މިއުނިކް (ޖޫން 30) - އިންގްލެންޑް އަތުން ރޭ ބަލިވެ، ޖަރުމަނަށް މި ފަހަރުގެ ޔޫރޯ ފުޓްބޯޅަ މުބާރާތް ނިމިފައިވާއިރު، އެ ޓީމުގެ މިޑްފީލްޑަރު ޓޯނީ ކްރޫސް ގައުމީ ޓީމަށް ކުޅުން ހުއްޓާލަން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 31 އަހަރުގެ ކްރޫސް މި ފަހަރުގެ ޔޫރޯ އަށް ފަހު ގައުމީ ޓީމަށް ކުޅުން ހުއްޓާލާނެ ކަމަށް މި އަހަރުގެ ކުރީކޮޅުގައި ވެސް ވަނީ މީޑިއާގައި އަޑުފެތުރިފަ އެވެ. އެކަމަކު އޭރު ކްރޫސް އެ ވާހަކަކަތަކަށް ސީދާ ޖަވާބެއް ދޭން ބޭނުމެއް ނުވި އެވެ.
ރިޕޯޓްތައް ބުނާގޮތުން ކްރޫސް މިހާރު ނިންމައިގެން ހުރީ މި ފަހަރުގެ ޔޫރޯ އަށް ފަހު ދެން ގައުމީ ޓީމަށް ނުކުޅޭށެވެ. ޖަރުމަނުގެ ނޫހެއް ކަމަށްވާ ބިލްޑް އިން ރިޕޯޓްކުރާ ގޮތުގައި ކުރިއަށް އޮތް ދުވަސްތަކުގެ ތެރޭގައި ކްރޫސް ގައުމީ ޓީމުން ރިޓަޔާކުރިކަން އިއުލާނު ކުރާނެ އެވެ.
ދެކުނު ކޮރެއާގައި 2007 ވަނަ އަހަރު ބޭއްވި 17 އަހަރުން ދަށުގެ ފީފާ ވޯލްޑް ކަޕްގެ މޮޅު ކުޅުންތެރިޔާގެ މަގާމު ހޯދި ކްރޫސް އަށް ޖަރުމަނު ސީނިއާ ގައުމީ ޓީމުން ފުރުސަތު ލިބުނީ 2010 ވަނަ އަހަރު އެކުވެރިކަމުގެ މެޗެއްގައި އާޖެންޓީނާއާ ދެކޮޅަށް ކުޅުނު މެޗުގަ އެވެ. އެ ފަހަރު ދެކުނު އެފްރިކާގައި ބޭއްވި ވޯލްޑް ކަޕްގައި ވާދަކުރި ޖަރުމަނު ޓީމުގައި ވެސް ކްރޫސް ހިމެނުނެވެ.
ޖަރުމަނާ އެކު 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޓީމުގައި ހިމެނޭ ކްރޫސް ވަނީ މިހާތަނަށް ޖަރުމަނަށް 106 މެޗު ކުޅެދީފަ އެވެ. އަދި އެ މެޗުތަކުގައި 17 ގޯލު ޖެހި އެވެ.
މި ފަހަރުގެ ޔޫރޯ އަށް ފަހު ޖަރުމަނުގެ ބައެއް ކުޅުންތެރިން ރިޓަޔާކުރާނެ ކަމުގެ ވާހަކަ މީޑިއާގައި އޮތީ ދެކެވިފަ އެވެ. އެކަމަކު ރިޕޯޓްތައް ބުނާގޮތުން ބައެއް ކުޅުންތެރިން އަންނަ އަހަރު ގަތަރުގައި ބާއްވާ ވޯލްޑް ކަޕް ކުޅެފައި ޖަރުމަނު ޓީމަށް ކުޅުން ހުއްޓާލާ ގޮތަށް ނިންމުން ބަދަލުކުރުމުގެ ފުރުސަތު ވެސް އެބައޮތެވެ. އޭގެ ތެރޭގައި ކްރޫސް ވެސް ހިމެނިދާނެ ކަމަށް ޖަރުމަނުގެ ފުޓްބޯޅަ ތަޖުރިބާކާރުން ބުނެ އެވެ.
ރޭ އިންގްލެންޑް އަތުން ޖަރުމަނު ބަލިވި މެޗަކީ އެ ޓީމުގެ ކޯޗަކަށް ޔަކީމް ލޯ ހުރި ފަހު މެޗެވެ. މި ފަހަރުގެ ޔޫރޯ ނިމުމުން 15 އަހަރަށް ފަހު ޖަރުމަނުގެ ކޯޗުކަން ދޫކޮށްލާނެކަން ލޯ އޮތީ މާ ކުރިން ވެސް އިއުލާނު ކޮށްފަ އެވެ. ޖަރުމަނު ޓީމާ ދެން ހަވާލުވާނީ ލޯގެ އެސިސްޓަންޓަަކަށް ކުރިން މަސައްކަތްކުރި އަދި މިދިޔަ ދެ އަހަރެއްހާ ދުވަހު ބަޔާންގައި ގިނަ ކާމިޔާބީތަކެއް ހޯދި ކޯޗު ހަންސީ ފްލިކް އެވެ.
