ރިސޯޓުގައި މުވައްޒަފުން ތިބޭ އެކޮމޮޑޭޝަން ބްލޮކްތައް އެޅުމުގެ ބަދަލުގައި މިހާރު ޓޫރިޒަމް މިނިސްޓްރީން ބާރުއަޅަނީ ކައިރި ރަށްރަށުގައި މިތަންތަން އަޅަން ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް އިއްޔެ ވިދާޅުވެއްޖެ އެވެ.
ޓޫރިޒަމް މަސައްކަތްތެރިންގެ މައްސަލަތައް ހައްލުކުރަން ކުރާ މަސައްކަތްތަކާ ގުޅިގެން މައުސޫމް ވިދާޅުވި ގޮތުގައި، މިކަމަށް މިނިސްޓްރީން ބާރުއަޅަނީ ދިވެހި މުވައްޒަފުންނަށް ނައިޓަށް ރަށަށް ނުދެވޭ މައްސަލަ ހައްލު ކުރުމުގެ ބޭނުމުގަ އެވެ. އަދި މިހާރު ކޮންމެހެން ރިސޯޓުގައި އެކޮމޮޑޭޝަން ބްލޮކްތައް އެޅުމަށް ވުރެ ކައިރި ރަށްރަށުގައި އަޅަން މިނިސްޓްރީން އިސްވެ ރިސޯޓްތަކަށް ބާރުއަޅަމުން އަންނަ ކަމަށް ވިދާޅުވި އެވެ.
"އެންމެ ބޮޑު ކަމަށް އިންނާނީ މިހާރު ނައިޓަށް ގެޔަށް ދިޔުމަށް. އެ މައްސަލަ ހައްލުކުރުމަށް މިހާރު އަޅުގަނޑުމެން ހަމަ ވަރަށް ޕްރޯއެކްޓިވްކޮށް އެންކަރޭޖް ކުރަމުން މިދަނީ މިހާރު ކުރިން ރިސޯޓުގަ ގާއިމްކުރާ ސްޓާފް އެކޮމޮޑޭޝަން ރިސޯޓުގަ ކޮންމެހެން ގާއިމްކުރާކަށް ނުޖެހޭނެއޭ. އެބޭފުޅުންނަށް ކައިރި ރަށުގަ އެކަންތައް ގާއިމްކުރެވޭނެއޭ." މައުސޫމް ވިދާޅުވި އެވެ.
ކުރިން އޮންނަ އުސޫލުގެ ތެރެއިން ރިސޯޓްތަކުން ޖެހެނީ ރިސޯޓުގައި މަސައްކަތް ކުރާނެ ކަމަށް ލަފާކުރެވޭ މުވައްޒަފުންގެ އަދަދަށް ބަލާފައި ރިސޯޓުގައި މުވައްޒަފުން ތިބޭ ތަންތަން އިމާރާތްކުރާށެވެ. އަދި މީހުން ދިރިއުޅޭ ރަށްރަށުގައި އެކޮމޮޑޭޝަން އަޅަން ހުއްދަ ނުދެ އެވެ.
ރަން އަހަރުގެ ކުރިން މައްސަލަތައް ހައްލުކުރާނަން: މައުސޫމް
މުވައްޒަފުންގެ ޝަކުވާތަކަށް ހައްލު ހޯދަން މިނިސްޓްރީން ގާތުން މަސައްކަތް ކުރަމުންދާ ކަމުގެ ޔަގީންކަން މިނިސްޓަރު އެރުވި އެވެ. އަދި އެކަމަށް ހާއްސަކޮށްފައިވާ އީމެއިލްގެ ޒަރިއްޔާއިން މުވައްޒަފުން ހުށައަޅާ ޝަކުވާތައް، އިންޑަސްޓްރީގެ ބައިވެރިންނާ ގުޅިގެން ހައްލުކުރަމުން އަންނަ ކަމަށް ވިދާޅުވި އެވެ.
"ދޭތެރެއަކުން އަޑުއިވޭނެ މުވައްޒަފުންނަށް ބައެއް ކަހަލަ މައްސަލަތައް ދިމާވާ ކަންތައް. އެކަންތައްތައް ބެލުމަށް ޑެޑިކޭޓެޑް އީމެއިލްއެއް ގާއިމްކޮށްފައި. އަޅުގަނޑުމެންނަށް ދޭތެރެދޭތެރެއަކުން ލިބޭ މައްސަލަތައް އެ މުވައްޒަފުންނާ ގުޅިގެން އަދި އިންޑަސްޓްރީ ޕާޓްނަރުންނާ ގުޅިގެން ހައްލުކުރަމުން މިދަނީ" މައުސޫމް ވިދާޅުވި އެވެ.
މިނިސްޓަރު އިތުރަށް ވިދާޅުވީ، އަންނަ އަހަރު ރާއްޖޭގެ ފަތުރުވެރިކަމުގެ ރަން އަހަރު ފާހަގަކުރުމަށް ތައްޔާރުވާއިރު އެންމެ ބޮޑު އިސްކަމެއް ދޭ ކަންތައްތަކުގެ ތެރޭގައި މުވައްޒަފުންގެ މައްސަލަތަކަށް ހައްލު ހޯދައި ދިނުން ހިމެނޭ ކަމަށެވެ. އަދި އެކަން ހާސިލްކުރަން ގިނަ މަސައްކަތްތަކެއް ކުރަމުން އަންނަ ކަމަށް ވިދާޅުވި އެވެ.
އޭގެ ތެރޭގައި ރިސޯޓުތަކުގެ މަތީ ފަންތީގެ ވަޒީފާތަކަށް ދިވެހިން ގެންދިޔުމާއި، ޓޫރިޒަމް ދާއިރާއިން އަންހެނުންނަށާއި ޒުވާނުންނަށް ފުރުސަތު ހޯދައި ދިނުން ހިމެނެ އެވެ.
