ރުގްޔާ ކުރުމުގެ ނަމުގައި ބައެއް މީހުން ނާޖާއިޒު ފައިދާ ނަގަމުންދާ މައްސަލަ އިތުރުވަމުންދާތީ އެކަން ރެގިއުލޭޓް ކުރުމަށް ސަރުކާރުގެ އިދާރާތަކާއެކު ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން މަޝްވަރާ ކުރަން ފަށައިފި އެވެ.
ރުގްރާ ކުރުން ރެގިއުލޭޓް ކުރުމަށް އެޗްއާރްސީއެމްގެ ފަރާތުން މިއަދު ކޭސް ކޮންފަރެންސެއް ބާއްވައި ޖެންޑާ މިނިސްޓްރީ އާއި އިސްލާމިކް މިނިސްޓްރީ އަދި ފުލުހުންނާއެކު ވަނީ މަޝްވަރާކޮށްފަ އެވެ.
އެޗްއާރްސީއެމްގެ މެމްބަރު އައިމިނަތު ޝިފާތު އަބްދުއްރައްޒާގު މި ނޫހާ ވާހަކަ ދައްކަވަމުން ވިދާޅުވީ ރެގިއުލޭޓް ކުރުމުން ރުގްޔާ ކުރުމުގެ ނަމުގައި އަނިޔާ އާއި އިޖްތިމާއީ ކުށްތައް ކުރާ މިންވަރު ދަށް ކުރެވޭނެ ކަމަށް ގަބޫލު ކުރެއްވޭ ކަމަށެވެ.
"މި ކޮމިޝަނަށް ހުށަހަޅާފައިވާ ބައެއް މައްސަލަތަކުގައި ފާހަގަ ކުރެވޭ ރުގްޔާ ކުރުމުގެ ނަމުގައި ކުޑަކުދިންނާއި އަންހެނުންނަށް އަނިޔާ ދޭ މައްސަލަ. އަދި މީގެ އިތުރުން ސަހަރާ ކޮނުން ފަދަ އިޖްތިމާއީ މައްސަލަތަކެއް ވެސް އެބަހުރި،" ޝަފާތު ވިދާޅުވި އެވެ.
ރުގްޔާ ކުރުމުގެ ނަމުގައި އެކި ކަހަލަ އަނިޔާ ކުރާ މައްސަލަ އަބަދުވެސް ރާއްޖޭގައި ފެންމަތިވެ އެވެ. މިފަދަ މައްސަލަތަކުގެ ޝިކާރައަކަށް ގިނަފަހަރު ވަނީ އަންހެނުންނާއި ކުޑަކުދިންނެވެ. އަދި ފެންމަތިވާ ގިނަ މައްސަަލަތަކުގައި އަންހެނުންނާއި ކުޑަކުދިންނަށް ހުންނީ ޖިންސީ އަނިޔާކޮށްފަ އެވެ.
ރުގްޔާ ކުރުމުގެ ނަމުގައި އުމުރުން 30 އަހަރުގެ އަންހެނަކާއި އޭނާގެ ހަތް އަހަރުގެ ކުޑަ ދަރިއެއް ގޭގައި ތިން މަސް ވަންދެން ބަންދުކޮށް ލާއިންސާނީ ތަފާތު އަނިޔާތަކެއް ދިން މައްސަލައެއް މިދިޔަ ޑިސެމްބަރު މަހު ވަނީ ފެންމަތިވެފަ އެވެ.
"ރ. ދުވާފަރުގައި ރުގްޔާ ކުރުމޭ ކިޔައިގެން ކުރީ ޖިސްމާނީ އަދި ޖިންސީ އަނިޔާ! ރުހުމާނުލައި ގަޔަށް އަތްލައިގެން 'ފަރުވާ' ކުރުމަކީ ދީނެއްވެސް ގާނޫނެއް ވެސް ދަންނަ ކަމެއް ނޫން. މިމައްސަލައިގައި ޖިންސީ ކުށުގެ ގާނޫނާއި ކުޑަކުދިންނަށް ޖިންސީ ގޯނާ ކުރުމުގެ ގާނޫނުގެ ދަށުން ދައުވާ ކޮށްފިން،" އެ މައްސަލައިގައި ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެފައިވެ އެވެ.
އޭގެ އިތުރުން ރުގްޔާ ކުރުމުގެ ނަމުގައި އޮޅުވާލައިގެން ވަރަށް ގިނަ ބަޔަކަށް އެކި ކަހަލަ ގެއްލުން ދެމުން އައި މީހަކު ފުލުހުން ވަނީ އަތުލައިގަނެފަ އެވެ. އޭނާގެ ނަމާއި ފޮޓޯ އާންމުކޮށް ޝިކާރައަކަށްވެފައިވާ މީހުން ހޯދުމުގެ މަސައްކަތް ވެސް ފުލުހުން ކުރި އެވެ.
