ހަނިމާދޫ ބިމުގެ މައްސަލަ: ހައްލު ހޯދޭނެކަމުގެ ޔަގީންކަން މިނިސްޓަރަށް އެބައޮތް

ޕްލޭނިން މިނިސްޓަރު މުހައްމަދު އަސްލަމް: ހަނިމާދޫ އެއާޕޯޓް ބިމުގެ މައްސަލަ ހައްލު ކުރެވޭނެ ކަމަށް ވިދާޅުވި-- ފޮޓޯ: ހުސައިން ވަހީދު/ އަދަދު

ޕްލޭނިން މިނިސްޓަރު މުހައްމަދު އަސްލަމް: ހަނިމާދޫ އެއާޕޯޓް ބިމުގެ މައްސަލަ ހައްލު ކުރެވޭނެ ކަމަށް ވިދާޅުވި-- ފޮޓޯ: ހުސައިން ވަހީދު/ އަދަދު

ހދ. ހަނިމާދޫ އެއާޕޯޓް ތަރައްގީކުރަން ސަރުކާރުން ބޭނުންވާ މިންވަރުގެ ބިން އެ ރަށުން ހޯދުމުގައި އޮތް ހިޔާލު ތަފާތުވުންތަކަށް ހައްލު ހޯދޭނެ ކަމުގެ ޔަގީންކަން އެބަ އޮތް ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.

ހަނިމާދޫ އިންޓަނޭޝަނަލް އެއާޕޯޓް ބޮޑުކޮށް ތަރައްގީކުރުމުގެ މަޝްރޫއުއަށް އެއާޕޯޓް ސަރަހައްދުން 853،937 އަކަފޫޓުގެ ބިމެއް ހަމަޖައްސައިދިނުމަށް ޕްލޭނިން މިނިސްޓްރީން ވަނީ އެ ރަށު ކައުންސިލުގައި އެދިފަ އެވެ.

ހަނިމާދޫ އެއާޕޯޓު ޒަމާނީ ފެންވަރަށް ތަރައްގީކުރަނީ އިންޑިއާގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީން ފަންޑުކުރާ ގޮތަށެވެ. އެ މަޝްރޫއަށް 85 މިލިއަން ޑޮލަރު ނުވަތަ 1.3 ބިލިއަން ރުފިޔާ ހޭދަވާނެ ކަމަށް ފިނޭންސް މިނިސްޓްރީން ބުނެފައިވާއިރު، އެ އެއާޕޯޓް ތަރައްގީ ކުރަން ހަވާލުކޮށްފައިވަނީ ވެސް ލޯން ދޭ އިންޑިއާގެ ކުންފުންޏަކާ އެވެ.

މަޝްރޫއުގައި އިންޑިއާގެ ބައިވެރިވުން ބޮޑުވުމާއި އެއާޕޯޓް ތަރައްގީކުރަންދޭ ބިމުން އިންޑިއާގެ މިލިޓަރީއަށް ފުރުސަތު ދޭނެ ކަމުގެ ތުހުމަތާއެކު މައްސަލަ ބޮޑުވި އެވެ.

ސަރުކާރުން އެދުނު ގޮތަށް ބިން ހަމަޖައްސައިދިނުމާ ދެކޮޅަށް ޕެޓިޝަނެއްގައި ސޮއިކުރުމުގެ އިތުރުން ހަނިމާދޫގައި އިހްތިޖާޖުކޮށްފައިވެ އެވެ. ރައްޔިތުންގެ އެންމެ ބޮޑު ކަންބޮޑުވުމަކަށް އޮތީ، ރަށުގެ ބިމުގެ ބޮޑު ބައެއް އެއާޕޯޓް ތެރެއަށް ގެއްލިގެންދިޔުމެވެ.

ރައްޔިތުންގެ ކަންބޮޑުވުންތަކާއެކު، ހަނިމާދޫ ކައުންސިލުން ވަނީ ބިމާ ގުޅޭ ގޮތުން މިނިސްޓްރީއާއެކު މަޝްވަރާތައް ފަށާފަ އެވެ. އެ ކައުންސިލްގެ ހުށަހެޅުމަކީ، މިނިސްޓްރީން އެދުނު މިންވަރަށްވުރެ ކުޑަ ބިމެއް މަޝްރޫއުއެއް ދޫކުރުމެވެ.

