ގެއްލިގެން ހޯދަމުންދާ ހދ. ނޮޅިވަރަންފަރު، މޯނިންސަން، މިސްބާހު މުހައްމަދު ޑްރަގް ނެޓްވޯކަކުން ރަހީނުކޮށްފައި ހުރި ކަމަށް ބެލެވޭ ކަމަަށް ފުލުހުން ބުނި ވާހަކަ އޭނާ ދޮގުކޮށްފި އެވެ.
މިދިޔަ މަހުގެ 14 އިން ފެށިގެން ހޯދަން އިއުލާންކޮށްފައިވާ މިސްބާހުގެ ވީޑިއޯއެއް ސޯޝަލްމީޑިއާގައި މިއަދު ވަނީ ދައުރުވެފަ އެވެ. އޭނާ ގެއްލިގެން ހޯދަން ފެށީ އާއިލާ އިން ރިޕޯޓްކުރުމުންނެވެ.
ފުލުހުން ބުނެފައިވާ ގޮތުގައި މިސްބާހް މިދިޔަ ނޮވެމްބަރު މަހުގެ 11 ވަނަ ދުވަހުގެ ރޭ ފްލައި ދުބާއީގެ ފްލައިޓަކުން އެ ގައުމަށް ފުރާފައިވާކަން އިމިގްރޭޝަންގެ ރެކޯޑްތަކުން ދައްކަ އެވެ. އޭނާ ދުބާއީއަށް ދިޔައީ ފުޅާދާއިރާއެއްގައި ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރި ކުރާ ނެޓްވޯކްތައް ރާއްޖޭގައި ހިންގި، ސ. ހުޅުދޫ، ދޭލިޔާގެ، އިރުފާން ތަގިއްޔުއާ އެކުގައި ކަމަށް ވެސް ފުލުހުން ބުނެ އެވެ.
ފުލުހުން ބުނެފައިވާ ގޮތުގައި މިސްބާހް ހުރީ ޑްރަގް ނެޓްވޯކަކުން ރަހުނުކޮށްފައި ކަމަށް ބެލެވެ އެވެ.
އެކަމަކު ދައުރުވަމުންދާ ވީޑިއޯގައި މިސްބާހް ބުނީ ޑްރަގް އެއްވެސް ނެޓްވޯކަކާ އޭނާއާ ގުޅުމެއް ނެތް ކަމަށެވެ.
"އަހަންނޭ ކިޔައިގެން ފުލުހުން އެ ހަދަނީ ހުސް ދޮގު،" ކުރު ވީޑީއޯގައި އޭނާ ބުންޏެވެ.
ވީޑިއޯ އިން ފެންނަނީ މިސްބާހް ކަން ކަށަވަރުކޮށްދެމުން ފުލުހުން ބުނީ އޭނާއާ ގުޅޭ ގޮތުން ކުރިން ހިއްސާކޮށްފައި ވަނީ ފުލުހުންނަށް ކަށަވަރުކުރެވޭ މައުލޫމާތު ކަމަށެވެ. އެ ވީޑިއޯއާ ގުޅޭ ގޮތުން ބަލަން ޖެހޭ ކަންކަން ބަލަމުން އަންނަ ކަމަށް ވެސް ވިދާޅުވި އެވެ.
މިސްބާހާ އެކު ދުބާއީއަށް ދިޔަ އިރުފާން ތަގިއްޔު މިދިޔަ ޑިސެމްބަރު އަށް ވަނަ ދުވަހު "މަސްޖަރީ-2" ނަމަކަށް ކިޔާ ދޯނީގައި ކަނޑުމަގުން ރާއްޖެއަށް 72 ކިލޯއަށްވުރެ ގިނަ މަސްތުވާތަކެތި އެތެރެކުރި ކަމުގެ ތުހުމަތުގައި ފުލުހުން ހައްޔަރުކުރި އެވެ.
"އިރުފާން ތަގިއްޔު އާއި މިސްބާހް މުހައްމަދު ދުބާއީއަށް ފުރުމަށްޓަކައި ވެލާނާ އިންޓަނޭޝަނަލް އެއާޕޯޓަށް ގޮސްފައިވަނީ، 72 ކިލޯގެ މަސްތުވާތަކެތި ފެނުނު، އިރުފާން ތަގިއްޔު ދުއްވާ ކާރެއް ކަމަށްވާ "AB1B P1939" ގަ އެވެ." ފުލުހުން ބުނެފައިވެ އެވެ.
އިރުފާން ތަގިއްޔު ނޮވެމްބަރު 22 ވަނަ ދުވަހު އެނބުރި ރާއްޖެ އައިސްފައި ކަމަށާއި ނަމަވެސް، އިރުފާން ތަގިއްޔުއާއެކު މިސްބާހް އައިސްފައެއް ނުވާ ކަމަށް ވެސް ފުލުހުން ބުންޏެވެ. އަދި، މިސްބާހް ނޮވެމްބަރު 23 ވަނަ ދުވަހު ފްލައި ދުބާއީގެ ފްލައިޓަކުން ދުބާއީ އިން ޕާކިސްތާނަށް ފުރާފައިވާކަން ތަހުގީގުގައި ހޯދިފައިވާ މައުލޫމާތު ތަކުން އެނގޭ ކަމަށް ފުލުހުން ބުނެފައިވެ އެވެ.
އެހެންކަމުން، މިސްބާހް ޕާކިސްތާނަށް ގޮސްފައިވަނީ، ރާއްޖެ އެތެރެކޮށްފައިވާ މަސްތުވާތަކެތީގެ ފައިސާގެ ކަންކަން ނިމެންދެން، އިރުފާނަށް މަސްތުވާތަކެތި ފޮނުވާފައިވާ ރާއްޖެއިން ބޭރުގެ މަސްތުވާތަކެތީގެ ނެޓްވޯކްގެ ބެލުމުގެ ދަށުގައި "ގެރެންޓާ" އެއްގެ ގޮތުގައި ހުރުމަށް ކަމަށް ބެލެވޭ ކަމަށް ފުލުހުން ބުންޏެވެ.
