އިލެކްޝަންސް ކޮމިޝަންގެ ރައީސް އަހްމަދު ޝަރީފް މިއަދު އިސްތިއުފާ ދެއްވައިފި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އިލެކްޝަންސް ކޮމިޝަނަށް އައްޔަންކުރެއްވި ޝަރީފް މަގާމުން މި ވަކިވެވަޑައިގަތީ ކޮމިޝަންގެ ރައީސަކަށް ހުންނަވައި ތިން އިންތިހާބު ކުރިއަށް ގެންދެވުމަށް ފަހު އެވެ. އެއީ 2018ގެ ރިޔާސީ އިންތިހާބާއި 2019ގެ ރައްޔިތުންގެ މަޖިލީހުގެ އިންތިހާބުގެ އިތުރުން މިދިޔަ އެޕްރީލް މަހުގެ ތެރޭގައި ބޭއްވި ލޯކަލް ކައުންސިލް އިންތިހާބެވެ.
"ވޭތުވެދިޔަ ތިން އިންތިހާބުގައި އިހްލާސްތެރި އަމާނާތްތެރިކަމާ އެކު މަސައްކަތްކޮށްދެވުނު ކަމުގެ ހިތްހަމަޖެހުން ލިބުނު،" ޝަރީފް ކުރެއްވި ޓުވީޓެއްގައި ވިދާޅުވި އެވެ.
އޭނާ ވިދާޅުވި ގޮތުގައި އަދިވެސް ހުންނަވާނީ ރައްޔިތުންނަށް ހިދުމަތް ކުރެއްވުމުގަ އެވެ. ތަފްސީލަކަށް ވަޑައެއް ނުގަނެ އެވެ.
ޝަރީފް ނިންމަވައިގެން ހުންނެވީ ކައުންސިލް އިންތިހާބަށް ފަހު އިސްތިއުފާ ދެއްވުމަށެވެ. އެކަން "އަދަދު"އާ ހިއްސާކުރައްވަމުން އިންތިހާބުގެ ތެރޭގައި ވިދާޅުވެފައި ވަނީ ތިން އިންތިހާބު ކާމިޔާބުކަމާ އެކު ނިންމާލެވުމުން ކޮމިޝަނާ ދުރަށް ވަޑައިގެން އެހެން ދާއިރާއަކުން ހިދުމަތް ކުރައްވަން ބޭނުންފުޅުވާ ކަމަށެވެ.
ރާއްޖޭގައި މިހާތަނަށް އެންމެ ހައިޖާނު ބޮޑުވި 2018 ގެ ރިޔާސީ އިންތިހާބުގައި، ޝަރީފަށް ވަރަށް ބޮޑެތި ފާޑުކިއުންތަކެއް އަމާޒުވި އެވެ. ޚާއްސަކޮށް އޭނާ ސިޔާސީ މަސައްކަތް އެކުގައި ކުރެއްވި ޔާމީންގެ ޕީޕީއެމުންނެވެ.
އެ ޕާޓީން އަދިވެސް ތުހުމަތުކުރަނީ އިންތިހާބުގައި ޝަރީފް ގޯސްތަކެއް ހެއްދެވި ކަމަށެވެ. އެކަމަކު، އެކަން ތަކުރާރުކޮށް ދޮގު ކުރައްވަމުން ޝަރީފް ވިދާޅުވެފައި ވަނީ، އިންތިހާބުގައި ރައްޔިތުންގެ ނިންމުން ވަރަށް ސާފުކަމަށާއި އެއީ މިނިވަން އިންސާފުވެރި އިންތިހާބެއް ކަމަށެވެ.
ޝަރީފް އިސްވެ ހުންނަވައި އިންތިހާބު އޮޅުވާލާފައިވާ ކަމަށް ބުނެ ޕީޕީއެމުން ސުޕްރީމް ކޯޓަށް މައްސަލައެއް ވެސް ހުށަހެޅި އެވެ. އެކަމަކު، އެ މައްސަލަ ނިމުނީ އިލެކްޝަންސް ކޮމިޝަނާ އެއްކޮޅަށެވެ.
އިންތިހާބުތަކާއި ސިޔާސީ ޕާޓީތަކުގެ ބެލެނިވެރި ފަރާތް ކަމުގައިވާ އީސީގައި ތިއްބަވާނީ ފަސް މެމްބަރުންނެވެ. ޝަރީފް އިސްތިއުފާ ދެއްވުމުން މިހާރު ތިއްބަވާނީ ކޮމިޝަންގެ ނައިބު ރައީސް އިސްމާއިލް ހަބީބާއި އެ ކޮމިޝަންގެ ރައީސްކަން ކުރިން ކުރެއްވި ފުއާދު ތައުފީގާއި އަލީ ނަޝާތުގެ އިތުރުން ޑރ. މުހައްމަދު ޒާހިރެވެ.
