ރިިސޯޓް ތަރައްގީކުރަން އެންމެ ފަހުން ހުޅުވާލި 16 އިންވެސްޓްމަންޓް ފުރުސަތުގައި ހަތް ރަށެއްގައި ރިސޯޓް ތަރައްގީކުރަން 13 ބިޑު ހުށައަޅާފައިވާ ކަމަށް ޓޫރިޒަމް މިނިސްޓްރީން ބުނެފި އެވެ.
ރާއްޖޭގެ ހަތް އަތޮޅެއްގެ 23 ރަށެއް ހިމެނޭގޮތަށް ރިސޯޓް ހަދަން ހުޅުވާލި ފުރުސަތަކީ ރަށްތައް ދޫކުރުމުގެ ދެވަނަ ފިޔަވަހީގެ ތެރެއިން ސަރުކާރުން ކުރަން ފެށި މަސައްކަތެކެވެ. އޭޕްރިލް މަހު ހުޅުވާލި މުއްދަތުގެ ފުރުސަތު ހަމަވީއިރު 98 ފަރާތަކުން ޝައުގުވެރިކަން ފާޅުކުރި ނަމަވެސް ބިޑް ފޮތް ގަތީ އެންމެ 18 ފަރާތުންނެވެ.
ޓޫރިޒަމް މިނިސްޓްރީން ކުރި އިއުލާނެއްގައި ބުނީ ޖޫން 24 ވަނަ ދުވަހަށް ބިޑް ހުށައެޅުމުގެ ސުންގަޑި ހަމަވީއިރު ނުވަ ފަރާތަކުން ބިޑް ހުށައަޅާފައިވާ ކަމަށެވެ. މީގެ ތެރޭގައި ގިނައީ މިހާރުވެސް ރާއްޖޭގައި ފުޅާދާއިރާއެއްގައި ޓޫރިޒަމުގައި ހަރަކާތްތެރިވަމުން އަންނަ ދިވެހި ކުންފުނިތަކެވެ.
ނަމަވެސް ބިޑް އިވެލުއޭޝަން މަރުހަލާ ކުރިޔަށްދާތީ ކުންފުނިިތަކުގެ ނަންތަކާއި އިންވެސްޓަރުން ޝައުގުވެރިކަން ފާޅުކުރި ރަށްތަކުގެ މައުލޫމާތު ހިއްސާކޮށްފައެއް ނުވެ އެވެ.
މި ރަށްތަކަށް ސަރުކާރުން ނަގާ މިނިމަމް ލީޒް އެކުއިޒިޝަން ކޮސްޓް، ކޮވިޑްގެ ހާލަތާއި ގުޅިގެން 30 ޕަސެންޓް ދަށްކުރި އެވެ. އެހެން ނަމަވެސް، ބިޑް ހުށައެޅި ފަރާތްތަކުގެ ތެރޭގައި ސަރުކާރުން ކަނޑައެޅި އަގަށް ވުރެ މަތިން ބައެއް އިންވެސްޓަރުން ހުށައަޅާފައި ވެ އެވެ.
މިގޮތުން އައި ހުށައެޅުންތަކުގެ ތެރޭގައި ސަރުކާރުން ކަނޑައެޅީ އަގަށް ވުރެ 140 ޕަސެންޓު ބޮޑު އަގެއް ހުށައަޅާފައިވާ ކަމަށް ޓޫރިޒަމް މިނިސްޓްރީން ބުނެ އެވެ.
އެކުއިޒިޝަން ކޮސްޓް ކުޑަ ކުރި ނަމަވެސް އަހަރު ރިސޯޓް ތަރައްގީކުރަން ދޫކުރާ ރަށްތަކުން ދައުލަތަށް މަދުވެގެން 12 މިލިއަން ޑޮލަރުގެ އާމްދަނީއެއް ލިބޭނެ ކަމަށް ކުރިން ލަފާކުރި އެވެ. ނަމަވެސް ބިޑް ހުށައަޅާފައިވާ އަދަދަށް ބަލާފައި މި އަދަދަށް އާމްދަނީ ލިބުން ނާދިރެވެ.