އެ މަޝްވަރާތަކާ ގުޅޭ ގޮތުން ޕްލޭނިން މިނިސްޓަރު އަސްލަމް މިއަދު "އަދަދު"އަށް ވިދާޅުވި ގޮތުގައި ކައުންސިލުން ހުށަހެޅި ގޮތަށް ދޫދެވޭނީ ކިހާވަރަކަށްތޯ ޖެހޭނީ ބަލަން ކަމަށާއި ބިމުގެ މައްސަލައަށް ހައްލެއް ހޯދޭނެ ކަމަށެވެ.

"މީގެން ކޮމްޕްރަމައިޒް ކުރެވޭނީ ކިހާވަރަކަށްތޯ އަޅުގަނޑުމެން ވާހަކަތަކެއް ދައްކަން ޖެހޭނީ. ވާހަކަ ދައްކައިގެން ގޮތްތަކެއް ހޯދާނީ. އަޅުގަނޑަށް ޔަގީން ގޮތްތަކެއް ފެންނާނެ،" އަސްލަމް ވިދާޅުވި އެވެ.

ސަރުކާރުން ބުނެފައިވާ ގޮތުގައި އެއާޕޯޓް ސަރަހައްދަށް ބިން ހޯދަން އެދިފައި ވަނީ އެންމެ ބޮޑެތި މަތިންދާ ބޯޓު ޖައްސާވަރަށް ރަންވޭ ތަރައްގީ ކުރާށެވެ. ރަންވޭ ބޮޑު ކުރުމުގެ އިތުރުން ސިފައިންގެ މައި މަރުކަޒެއް ވެސް ހޯދަން އެދިފައިވާ ބިމުގައި އަޅަން ނިންމާފައިވާ ކަމަށާއި އެއީ އިންޑިއާ މީހުން ތިބެން ކަނޑައަޅާ ބިމެއް ނޫން ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވަނީ ކުރިން ވިދާޅުވެފަ އެވެ.

އޭނާ ވިދާޅުވެފައިވާ ގޮތުގައި ބިން ދޫކުރުން އޮތީ ކައުންސިލްގެ އަތްމަތީގަ އެވެ. ބިން ދިނުމާމެދު ރަށުން ކޮންމެ ނިންމުމެއް ނިންމި ނަމަވެސް، މައްސަލައެއް ނެތް ކަމަށާއި އެ މަޝްރޫއު އެހެން ތަނަކަށް ބަދަލު ކުރެވިދާނެ ކަމަށް މިނިސްޓަރު ފައްޔާޒު ވިދާޅުވެފައިވެ އެވެ.

ނަމަވެސް، މިނިސްޓަރު އަސްލަމް ވިދާޅުވި ގޮތުގައި، އެ ހާލަތެއް ނެތެވެ.

މިނިސްޓަރު އަސްލަމް މިއަދު ވިދާޅުވީ، ބިން ނުލިބިގެން އެއާޕޯޓް ނޭޅޭނެ ވާހަކަ ދައްކަން ނުޖެހޭ ކަމަށާއި އެ ޕްލޭނާ އެއްގޮތަށް މަސައްކަތް ދާނެ ކަމުގެ ޔަގީންކަން އެބައޮތް ކަމަށެވެ.

"އެއާޕޯޓް ނާޅާ ވާހަކައަކީ ތަންކޮޅެއް އެކްސްޓްރީމް ވާހަކައެއްހެން އަޅުގަނޑަށް ހީވަނީ. ވާހަކަ ދެކެވިގެން ހައްލެއް ލިބޭނެ ކަމަށް އަޅުގަނޑުމެން އުއްމީދު ކުރަނީ،" އަސްލަމް ވިދާޅުވި އެވެ.

ކޮމެންޓް

ފަހުގެ ޚަބަރު

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

ހިދުމަތުގެ އެންމެ މަތީ ޝަރަފު މުހައްމަދު ރަޝީދާއި އައްބާސަށް

ދައުލަތަށް ހިދުމަތް ކުރުމުގެ އެންމެ މަތީ ޝަރަފު، މުހައްމަދު ރަޝީދު އިބްރާހީމާއި އައްބާސް އިބްރާހީމަށް ވަނީ އަރުވާފައި. މުހައްމަދު ރަޝީދަށް މި ޝަރަފު އެރުވީ ދީނީ ރޮނގުން ކުރެއްވި ހިދުމަތްތަކަށް ކަމަށްވާއިރު، އައްބާސް އިބްރާހީމަށް މި ޝަރަފު އެރުވީ ދިވެހިބަހާއި އަދަބިއްޔާތުގެ ދާއިރާއިން.

