ލަންޑަން (ޖޫން 21) - ސްކޮޓްލެންޑްގެ މެދުތެރޭގައި މޮޅު ކުޅުމެއް ދައްކަމުން އަންނަ މިޑްފީލްޑަރު ބިލީ ގިލްމޯ ކޮވިޑަށް ޕޮޒިޓިވްވެއްޖެ އެެވެ.
ޗެލްސީ އަށް ކުޅެމުން އަންނަ އުމުރުން 20 އަހަރުގެ ގިލްމޯ އަކީ މި ފަހަރުގެ ޔޫރޯ ފެށި ފަހުން ޓީމުތަކުގެ ތެރެއިން ކޮވިޑަށް ޕޮޒިޓިވްވި ތިން ވަަނަ ފަރާތެވެ. މީގެ ކުރިން ސްލޮވާކިއާގެ ކުޅުންތެރިއަކާ އޮފިޝަލަކު ވަނީ ކޮވިޑަށް ޕޮޒިޓިވްވެފަ އެވެ.
ގިލްމޯ ވަނީ އެންމެ ފަހުން ސްކޮޓްލެންޑުން މިދިޔަ ހުކުރު ދުވަހުގެރޭ އިންގްލެންޑާ އެއްވަރުކުރި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. ސްކޮޓްލެންޑުން މާދަމާރޭ ކްރޮއޭޝިއާއާ ދެކޮޅަށް ކުޅޭ މެޗުގައި ގިލްމޯ އަށް ނުކުޅެވޭނެ އެވެ. އަދި 10 ދުވަހުގެ އައިސޮލޭޝަނަކަށް ދާން ޖެހުމުން ގިލްމޯ އަށް ދެން މި މުބާރާތުގައި ކުޅެވުމުގެ ފުރުސަތު ކުޑަ އެވެ.
މި ފަހަރު ޔޫރޯ އަށް ތައްޔާރުވަމުން ދަނިކޮށް ސްކޮޓްލެންޑްގެ މިޑްފީލްޑަރު ޖޯން ފްލެކް ކޮވިޑަށް ޕޮޒިޓިވްވިއިރު، އިތުރު ހަ ކުޅުންތެރިންނާ ކޮންޓެކްޓްވި އެވެ. އެކަމަކު ހާލަތު ގޯހެއްނުވެ އެ ހުރިހާ ކުޅުންތެރިންނާއި ފްލެކް ވެސް ވަނީ އެނބުރި ޓީމާ ގުޅިފަ އެވެ. ގިލްމޯ ކޮވިޑަށް ޕޮޒިޓިވްވިއިރު، އިތުރު ކޮންޓެކްޓްތަކެއް ހުރިތޯ އަންނަނީ ޕްރޮޓޮކޯލްގެ ތެރެއިން ބަލަމުންނެވެ.
އިންގްލެންޑްގެ ސްޓާލިން (ކ) އަތުން ގިލްމޯ ބޯޅަ ހޯދަނީ.
ޔުއެފާ އިން މުބާރާތަށް ކަނޑައަޅާފައިވާ އުސޫލުގައިވާ ގޮތުން ހާލަތު ގޯސްނުވެ 13 ކުޅުންތެރިން ތިބެއްޖެނަމަ މެޗު ކުޅެވޭނެ އެވެ. ކޮވިޑަށް ޕޮޒިޓިވްވާ ކުޅުންތެރިންގެ ބަދަލުގައި ބެކަޕް ކުޅުންތެރިންގެ ލިސްޓުން ކުޅުންތެރިއަކު ހިމެނޭނެ އެވެ. އަދި ފުރަތަަމަ ތާވަލުކޮށްފައިވާ ވަގުތު މެޗު ނުކުޅެވޭ ފަދަ ހާލަތެއް މެދުވެރިވެއްޖެނަމަ 48 ގަޑިއިރުގެ ތެރޭގައި ތަފާތު ދަނޑެއްގައި ނަމަވެސް މެޗު ރީ ޝެޑިއުލްކުރެވޭނެ އެވެ. އެ ގޮތަށް ވެސް ނުކުޅެވިއްޖެނަމަ ރަނގަޅަށް ކުޅެވޭ ހާލަތުގައި އޮތް ޓީމަށް 3-0 އިން މެޗު ލިބޭނެ އެވެ.
ތޭވީސް އަހަރު ފަހުން ބޮޑު މުބާރާތެއްގައި ވާދަކުރަމުން އަންނަ ސްކޮޓްލެންޑް މި ފަހަރު ޔޫރޯގައި މިހާތަނަށް އަންނަނީ ރަނގަޅު ކުޅުމެއް ދައްކަމުންނެވެ. ގްރޫޕް ޑީގެ އެންމެ ފުލުގައި ސްކޮޓްލެންޑް އޮތް ނަމަވެސް މާދަމާރޭ ކްރޮއޭޝިއާ ބަލިކޮށްގެން ސްކޮޓްލެންޑަށް އަނެއް ބުރުގެ ފުރުސަތު ހޯދިދާނެ އެވެ. އެއީ މި ގްރޫޕްގެ ގަދަ ދެ ޓީމުގެ ތެރޭގައި ހިމެނިގެން ނޫނީ އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރެއިން ޖާގައެއްގަ އެވެ.
