ކޮވިޑް ބަލިމަޑުކަމުގައި އިގުތިސާދަށް އައިސްފައިވާ ހީނަރުކަމުގެ ސަބަބުން އަންނަ އަހަރުގެ ނިޔަލަށް ދައުލަތުގެ އާމްދަނީން 36 ބިލިއަން ރުފިޔާ ނުވަތަ 2.3 ބިލިއަން ޑޮލަރު ގެއްލުން ވާނެ ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
ދައުލަތުގެ މާލިއްޔަތު ގަވާއިދަށް ކައުންސިލަރުން އަހުލުވެރިކުރަން މިހާރު ކުރިޔަށްދާ ޕްރޮގްރާމްގައި ކައުންސިލަރުންނަށް މައުލޫމާތު ދެއްވަމުން އަމީރު ވަނީ ބަލިމަޑުކަމުގެ ސަބަބުން ދައުލަތުގެ އާމްދަނީ ހީނަރުވެފައިވާ ދަނޑިވަޅެއްގައި ހަރަދަށް ސަމާލުވުމާ ގުޅޭގޮތުން ވާހަކަ ދައްކަވާފަ އެވެ.
ދައުލަތުގެ މި އަހަރުގެ މީޑިއަމް ޓާމް ފިސްކަލް ސްޓްރެޓަޖީއާ ހަވާލާދީ މިވަރުގެ ބޮޑު ގެއްލުމެއް ވާނެ ކަމަށް ލަފާކުރެވޭއިރު އަމީރު ވިދާޅުވީ، ސަރުކާރުގެ މެދު ރާސްތާގެ އެންމެ ބޮޑު އާމާޒަކީ ކޮވިޑުގެ ސަބަބުން އިތުރުވި ދަރަނި ކުޑަކުރުން ކަަމަށެވެ.
އަދި މިކަމަށް ފަހިކުރަން ކައުންސިލްތަކުން ހަރަދުތައް މެނޭޖް ކުރުމަށާއި ކުރާ ހަރަދުން ލިބޭ މަންފާ އިތުރުކުރަން މަސައްކަތް ކުރަން ޖެހޭ ކަމަށް ވިދާޅުވި އެވެ.
"2020 އިން ފެށިގެން 2022 ނިޔަލަށް, މި ޕެންޑެމިކްގެ ސަބަބުން ދައުލަތުގެ އާމްދަނީއަށް 36 ބިލިއަން ރުފިޔާގެ ގެއްލުމެއް ވާނެ. އެއީ ގާތްގަނޑަކަށް 2.3 ބިލިއަން ޑޮލަރުގެ ގެއްލުމެއް. އެހެންކަމުން މި ގެއްލުމުން އަންނަ ލޮޅުން ކުޑަކުރުމަށް ހަރަދުތައް ކުޑަކުރަންޖެހޭ. އަދި ކޮންމެ ހަރަދަކުން ލިބޭ މަންފާ އިތުރުކުރަން ޖެހޭ." އަމީރު ވިދާޅުވި އެވެ.
ދަރަނި ކުޑަކުރަން ކުރަންޖެހޭ ކަންކަމާ ގުޅޭ ގޮތުން އަމީރު ވިދާޅުވި ގޮތުގައި ޖީޑީޕީގެ ނިސްބަތުން ދަރަަނި ކުޑަކުރަން އިގްތިސާދު ސިންދަފާތުކޮށްގެން ގައުމީ އުފެއްދުންތެރިކަން އިތުރުކުރަން ކުރިއަރުވައި ފިސްކަލް ކޮންސޮލިޑޭޝަން ގެންނަން ޖެހެ އެވެ. އަދި އަންނަ އަހަރު ދައުލަތުން ފާސްކުރާ ބަޖެޓުގެ އަމާޒަކީ މިއީ ކަމަށް ވިދާޅުވި އެވެ.
"މި ޕެންޑެމިކް އާއި ގުޅިގެން އިތުރުވި ދަރަނި އުފެއްދުންތެރިކަމުގެ ނިސްބަތުން ވީ އެންމެ އަވަހަކަށް ކުޑަކުރުމަކީ މެދުރާސްތާގައި ފިނޭންސް މިނިސްޓްރީގެ އެންމެ ބޮޑު އަމާޒު. މިކަން އަޅުގަނޑުމެންނަށް ކުރެވޭނީ އިޤްތިސާދު ސިންދަފާތުކޮށް ވީ އެންމެ އަވަހަކަށް ގައުމީ އުފެއްދުންތެރިކަން ކުރިއަރުވައި އަދި ފިސްކަލް ކޮންސޮލިޑޭޝަން ގެނެވިގެން." އަމީރު ވިދާޅުވި އެވެ.
ފިނޭންސް މިނިސްޓްރީން ދައުލަތުގެ މާލީ ހާލަތާ ގުޅޭގޮތުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި މި އަހަރު ދައުލަތަށް ލިބޭނެ ކަމަށް ލަފާކުރި އަދަދަށް އާމްދަނީ ލިބޭނެ ކަމަށް ވަނީ ބުނެފަ އެވެ. އަދި ކޮވިޑުގެ ނަމްބަރުތައް އުފުލުމާއި އެހެން ސަބަބުތަކާ ހުރެ ރާއްޖޭގެ ޓޫރިޒަމް މަޑުޖެހިފައި އޮތް ނަމަވެސް، އަހަރުގެ ފަހުކޮޅު ގިނަ ފަތުރުވެރިންތަކެއް އަންނާނެ ކަމަށް ބެލެވޭ ކަމަށް ބުންޏެވެ.
ދައުލަތުގެ އާމްދަނީ އިތުރުކުރަން ސަރުކާރުން ކުރަމުން އަންނަ މަސައްކަތްތަކުގެ ތެރޭގައި ކޮމިއުނިކޭޝަންސް ސާވިސް ޕްރޮވައިޑަރަކަށް ލައިސަންސް ދިނުމާއި، ސަރުކާރުގެ ބައެއް ކުންފުނިތަކުގެ ހިއްސާ ވިއްކުމާއި ޕްރައިވެޓައިޒް ކުރުމުގެ މަސައްކަތް އަދި ރިއަލް އެސްޓޭޓް ޓޫރިޒަމް ފެށުން ހިމެނެ އެވެ.
މި އަހަރުގެ ތެރޭގައި މީގެ ތެރެއިން ގިނަ ކަންކަން ތަންފީޒުކުރެވޭނެ ކަމަށް ފިނޭންސުން ބުނެ އެވެ.
