ކޮލޯން (ޖޫން 19) - ޔުއެފާ ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ދެ ވަނަ މެޗަށް ސްކޮޓްލެންޑުން ނުކުންނަނީ އާ ޕްލޭނަކާ އެކު ބޮޑެތި ބަދަލުތަކެއް ގެނެސްގެން، ފުރަތަމަ މެޗުގެ އެ ކަންކަމުން ދިމާވި ހާސްކަން ހަނދާނުން ފޮހެލައިގެން ކަމަށް އެ ޓީމުގެ ކޯޗުގެ ސްޓީވް ކްލާކް ބުނެފި އެވެ.
ސްކޮޓްލެންޑުން ގްރޫޕް ސްޓޭޖުގައި ކުޅުނު ފުރަތަމަ މެޗުން, މުބާރާތް ބާއްވާ ގައުމު ޖަރުމަނު އަތުން 5-1 އިން ވަނީ ބަލިވެފަ އެވެ. މި މެޗުގައި ސްކޮޓްލަންޑްގެ ރިޔާން ޕޯޓެއުސް އަށް ވަނީ ރަތް ކާޑު ދައްކައިފަ އެވެ. އަދި ސްކޮޓްލެންޑުން ގްރޫޕް ސްޓޭޖުގައި ދެން ކުޅެން ޖެހޭ ދެ މެޗުގައި ވެސް އޭނާ އަށް ނުކުޅެވޭނެ އެވެ.
މި ކަމަށް އިޝާރާތްކޮށް ކްލާކް ބުނީ, މިއީ ލިބުނު ހައިރާން ކަމެއް ކަމަށެވެ. އެކަމަކު، ސްކޮޓްލެންޑުން މުބާރާތައް ނުކުތީ މާޔޫސްވާން ނޫން ކަމަށާއި, ސްވިޒަލެންޑާ ދެކޮޅަށް ނުކުންނާނީ މުޅިން އާ ޕްލޭނަކާ އެކުގައި ކަމަށެވެ.
"ޕޯޓުއެސް އަށް ދެ މެޗުގެ ސަސްޕެންޝަނެއް އައުން އެއީ މުޅި ސްކޮޓްލެންޑް ޓީމަށް ލިބުނު ހައިރާން ކަމެއް. އެކަމަކު، އެކަމާ ވާހަކަ ދައްކައި ވަގުތު ބޭކާރު ކުރަން އަހަރެން ބޭނުމެއް ނޫން. އަހަރެން ކުރިއަށް މި އޮތް މެޗަށް (ސްވިޓްޒަލެންޑާ ދެކޮޅަށް ނުކުންނަ މެޗު) އަށް ނުކުންނާނީ މުޅިން އާ ޕްލޭނަކާ އެކު" ކްލާކް ބުންޏެވެ.
އިނގިރޭސި ފުޓްބޯޅައިގައި ގިނަ ދުވަސްތަކެއް ވަންދެން މަސައްކަތްކުރި ކޯޗު ކްލާކް ބުނީ ޖަރުމަނު އަތުން ބަލިވުމުގައި، މާ ގިނަ އެއްޗެހި ކުޅުންތެރިންނަށް ކިޔައިދެވުމުން، ކަންކަމުގައި ރިއެކްޓްކުރާނެގޮތް ކުޅުންތެރިންނަށް ނުވިސްނުނީ ކަމަށެވެ. އެހެންވެ، އެ ކަންކަމުން ކުރިމަތިވި ހާސްކަމުން އަރައިގަނެ، ވީހާވެސް ވިސްނުންތެރިކަމާ އެކު ދެން ކުރިއަށްދާން ޖެހޭ ކަމަަށެވެ.
ސްވިޓްޒަލަންޑަކީ ވަރުގަދަ ޓީމެއް ކަމަށާއި މި ގްރޫޕްގެ އެއްވެސް މެޗެއް ފަސޭހަ ނުވާނެ ކަމަށް ކްލާކް ގަބޫލުކުރެ އެވެ.
ކްލާކް ބުނީ ސްކޮޓްލަންޑުން ފުރަތަމަ މެޗުގައި ދެއްކި ދަށް ކުޅުން ދެ ވަނަ މެޗުގައި ތަކުރާރުވާން އެ ޓީމުން އެއްގޮތަކަށް ވެސް ނޭދޭ ކަމަށެވެ. އެއީ ސްވިޓްޒަލަންޑް މެޗު ކާމިޔާބު ކުރަން ލިބޭ "މޯޓިވޭޝަނެއް" ކަމަށް ކްލާކް ދެކެ އެވެ.
ކްލާކް ބުނީ, ސްކޮޓްލެންޑުން ފަހު ދެ މެޗަށް ނުކުންނައިރު, އެ ޓީމުގެ ޓާގެޓަަކީ މި ދެ މެޗުން މަދުވެގެން ހަތަރު ޕޮއިންޓް ހޯދުން ކަމަށެވެ. އަދި އެކަން ހާސިލް ކުރެވޭ ފެންވަރު ސްކޮޓްލެންޑް ޓީމުގައި އެބަހުރި ކަމަށް ކްލާކް ގަބޫލުކުރެ އެވެ.
ސްކޮޓްލެންޑަށް އަދި ބޮޑު މުބާރާތެއްގެ ގްރޫޕް ސްޓޭޖު ފަހަނައަޅައި ނުދެވެ އެވެ.
ސްކޮޓްލެންޑާއި ސްވިޒަލެންޑް ކުޅޭ މެޗު ފަށާނީ މިރޭ 12 ޖަހާއިރު އެވެ.
