މާލޭ ސިޓީ ކައުންސިލްގެ ޑެޕިއުޓީ މޭޔަރަކަށް މާފަންނު މެދު ދާއިރާގެ ޕީޕީއެމްގެ މެމްބަރު އަހުމަދު ނަރީޝް މިއަދު އިންތިހާބު ކޮށްފި އެވެ.
ނަރީޝް އެ މަގާމަށް އިންތިހާބު ކުރީ ސިޓީ ކައުންސިލްގެ މެމްބަރުންގެ މެދުގައި ނެގި ސިއްރު ވޯޓަކުންނެވެ. ނަރީޝްއާ ވާދަކުރީ އެމްޑީޕީގެ ޓިކެޓުގައި މަންޗަންގޯޅީ މެދު ދާއިރާއަށް އިންތިހާބު ވެފައިވާ އަހުމަދު ޒަމީރެވެ. ނަރީޝަށް 12 ވޯޓް ލިބުނުއިރު އަހުމަދަށް ލިބުނީ ހަތް ވޯޓެވެ.
ޕީޕީއެމްގެ ޓިކެޓުގައި ސިޓީ ކައުންސިލަށް އިންތިހާބުވި 12 މެމްބަރުންގެ މެދުގައި އިއްޔެ ނެގި ސިއްރު ވޯޓުން ހޮވުނީ ނަރީޝް ޑެޕިއުޓީ މޭޔަރަކަށް ގެނައުމަށެވެ. ނަރީޝްއާ ވާދަ ކުރީ ހުޅުމާލޭ ދާއިރާގެ މެމްބަރު އިބްރާހިމް ޝުޖާއު އާއި ވިލިމާލޭ ދާއިރާގެ މެމްބަރު ނަހުލާ އަލީ އެވެ.
މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން އިންތިހާބު ކޮށްފައިވާއިރު އޭގެ ތެރެއިން 12 ގޮނޑި ކާމިޔާބު ކޮށްފައިވަނީ އިދިކޮޅު ކޯލިޝަން ޕީޕީއެމް/ޕީއެންސީ އިންނެވެ. އަދި ޖުމްހޫރީ ޕާޓީން ހޮވުނު މެމްބަރަކު ފަހުން ޕީޕީއެމާ ގުޅުމުން އެ ޕާޓީގެ 13 މެމްބަރުން ކައުންސިލްގައި ތިއްބަވަ އެވެ. ސިޓީ ކައުންސިލްގައި ތިއްބަވަނީ އެމްޑީޕީގެ ހަ މެމްބަރުންނެވެ.
އެންމެ ފަހުން ބޭއްވި ލޯކަލް ކައުންސިލްގެ އިންތިހާބުގައި އިދިކޮޅު ޕީޕީއެމުން ވަނީ މާލޭގެ މޭޔަރުގެ މަގާމާއެކު ފުރަތަމަ ފަހަރަށް މާލޭގެ މެޖޯރިޓީ ހޯދައިފަ އެވެ.
