ގްލާސްގޯ، ސްކޮޓްލެންޑް (ޖޫން 18) - ޔޫރޯ ފުޓްބޯޅަ މުބާރާތުގައި މިރޭ ޗެކް ރިޕަބްލިކާ 1-1 އިން އެއްވަރުވެ ކްރޮއޭޝިއާ އަށް މުބާރާތުގެ އަނެއް ބުރުން ފުރުސަތު ހޯދުމުގައި އުނދަގޫތަކެއް ދިމާވެއްޖެ އެވެ.
ކުޅުނު ފުރަތަމަ މެޗުން ކްރޮއޭޝިއާ ވަނީ 1-0 އިން އިންގްލެންޑް އަތުން ބަލިވެފަ އެވެ. މިރޭ 1-1 އިން އެއްވަރުވިއިރު، ގްރޫޕްގެ ފަހު މެޗުގައި ސްކޮޓްލެންޑާ ދެކޮޅަށް ނަތީޖާ ނެރެގެން ނޫނީ އެ ޓީމަށް އަނެއް ބުރުން ފުުރުސަތު ނުލިބޭނެ އެވެ. އެ މެޗު އޮންނާނީ އަންނަ ބުދަ ދުވަހު އެެވެ.
ގްރޫޕް ޑީގެ އެއް ވަނައިގައި އޮތީ ދެ މެޗުން ހަތަރު ޕޮއިންޓާ އެކު ޗެކް ރިޕަބްލިކް އެވެ. ދެ ވަަނައިގައި އޮތް އިންގްލެންޑަށް އެއް މެޗުން ތިން ޕޮއިންޓް ލިބިފައިވާއިރު، ތިން ވަނައިގައި ކްރޮއޭޝިއާ އޮތީ ދެ މެޗުން އެއް ޕޮއިންޓާ އެކު އެވެ. އެންމެ ފުލުގައި އޮތް ސްކޮޓްލެންޑަށް އެއް މެޗު ކުޅުނުއިރު، އަދި ޕޮއިންޓެއް ނުލިބެ އެވެ. މިރޭ ސްކޮޓްލެންޑް އަތުން މޮޅުވެގެން އިންގްލެންޑަށް ދެ ވަނަ ބުރުގެ ޖާގަ ކަށަވަރުކުރެވޭނެ އެވެ.
ސްކޮޓްލެންޑްގެ ހެމްޕްޑެން ޕާކުގައި މިރޭ ކުޅުނު މެޗު ފަށައިގެން ޗެކް ރިޕަބްލިކުން ދިޔައީ ކްރޮއޭޝިއާ ފަހަތަށް ބާރުބޮޑުކުރަމުންނެވެ. މެޗުގެ ދެ ވަނަ މިނިޓްގައި ޗެކް ރިޕަބްލިކްގެ ތޯމަސް ސޫޗެކް ބޮލުން ޖެހި ބޯޅަ ދިޔައީ ހުރަސްދަނޑި މަތިންނެވެ.
ފުރަތަމަ 15 މިނިޓަށް ފަހު ކްރޮއޭޝިއާ އިން މެޗުގެ ތެރެއަށް ވަދެ ޗެކް ރިޕަބްލިކް ގޯލަށް އަމާޒުކޮށް ހަމަލާތައް ފޮނުވަން ފެށި އެވެ. އެ ގޮތުން އިވާން ޕެރިސިޗް ފޮނުވާލި ބާރުބޯޅަ ކީޕަރު ޗެކް ރިޕަބްލިކްގެ ކީޕަރު ތޯމަސް ވަސްލިޗް ވަނީ މަތަކޮށްފަ އެވެ.
ލަނޑު ޖެހުމަށް ފަހު ޝިކް (ވ) އެ ޓީމުގެ ކުުޅުންތެރިންނާ އެކު އުފާފާޅުކުރަނީ.
ޗެކް ރިޕަބްލިކުން ލީޑުނެގީ މެޗުގެ 37 ވަަނަ މިނިޓްގައި ޕެނަލްޓީ އަކުން ޕެޓްރިކް ޝިކް ޖެހި ގޯލުންނެވެ. މިއީ މި ފަހަރު ޔޫރޯގައި ޝިކް ޖެހި ތިން ވަނަ ގޯލެވެ. މި ޕެނަލްޓީ އަކީ ބޮލުން ޖަހަން އެރި ބޯޅައެެއްގައި ކްރޮއޭޝިއާގެ ޑިފެންޑަރު ޑޭޔާން ލޮވްރެން އަތުން ޝިކް ގައިގައި ޖެހުމުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ދިން ޕެނަލްޓި އެެކެވެ. އެ ޕެނަލްޓީ ދޭން ނިންމީ މެޗުގެ ރެފްރީ ސްޕެއިނުގެ ކާލޯސް ޑެލް ކޭރޯ ދަނޑުގައި ހުންނަ މޮނީޓަރުން ވެސް ޗެކް ކުރުމަށް ފަހު އެވެ.
