަކަކަށްފަހު، އެމަނިކުފާނު ސްޓޭބަލްވުމުން އިތުރު ފަރުވާއަށް ޖަރުމަނަށް ގެންދެވި އެވެ. ޖަރުމަނަށް ނަޝީދު ގެންދެވީ އެ ގައުމުގެ ސަރުކާރުންނާއި އާއިލާއިން އެކަމަށް އެދުމުންނެވެ.
"އަޅުގަނޑު ތަކުރާރުކޮށް އެދުނުން އަޅުގަނޑު މިތަނުގައި އޮތަދޭށޭ،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި، އެމަނިކުފާނު އިތުރު ފަރުވާއަށް ޖަރުމަނަށް ވަޑައިގެންނެވީ އޭޑީކޭއިން ލިބުނު ފަރުވާ ގޯސްވެގެން ނޫނެވެ. ނަމަވެސް އާއިލާއިންނާއި ޖަރުމަނު ސަރުކާރުން އެގޮތް ބޭނުންވުމުންނެވެ.
ޖަރުމަނުގެ ފަރުވާ ނިންމެވުމަށްފަހު މިވަގުތު އިނގިރޭސިވިލާތުގައި ހުންނެވި ނަޝީދު ވިދާޅުވި ގޮތުގައި އޭޑީކޭއިން ދީފައިހުރި ފަރުވާ ފެނިފައި ޖަރުމަންގެ ޑޮކްޓަރުން ވެސް ތިބީ އަޖައިބުވެފަ އެވެ.
"ޖަރުމަނު ޑޮކްޓަރުން ހަމަ އަޖައިބުވެފަ އެ ތިބީ ދިވެހިރާއްޖޭން ދީފައިހުރި ރަނގަޅު މޮޅު ކުޅަދާނަ ފަރުވާގެ ސަބަބުން،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި އޭޑީކޭ ޑޮކްޓަރުން އެކުރި މަސައްކަތް ނުކުރި ނަމަ، އެމަނިކުފާނު ސަލާމަތުން، ރައްޔިތުންނާ ވާހަކަ ދެއްކުމަށް ނީންނާނެ އެވެ. އެމަނިކުފާނު ވަނީ އެ ހޮސްޕިޓަލްގެ ހުރިހާ ޑޮކްޓަރުންނާއި ނަރުހުންނަށް ޝުކުރު އަދާކުރައްވާފަ އެވެ.
"ތަންތަން ފަހާފައިހުރި ގޮތް ވެސް ހާދަ ރީއްޗޭ،" ނަޝީދު ވިދާޅުވި އެވެ.
"ކިރިޔާވެސް ކަމަކާ ނުލާ ރަނގަޅު ކުރެވޭނެ ކަމެއް އޮތިއްޔާ އެ އޮތީ ރަނގަޅުކޮށްފައި."
ނަޝީދި ވިދާޅުވީ ރާއްޖޭގެ ސިއްހީ ނިޒާމް ވަރަށް ރަނގަޅު ކަމަށެވެ. ކޮވިޑުން އަރައިގަތުމުގައި ވެސް އެހެން ގައުމުތަކާ އަޅާބަލާއިރު ކިތަންމެ ތަނެއް ރަނގަޅު ކަމަށެވެ.
"އެހެންވީމަ އަޅުގަނޑުމެން ނުޖެހޭ ބޭން ޖަހާފައި ބޭސްފަރުވާއަށް އެތަންމިތަނަށް ދަތުރުކޮށް ހަދާކަށް،" ނަޝީދު ވިދާޅުވި އެވެ.
