ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެއަށް ސެކިއުރިޓީ ދިނުމުގެ ތަފްސީލީ މައުލޫމާތު "މިހާރު" ނޫސް މެދުވެރިކޮށް އެމްއެންޑީއެފުން ހާމަކުރީ ވަކި "ޕްރޮޕެގެންޑާ"އެއްގެ ދަށުން ހަމަލާގެ މިސްރާބު އަނބުރާލަން ކަމަށް މަޖިލީހުގައި ބައެއް މެމްބަރުން މިއަދު ތުހުމަތުކުރައްވައިފި އެވެ.
"ކެނެރީގޭގައި ސެކިއުރިޓީ ނުދެވޭނެ ކަމާއި ނުރައްކާ އޮތް ކަން ނަޝީދަށް އެމްއެންޑީއެފުން އެންގި" މި ސުރުހީގެ ދަށުން "މިހާރު" ނޫހުގައި ލިޔެފައިވާ ލިޔުމުގެ މައްސަލަ ވަރަށް ބޮޑަށް ހޫނުވެފައިވާއިރު، އެ މައްސަލަ މިހާރު އަންނަނީ މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ބަލަމުންނެވެ.
ނަމަވެސް، އެކަމާ މެދު މަޖިލީހުގެ ގިނަ މެމްބަރުންގެ ކަންބޮޑުވުން އޮތުމުން، ރިޔާސަތުން ވަނީ މަޖިލީހުން ރައީސްގެ މޭޒުން ހުށަހަޅާ ކަމެއްގެ ގޮތުގައި އެ މައްސަލަ މިއަދުގެ ޖަލްސާއަށް ހުށަހަޅުއްވައިފަ އެވެ.
އެ މައްސަލާގައި ކުރިއަށްދާ ބަހުސްގައި ގަލޮޅު ދެކުނު ދާއިރާގެ މެމްބަރު މީކާއީލު އަހުމަދު ނަސީމް ވިދާޅުވީ މަޖިލީހުން އެކަމާ މެދު ކަންބޮޑުވުންފާޅުކުރުމުން މުޅި މައްސަލަ އެހެން މިސްރާބަކަށް އަނބުރާލަން މަސައްކަތް ކުރަމުންދާ ކަމަށެވެ.
އެގޮތުން، ނޫސްވެރިކަމުގެ މިނިވަންކަމަށް އަރައިގަތުމަށް މަޖިލީހުން އުޅޭކަމުގެ ނުބައި ތަސައްވުރެއް ފަތުރަމުންދާ ކަމަށް އޭނާ ތުހުމަތުކުރެއްވި އެވެ.
"އަޅުގަނޑުމެން މިއުޅެނީ ނޫސްވެރިކަމުގެ ހައްގަށް އަރައިގަންނާކަށް ނޫން. އެ ނޫސްވެރިޔާގެ މަސްދަރު ހާމަކުރަން މަޖުބޫރު ކުރާކަށް ވެސް ނޫޅޭ. މިއުޅެނީ ދިފާއީ ބާރުގެ ތެރެއިން ރައްކާތެރިކަމަށް ހުރަސްއެޅޭ ގޮތަށް މައުލޫމާތުތަކެއް ހާމަކޮށްގެން އުޅޭތީ،" މީކާއީލު ވިދާޅުވި އެވެ.
އަދި ރައީސް ނަޝީދުގެ ސަލާމަތާއި ރައްކާތެރިކަމަށް ސީދާ ހުރަސްއެޅޭ ގޮތަށް އެމްއެންޑީއެފްގެ ތެރެއިން ސިއްރު މައުލޫމާތުތަކެއް ހާމަކުރި މައްސަލަ ބެލި، އެކަން ކުރި ބަޔަކު ދިފާއީ ބާރުގެ ތެރެއިބް ދުރުކުރެވެންޖެހޭ ކަމަށް އޭނާ ގޮވާލެއްވި އެވެ.
ރާއްޖޭގައި އެންމެ ތުރެޓު ބޮޑު އެއް ބޭފުޅަކަށް ސެކިޔުރިޓީ ދޭ ފަރާތުގެ ހައިސިއްޔަތުން ކަމަށް ބުނެ، ފިލައި ތިބެ އެ މައުލޫމާތު ހާމަކުރުން މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ހަރުކަށި އިބާރާތުން ކުށްވެރި ކުރެއްވި އެވެ.
އެކަން ކޮށްފައިވަނީ "ޕްރޮޕެގެންޑާ"އެއްގެ ދަށުން ކަމަށް ތުހުމަތުކުރައްވައި، އިންތި ވިދާޅުވީ ނަޝީދު އަވަހާރަކޮށްލަން ޓެރަރިސްޓު ހަމަލާ ވެސް ދެވުނީ ދިފާއީ ބާރުގެ ތެރެއިން ލީކުވި މައުލޫމާތަކުން ކަމަށް މިހާރު ޝައްކު އުފެދޭ ކަމަށެވެ.
"މިއީ ގުޅިގެން އެތެރޭން ހިންގި ބޮޑު ޕްރޮޕެގެންޑާއެއްގެ ގޮތުގައި އަޅުގަނޑަށް ފާހަގަކުރެވެނީ،" އިންތި ވިދާޅުވި އެވެ.