ޗެކް ރިޕަބްލިކުން ލަނޑު ޖެހިތާ ކުޑަ އިރުކޮޅެއްގެ ތެރޭގައި ނަތީޖާ ހަމަހަމަކުރަން ކްރޮއޭޝިއާގެ އަންޓޭ ރެބިޗަށް މުޅިން ހުސް ފުރުސަތެއް ލިބުނެވެ. އޭރިއާތެރެއިން އޭނާ ޖެހި ބޯޅަ ކީޕަރު ވަސްލިޗް ވަނީ މަތަކޮށްފަ އެވެ.
ދެ ވަނަ ހާފްގެ ކުޅުން ފެށިތާ ދެ މިނިޓް ތެރޭ ޕެރިސިޗް ވަނީ ގޯލެއް ޖަހައި ކްރޮއޭޝިއާ އަށް ނަތީޖާ ހަމަހަމަކޮށްދީފަ އެވެ. މެޗުގެ 47 ވަނަ މިނިޓްގައި ޕެރިސިޗް މި ގޯލު ޖެހީ ގޯލުގެ މަތީ ކަނަށް ބޯޅަ އަމާޒުކޮށްލައިގެންނެވެ.
ނަތީޖާ އެއްވަރުވުމާ އެކު ދެން ދެ ޓީމުގެ ފަރާތުން ފެންނަން ފެށީ އަވަސް ކުޅުމެކެވެ. އަލުން ލީޑުނަގަން ޗެކް ރިޕަބްލިކްގެ ޝިކް އާއި ޔަކޫބް ޔަންޓޯ އަށް ލިބުނު ބޯޅަތަކުގައި އެންމެ ރަނގަޅަށް ބޭނުމެއް ނުކުރެވުނެވެ. ކްރޮއޭޝިއާ އަށް ބޯޅަ ލިބުމާ އެކު ޗެކް ރިޕަބްލިކް އިން ޑިފެންސްކުރަން ގިނަ ކުޅުންތެރިންގެ ބޭނުން ކުރަން ފެށި އެވެ.
މެޗުގެ 72 ވަނަ މިނިޓްގައި ޗެކް ރިޕަބްލިކްގެ އޭރިއާގެ ތެރެއިން ކްރޮއޭޝިއާގެ ނިކޮލަ ވްލަސިޗަށް ލިބުނު ފުރުސަތުން އޭނާ ފޮނުވާލި ބޯޅަ ދިޔައީ ހުރަސްދަނޑި މަތިންނެވެ. ވްލަސިޗް ކުޅެން އެރީ ދެ ވަނަ ހާފްގައި އަންދްރޭ ކްރަމަރިޗްގެ ބަދަލުގަ އެވެ.
މިރޭގެ ނަތީޖާއާ އެކު އެންމެ ފަހުން ޗެކް ރިޕަބްލިކާ ދެކޮޅަށް ކުޅުނު ހަތަރު މެޗުން ވެސް ނެދަލެންޑް ބަލިވެފައިނުވެ އެވެ. ފްރާންސްގައި 2016 ވަނަ އަހަރު ބޭއްވި ޔޫރޯގައި ވެސް ކްރޮއޭޝިއާ އާއި ޗެކް ރިޕަބްލިކް ވާދަކުރީ އެއް ގްރޫޕްގަ އެވެ. އެ ފަހަރު ދެ ޓީމު ކުޅުނު މެޗު ނިމުނީ 2-2 އިން އެއްވަރުވެގެންނެވެ.
ޗެކް ރިޕަބްލިކް މި ފަހަރުގެ މުބާރާތުގައި ދެން ކުޅޭ މެޗުގައި އަންނަ ބުދަ ދުވަހު ނުކުންނާނީ އިންގްލެންޑާ ދެކޮޅަށެެވެ. އެ މެޗު އެއްވަރުކޮށްލައިގެން ވެސް ޗެކް ރިޕަބްލިކަށް އަނެއް ބުރުގެ ޖާގަ ހޯދިދާނެ އެވެ. އެންމެ ފަހުން ބޭއްވި ޔޫރޯގައި ޗެކް ރިޕަބްލިކް ކެޓީ ގްރޫޕް ސްޓޭޖުންނެވެ.
