ރަހީނުކޮށް 13 އަހަރުގެ ފިރިހެން ކުއްޖަކު މަރާލައި މޫދަށް އެއްލާލާފައި އޮއްވާ ފެނުނު މައްސަލައިގައި ހައްޔަރުކުރީ ނ. ލަންދޫ، ބަގީޗާގޭ، އިބްރާހިމް ޒިހާންކަން "އަދަދު"އަށް ކަށަވަރުވެއްޖެ އެވެ.
ފުލުހުން މިހާތަނަށް އާއްމުކޮށްފައި ވަނީ 13 އަހަރުގެ މުހައްމަދު ރާއިފްގެ މަރުގެ މައްސަލައިގައި 27 އަހަރުގެ މީހަކާއި 17 އަހަރުގެ ކުއްޖަކު ހައްޔަރުކޮށްފައިވާ ކަމެވެ.
މީގެތެރެއިން 27 އަހަރުގެ މީހާއަކީ ޒިހާން ކަމަށާއި އޭނާ ހައްޔަރުކުރީ މާލޭގެ ގެސްޓްހައުސްއެއްގެ ތެރެއިން ކަން "އަދަދު"އަށް ވަނީ ޔަގީންވެފަ އެވެ. ޒިހާންއަކީ އެނގިފައިވާ ގޮތުގައި އެކި ކުށްތަކުގެ ރެކޯޑު އޮންނަ މީހެކެވެ. ވަރަށް ފަހުން ވެސް މައްސަލައެއްގެ ތުހުމަތަށް އޭނާ ހައްޔަރުކޮށް ޖަލަށްލާފައިވާ ކަން އެނގިފައިވެ އެވެ.
ހައްޔަރުކުރި ޒިހާން އާއިި ކުޑަކުއްޖާ މިދިޔަ އާދީއްތަދުވަހުން ފެށިގެން ތިބީ ހެންވޭރު ދުނބުރިމަގުގައި ހުންނަ އެކްސްޓްރާ ހެވަން ކިޔާ ގެސްޓް ހައުސްއެއްގަ އެވެ. އެކަމަކު އެތަން ކުއްޔަށް ނެގީ މި މައްސަލައިގައި ހައްޔަރު ކުރި މީހެއްގެ ނަމުގައެއް ނޫނެވެ.
އާދީއްތަދުވަހު އެ މީހުން ފިލަން ގެސްޓް ހައުސްއަށް ދިޔައިރު ރާއިފް ގެއްލުނީ މިދިޔަ ހޮނިހިރު ދުވަހު އެވެ. ރާއިފް ނުފެނިގެން އާއިލާ އިން ފުލުހުންނަށް ރިޕޯޓްކުރީ ވެސް އެ ދުވަހު އެވެ.
މަރާލާފައި މޫދުގައި އޮއްވާ ފެނުނުއިރު އެ ކުއްޖާގެ ހަށިގަނޑުގައި އަނިޔާކޮށްފައިވާ ކަމާއި ކަރުގައި ވެސް އެއްޗެއް ބާރަށް ބައްދާފައިވާ ކަމުގެ ނިޝާންތައް ފެންނަން ހުރި ކަން އެނގިފައިވެ އެވެ. އެ ކުއްޖާގެ ޕޯސްޓްމޯޓަމް ހަދަން ރާއްޖެ އިން ބޭރަށް މިއަދު ގެންދަން ވަނީ ނިންމައިފަ އެވެ.
