ޖާގަ: 67،000
ހުޅުވުނު ތާރީހު: 2019
ސިޓީ: ބުޑަޕެސްޓް، ހަންގޭރީ
ހަ ސަތޭކަ މިލިއަން ޑޮލަރު ހަރަދުކޮށް ހަންގޭރީގެ ބުޑަޕެސްޓްގައި އެޅި ޕުސްކަސް އެރީނާ ހުޅުވީ 2019 ވަނަ އަހަރު އެވެ. މިއީ މި ފަހަރުގެ ޔޫރޯގެ މެޗުތައް ހޯސްޓްކުރާ ސްޓޭޑިއަމްތަކުގެ ތެރެއިން އެންމެ ފަހުން އެޅި ދަނޑެވެ. މި ދަނޑަށް ޕުސްކަސް އެރީނާގެ ނަމުން ނަން ދިނީ ހަންގޭރީގެ ކުރީގެ މަޝްހޫރު ކުޅުންތެރިޔާ ފެރެންސް ޕުސްކަސް އަށް ހާއްސަ ކުރުމުގެ ގޮތުންނެވެ. މީގެ ކުރިން ވެސް މި ދަނޑު ކުރިން ހުރި ޑިޒައިނަށް ހުރިއިރު، ވެސް ނަން ދެވުނީ ޕުސްކަސްއާ ގުޅުވައިގެންނެވެ. ކުރީގެ ދަނޑު ތަޅާލައި އާ ދަނޑު އެޅިއިރު ވެސް ހަންގޭރީގެ ފުޓްބޯޅަ ފެޑެރޭޝަނުން ނިންމީ ޕުސްކަސް އަށް ދަނޑުގެ ނަން ހާއްސަކުރާށެވެ. މި ދަނޑަށް 67،000 މީހުންނަށް މެޗު ބަލަން އެއް ފަހަރާ ވަދެވޭއިރު، މި ފަހަރުގެ ޔޫރޯގައި އެންމެ ގިނަ ސަޕޯޓަރުން ވަންނަން ހުއްދަ ލިބޭ ގައުމުތަކުގެ ތެރޭގައި ހަންގޭރީ ހިމެނެ އެވެ. މި ފަހަރު ޔޫރޯގައި ހަންގޭރީގެ ދެ މެޗެއް މި ދަނޑުގައި ކުޅޭނެ އެވެ. އެއީ ހަންގޭރީން ފްރާންސާއި ޕޯޗުގަލްއާ ދެކޮޅަށް ކުޅޭ ދެ މެޗެވެ.