އާންމުންގެ ތަނަވަސްކަން ހުއްޓުވަނީ ރާއްޖެ ނިކަމެތިކުރުން: ނަޝީދު

ރަސްމާލެ މަޝްރޫއު އީގަލް ހިލްސް ކުންފުންޏާ ހަވާލުކުރުމާ ދެކޮޅަށް އެމްޑީޕީން ކުރާ މަސައްކަތަކީ އާންމު ރައްޔިތުންނަށް ލިބެން އޮތް ތަނަވަސްކަން ހުއްޓުވައި ރާއްޖެ ނިކަމެތިކުރުމަށް ޖަހާ މަޅިއެއް ކަމަށް ނަޝީދު ވިދާޅުވި.

ޖޭޕީ، އަދާލަތު، އެމްޑީއޭ އަދި އެމްއެންޕީން މެންބަރުން ވަކިވަނީ

އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި ޖޭޕީ، އެމްޑީއޭ، އަދާލަތު އަދި އެމްއެންޕީން ގިނަ އަދަދެއްގެ މެންބަރުން ވަނީ ވަކިވެފައި. މީގެ ބަދަލުގައި ސަރުކާރު ހިންގާ ޕީއެންސީއާއި އިދިކޮޅު އެމްޑީޕީގެ މެންބަރުންގެ އަދަދު ބޮޑުތަނުން އިތުރުވި. އެންމެ ގިނަ މެންބަރުން ވަކިވީ ޖޭޕީން ކަމަށްވާއިރު، އެންމެ ގިނަ މެންބަރުން އަލަށް ގުޅުނީ ޕީއެންސީއާ

އިސްތިއުނާފު ލަސްވާ މައްސަލައިގައި ޖޭއެސްސީ ހާޒިރުކުރަނީ

ޖަލު ހުކުމް ތަންފީޒުކޮށް ނިމޭއިރުވެސް އިސްތިއުނާފު މަރުހަލާ ނުނިމޭ މައްސަލައަށް ގާނޫނީ ހައްލެއް ހޯދުމަށް ޖޭއެސްސީ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރުމަށް ވަނީ ފާސްކޮށްފަ. އިސްތިއުނާފު މައްސަލަތައް ނިންމަންޖެހޭ ވަކި މުއްދަތެއް ގާނޫނުގައި ނެތުމުގެ ސަބަބުން ކުށްވެރިންގެ އަސާސީ ހައްގުތައް ގެއްލެމުންދާކަން މެންބަރުން ފާހަގަކުރެއްވި.

"ބިން ދީ ދީނާއި މިނިވަންކަން ގެއްލުވާ ވެރިޔަކު އަދި މި ނޫނީ ނާދޭ"

ބޭރު މީހުންނަށް ބިން މިލްކުކުރެވޭ ގޮތަށް ސަރުކާރުން ނިންމާފައިވާ ނިންމުމަކީ ރާއްޖޭގެ ދީނީ ވަހުދަތާއި މިނިވަންކަމަށް އޮތް ބޮޑު ނުރައްކަލެއް ކަމަށާއި މި ނިންމުމުގެ ސަބަބުން ރާއްޖޭގެ ބިންތަކުގެ މިލްކުވެރިކަން އެހެން ދީންތަކުގެ މީހުންނަށް ލިބިދާނެ ކަމުގެ ބިރު އޮތްކަން ފާހަގަކުރައްވައި، ގައުމު ދިފާއުކުރުމަށް ނުކުތުމަށް ޖަމީލު ގޮވާލައްވައިފިއެވެ.

ސުޕްރީމް ކޯޓުގެ ފަނޑިޔާރުންނަށް އޮނަރަބަލް ކިޔަން އަންގައިފި

ސުޕްރީމް ކޯޓުގެ ފަނޑިޔާރުންނާ މުހާތަބުކުރާއިރު "އޮނަރަބަލް" ކިޔުމަށް ޖޭއެސްސީން ރަސްމީކޮށް އަންގައި ސާކިއުލާއެއް ވަނީ ނެރެފައި. މި ބަދަލާއެކު ފަނޑިޔާރުންގެ ނަމުގެ ކުރިއަށް "އަލްއުސްތާޒް" ބޭނުންކުރުން ހުއްޓާލަން ޖެހޭއިރު، މިއީ މީގެ ކުރިން އަމަލުކުރަމުން އައި އުސޫލަށް ގެނައި ރަސްމީ ބަދަލެއް.

Newsletter

Get the latest news delivered straight to your inbox