މަސައްކަތު މާހައުލުގައި ކުރިމަތިވާ ޖިންސީ ފުރައްސާރައިގެ މައްސަލަތައް ނުބަލާތީ އަޑުއުފުލަން ރަސްފަންނު ސަރަހައްދަށް އެއްވި މަދު ބަޔަކާ ދެކޮޅަށް ފުލުހުން ހާލަތާ ނުބައްދަލު ބާރާ އެކު އަނިޔާވެރިކޮށް މުޒާހަރާ ރޫޅާލި މައްސަލައިގައި އަދިވެސް އެއްވެސް ފިޔަވަޅެއް އަޅާފައިނުވާތީ ކަންބޮޑުވުންފާޅުކޮށްފި އެވެ.
ކޮވިޑާ ގުޅިގެން ހެލްތު ޕްރޮޓެކްޝަން އެޖެންސީން އަޅާފައިވާ ރައްކާތެރިކަމުގެ ފިޔަވަޅެއްގެ ގޮތުން، ގިނަ ބަޔަކު އެއްވެ މުޒާހަރާކުރުން އޭރު އޮތީ މަނާކޮށްފަ އެވެ.
މިދިޔަ މެއި މަހުގެ އެއް ވަނަ ދުވަހު މުޒާހަރާކުރާ ސަރަހައްދަށް އެއްވެ އެކަން ހުއްޓުވަން ފުލުހުން އުޅުމުން މުޒާހަރާގެ ބައިވެރިން އެ ސަރަހައްދު ދޫކޮށް ނުދިޔައީ އެވެ.
އެހެންވެ ފުލުހުން ބާރުގެ ބޭނުންކުރީ އެވެ. މުޒާހަރާ ހުއްޓުވުމުގެ ތެރޭގައި ބައެއް މީހުންގެ ލޮލަށް އަމާޒުކޮށް ފުލުހަކު ޕެޕާ ސްޕްރޭ ޖެހި ވީޑިއޯއެއް ސޯޝަލްމީޑިއާގައި ވަނީ އާއްމުވެފަ އެވެ. މީގެއިތުރުން މުޒާހަރާގެ ތެރެއިން އަންހެނަކު ހައްޔަރުކުރުމުގެ ތެރޭގައި އޭނާއަށް ވަރަށް ބޮޑަށް އަނިޔާވާ ގޮތަށް އަމަލުކުރި މައްސަލައިގައި ވެސް ފުލުހުންނަށް ވަނީ ނުރުހުން އަމާޒުވެފަ އެވެ.
ފުލުހުންނާމެދު ޝަކުވާ ބޮޑުވެފައިވަނިކޮށް ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމް ވަނީ މުޒާހަރާ ރޫޅާލުމުގައި އަމަލުކޮށްފައިވާ ގޮތް ހޯމް މިނިސްޓަރުގެ އަރިހުން ސާފުކުރުމަށް ހުށަހަޅުއްވައިފަ އެވެ.
މި އަހަރުގެ ފުރަތަމަ ދައުރު ނިންމައި، މިވަގުތު މަޖިލިސް ޗުއްޓީގައި އޮތުމުން، މަޖިލީހުގެ އިދާރާ މެދުވެރިކޮށް މީކާއީލް އެދިވަޑައިގަންނަވާފައިވަނީ އިމްރާންގެ އަރިހުން ފަސް ސުވާލެއްގެ ޖަވާބު ލިޔުމުން ހޯއްދެވުމަށެވެ.
މިގޮތުން، ރޭގެ މުޒާހަރާ ރޫޅާލުމުގައި ހާލަތާ ނުބައްދަލު ބޭނުންކޮށްގެން އެއްވެސް ފުލުހަކާ މެދު ފިޔަވަޅެއް އަޅާފައިވޭތޯ އާއި، މުޒާހަރާ ކޮންޓްރޯލް ކުރަން ދިޔަ ފުލުހުންގެ ޔުނިފޯމުގައި ސާވިސް ނަންބަރު ފެންނަ ގޮތަށް ހަރުކޮށްފައިވޭތޯ އާއި އެ ފުލުހުންނަކީ އެކަށީގެންވާ ތަމްރީނު ލިބިފައިވާ ފުލުހުންތޯ ބަލަން ވެސް މީކާއީލް ވަނީ ހުށަހަޅުއްވައިފަ އެވެ.
ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމް މަޖިލީހުގެ ޖަލްސާއެއްގައި. -ފޮޓޯ: މަޖިލިސް
އެ ސުވާލަށް ހޯމް މިނިސްޓަރު ލިޔުމުން މިއަދު ދެއްވި ޖަވާބުގައި މުޒާހަރާގެ ކޮންޓްރޯލް ކުރުމުގައި ފުލުހުންގެ ދައުރު އަދާ ކުރި ގޮތުގެ މައްސަލައާ ގުޅޭ ތަހުގީގު ނިންމައިފައިވާ ކަމަށެވެ.
އަދި މިހާރު އޮތީ ޑިސިޕްލަނަރީ ބޯޑުން އެ މައްސަލައާމެދު ގޮތެއް ނިންމުމުގެ މަރުހަލާގައި ކަމަށެވެ.
އެ ޖަވާބާ ގުޅޭގޮތުން މީކާއީލް މިއަދު "އަދަދު"އަށް ވިދާޅުވީ، އެ ހާދިސާ ހިނގި ފަހުން މަހަކަށް ވުރެ ގިނަ ދުވަސްވެފައިވާއިރު، އަދި މިހާތަނަށް ފިޔަވަޅު ނޭޅި އޮތުމަކީ ގަބޫލުކުރަން ދަތި ކަމެއް ކަމަށެވެ.
"އެވަރުގެ ކަމެއް ތަހުގީގުކޮށް ފިޔަވަޅު އަޅަން އެކަށީގެންވާ ވަގުތު ހޭދަވެއްޖެ ކަމަށް އަޅުގަނޑަށް ގަބޫލުކުރެވެނީ. ފުލުހުންނާމެދު ފިޔަވަޅު އެޅުން ލަސްވުމަކީ އެ މުއައްސަސާއާ މެދު ޕަބްލިކް ކޮންފިޑެންސް [ރައްޔިތުންގެ އިތުބާރު] ގެއްލިގެންދާނެ ކަމެއް،" މީކާއީލް ވިދާޅުވި އެވެ.
އެއްވުން ރޫޅާލި ފުލުހުން ތިބީ ފުލުހުންގެ ހިދުމަތުގެ ގާނޫނުގައި ބަޔާން ކޮށްފައިވާ މިންގަނޑަށް ސާވިސް ނަންބަރު ފެންނަ ގޮތަށް ކަން ވެސް އިމްރާން ދެއްވި ޖަވާބުގައި ވިދާޅުވެފައިވެ އެވެ.
ނަމަވެސް، މުޒާހަރާ ރޫޅާލުމުގައި އެ ރޭ ހަރަކާތްތެރިވި 10 ފުލުހުންގެ ތެރެއިން ދެ ފުލުހަކު ޕަބްލިކް އޯޑާ ޓްރެއިނިން ފުރިހަމަކޮށްފައިނުވާކަމަށް އިމްރާންގެ ޖަވާބުގައި ވިދާޅުވެފައިވާއިރު، އެކަމާ ވެސް މީކާއީލް ކަންބޮޑުވުން ފާޅުކުރެއްވި އެވެ.
އެގޮތުން، މީކާއީލް ވިދާޅުވީ ޕަބްލިކް އޯޑާ ޓްރެއިނިން ފުރިހަމަކޮށްފައިނުވާ ފުލުހުން މުޒާހަރާތައް ކޮންޓްރޯލް ކުރަން ހަރަކާތްތެރިވުމަކީ ކަންބޮޑުވެވަޑައިގަންނަވާ ކަމެއް ކަމަށެވެ.
އެ މުޒާހަރާގެ ބައިވެރިންގެ އިތުރުން، މުޒާހަރާ ކަވަރުކުރުމުގައި އުޅުނު ނޫސްވެރިންނަށް ހުރަސްއަޅައި ބައެއް ނޫސްވެރިންނާ ދިމާލަށް ފުލުން ހަޑިހުތުރު ބަހުން މުއާމަލާތު ކުރި މައްސަލަ ނޫސްވެރިންގެ ޖަމިއްޔާ އާއި މީޑިއާ ކައުންސިލުން ވަނީ ކުށްވެރިކޮށްފަ އެވެ.
