އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އެ ގާނޫނުގެ މަގުސަދުތަކާ ތައާރަޒުވާ ހަ ގާނޫނެއް އިސްލާހުކުރަން ނިންމައިފި އެވެ.
އެ ހަ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ފޮނުވުމުގެ ގޮތުން ބަންޑާރަ ނައިބުގެ އޮފީހުން ބިލެއް ތައްޔާރުކޮށް ވަނީ ރައީސް އޮފީހަށް ފޮނުވާފަ އެވެ.
ބަންޑާރަ ނައިބުގެ އޮފީހުން މައުލޫމާތު ދިން ގޮތުގައި އިސްލާހު ކުރަނީ ކަނޑުގައި ދުއްވާ އުޅަނދުތައް ދުއްވުމާބެހޭ ގާނޫނާއި ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނާއި ފަޅުރަށްރަށާބެހޭ ގާނޫނާއި ބިމާބެހޭ ގާނޫނާއި ދައުލަތުގެ މާލިއްޔަތުގެ އަދި އެއްގަމު ދަތުރުފަތުރުގެ ގަނޫނެވެ.
ހަ ގާނޫނަށް އިސްލާހު ގެންނަކަން ބަންޑާރަ ނައިބު އޮފީހުން ހާމަކުރި ނަމަވެސް، އިސްލާހު ކުރާ މާއްދާތަކުގެ ތަފްސީލެއް ނުދެ އެވެ.
ބަންޑާރަ ނައިބުގެ އޮފީހުން ހަ ގާނޫނެއް އިސްލާހުކުރާއިރު، އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ނުވަ ވަނަ އިސްލާހު ގެނައުމުގެ ގާނޫނަށް އަމަލުކުރަން ފެށި ތާރީހުން ފެށިގެން ހަ މަސް ދުވަހުގެ ތެރޭގައި އެ ގާނޫނާ ތައާރަޒުވާ ގޮތަށް ހުރި ގާނޫނުތައް އިސްލާހު ކުރަން ޖެހޭނެ ކަމަށް ބުނެފައިވެ އެވެ.
އެ އިސްލާހަށް އަމަލު ކުރަން ފަށާފައިވަނީ 23 ޑިސެންބަރު 2020 އެވެ.