އިތުރަށް ވިދާޅުވީ އެ ޕްރޮޕެގެންޑާ ދަށުން ހާމަކުރި މައުލޫމާތު ނޫހުގައި ޝާއިއުކުރުމުން މިހާރު ވެސް ބޮޑެތި ޒަހަމްތަކެއް ލިބިވަޑައިގެން ފަރުވާ ހޯއްދަވަމުން ގެންދަވާ ރައީސް ނަޝީދު އިތުރަށް "ވިކްޓިމައިޒް"ވެފައިވާ ކަމަށެވެ.
އަދި މިފަދަ ބޮޑު މައްސަލައެއް ފެންމަތިވެގެން އުޅޭއިރު، ސަލާމަތީ ހިދުމަތްތަކުން މިހާތަނަށް އެއްވެސް ބަހެއް ބުނެފައިނުވާތީ ވެސް އިންތި ވަނީ ކަންބޮޑުވުންފާޅު ކުރެެއްވި އެވެ.
ހެންވޭރު ހުޅަނގު ދާއިރާގެ މެމްބަރު އަދި އެމްޑީޕީގެ ޗެއާޕާސަން ހަސަން ލަތީފް ވެސް ވިދާޅުވި ގޮތުގައި ނަޝީދަށް ރައްކާތެރިކަން ދެމުންދާ ފަރާތަކުން އެފަދަ ތަފްސީލީ މައުލޫމާތެއް ހާމަކުރުމަކީ އެއްވެސް ގޮތަކަށް ހިނގައިގެން ވާނެ ކަމެއް ނޫނެވެ.
އެގޮތުން، އެ އާޓިކަލްގައި ދިފާއީ ބާރުގެ ތެރޭގައި ތިބި ބަޔަކަށް ނޫނީ ނޭނގޭނެ މައުލޫމާތުތަކެއް ހިމަނާފައިވާކަން އޭނާ ފާހަގަކުރެއްވި އެވެ.
"ރައީސް ނަޝީދަށް އެރުވި ސެކިޔުރީ ބްރީފްތަކުގަ މައުލޫމާތު އެހެރީ އާޓިކަލްގައި ޝާއިއުކޮށްފަ. އެ މައުލޫމާތު ނޫހަށް ދިނީ އާއްމުންގެ މީހެއް ކަމަކަށް ގަބޫލެއް ނުކުރެވޭ،" ހަސަން ލަތީފް ވިދާޅުވި އެވެ.
އިންތި ވިދާޅުވި ގޮތަށް އެކަމާމެދު ދިފާއީ ބާރުން މިހާތަނަށް އެއްވެސް އެއްޗެއް ނުބުނާތީ ހަސަން ލަތީފް ވެސް ކަންބޮޑުވުންފާޅު ކުރެއްވި އެވެ.
ތުޅާދޫ ދާއިރާގެ މެމްބަރު ހިސާން ހުސެއިން ވިދާޅުވީ ރައީސް ނަޝީދުގެ އިތުރުން އެމަނިކުފާނުގެ އާއިލާ ވެސް ދިރިއުޅުއްވާ ގެކޮޅާ ގުޅޭ އެހާ ތަފްސީލީ މައުލޫމާތެއް ހާމަވުމަކީ އެބޭފުޅުންގެ ފުރާނައަށް ވެސް ނުރައްކާވާ ފަދަ އަމަލެއް ކަމަށެވެ.
ހިސާން ވިދާޅުވި ގޮތުގައި، ދިފާއީ ބާރުގެ ތެރޭގައި ހުންނަ އެއްވެސް ސިއްރު މައުލޫމާތެއް ހާމަވުމަކީ ގައުމީ ސަލާމަތަށް ނުރައްކަލެއް އޮންނާނެ ކަމެއް ކަމަށާއި، އެ މައްސަލަ 241 ކޮމިޓީން ނިންމީ ވެސް އެ ސަބަބަށްޓަކައި ކަމަށެވެ.
"ނޫހެއްގެ ޖާނަލިސްޓެއް ހާޒިރުކޮށް އޭނާއަށް މައުލޫމާތުދިނީ ކާކުތޯ ބަލާކަށް ނޫން،" ހިސާން ވިދާޅުވި އެވެ.
އެކަމުގައި އެ ހަބަރުގެ މަސްދަރު ހާމަކުރަން ކޮމިޓީން މަސައްކަތްކޮށްފާނެތީ މޯލްޑިވްސް މީޑިޔާ ކައުންސިލް (އެމްއެމްސީ)ގެ އިތުރުން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން ވެސް ވަނީ ކަންބޮޑުވުންފާޅުކޮށްފަ އެވެ.
ނަމަވެސް، މަސްދަރު ހާމަކުރުވަން މަސައްކަތް ނުކުރާނެ ކަމުގެ ޔަގީންކަން 241 ކޮމިޓީގެ މުގައްރިރު މުހައްމަދު އަސްލަމް ވަނީ ދެއްވައިފަ އެވެ.
"މިހާރު" ނޫހުގެ އެ ހަބަރުގައި، ދިވެހި މީޑިއާގެ ހަމަތަކާއި އަހުލާގީ މިންގަނޑާއި ހިލާފަށް ހަބަރާއި މައުލާމާތު ހިމަނާފައިވޭތޯ ބަލަން މީޑިޔާ ކައުންސިލުން ވަނީ ނިންމައިފަ އެވެ.
