ކުރީގެ ރައީސް މުހައްމަދު ނަޝީދު ދިރިއުޅުއްވާ ގެކޮޅުގެ ސެކިއުރިޓީއާ ގުޅޭ ގޮތުން ރާއްޖޭގެ ނޫހަކުން ލިޔެފައިވާ ރިޕޯޓަކާ ގުޅިގެން ނަޝީދުގެ ރައްކާތެރިކަން ގެއްލުވާލާފައިވާ ކަމަށް ބުނެ އެ މައްސަލަ ބަލަން ރައްޔިތުންގެ މަޖިލީހުން މިއަދު ނިންމައިފި އެވެ.
އެ މައްސަލަ ބަލަން މަޖިލީހުގެ ސަލާމަތީ ކަންކަމާ ބެހޭ ކޮމެޓީން ނިންމީ "ކެނެރީގޭގައި ސެކިއުރިޓީ ނުދެވޭނެ ކަމާއި ނުރައްކާ އޮތް ކަން ނަޝީދަށް އެމްއެންޑީއެފުން އެންގި" ސުރުހީގެ ދަށުން "މިހާރު" ނޫހުގައި ލިޔެފައިވާ ރިޕޯޓަކާ ގުޅިގެންނެވެ. އެ ރިޕޯޓުގައި ނަން ނުޖަހަން ޝަރުތުކޮށް ވާހަކަ ދެއްކި މީހަކާ ހަވާލާދީ ނަޝީދުގެ ސެކިއުރިޓީ އާއި ކެނެރީގޭގެ ގިނަ މައުލޫމާތުތަކެއް ހިމަނާފައިވެ އެވެ.
މަޖިލީހުގެ 241 ކޮމެޓީން ނެރުނު ބަޔާނެއްގައި ބުނީ އެ ރިޕޯޓްގައި ނަޝީދަށް ހިމާޔަތާއި ރައްކާތެރިކަން ފޯރުކޮށްދިނުމުގެ ތެރޭގައި ލިބިފައިވާ މައުލޫމާތާއި އެ މަނިކުފާނު ދިރިއުޅުއްވާ ގެކޮޅުގެ ތަފްސީލީ މައުލޫމާތު ބަޔާންކޮށްފައިވާ ކަމަށެވެ. ރިޕޯޓަށް ދީފައިވާ މައުލޫމާތު ލިބިފައިވާނީ ސަލާމަތީ ބާރުތަކަށް އެކަނި ކަމަށް ބަޔާނުގައި ބުނެފައިވެ އެވެ.
އެފަދަ މައުލޫމާތަކީ އާންމުކޮށް ރާއްޖޭގެ ސަލާމަތާއި އަމަންއާންމު ރައްކާތެރިކުރުމުގެ ގޮތުން މައުލޫމާތު އެއްކުރުމުގެ ބާރާއި އިހުތިޔާރު ލިބިފައިވާ ބައެއްގެ އިން އެކަމަށް ހާއްސަކޮށްފައިވާ ބަޔަކު އެއްކުރާ މައުލޫމާތުތަކެއްކަމަށް މިކޮމިޓީން ދެކެމެވެ.-- ބަޔާން
ބަޔާނުގައި ބުނެފައިވަނީ އެ މައުލޫމާތު އެގޮތަށް އާންމު ވުމަކީ، ނަޝީދުގެ ހިމާޔަތާއި ރައްކާތެރިކަމާއި، ކެނެރީގޭގައި ދިރިއުޅުއްވާ އެމަނިކުފާނުގެ މުޅި އާއިލާގެ ރައްކާތެރިކަން ގެއްލިގެން ދާކަމެއް ކަމަށް ވެސް ކޮމެޓީން ދެކޭ ކަމަށެވެ.
އެ މައުލޫމާތު ނޫހާ ހިއްސާ ކޮށްފައި އެވަނީ ސިފައިން ކަމަށް ތުހުމަތުކޮށް އެފަދަ ކަމެއް ކުރުމަކީ ކުށެއް ކަމަށް ބަޔާނުގައި ބުނެފައިވެ އެވެ.
ސިފައިންގެ މަސްއޫލިއްޔަތާއި ވާޖިބު އަދާކުރުމުގައި ލިބޭ އެއްވެސް މައުލޫމާތެއް، ސިފައިންގެ ގާނޫނުގައި ބަޔާންކޮށްފައިވާ ފަރާތްތައް ފިޔަވައި އެ ނޫން އެއްވެސް ފަރާތަކަށް ހިއްސާކުރުމަކީ މަނާކަމެއްކަމާއި އެއީ ދިވެހިރާއްޖޭގެ ގާނޫނުލްއުގޫބާތުގެ ދަށުން ކުށެކެވެ. ބަޔާނުގައި ވަނީ އެކަން ފާހަގަ ކޮށްފަ އެވެ.
"މިމައްސަލައަކީ ގައުމީ ސަލާމަތާ ގުޅުންހުރި މައްސަލައަކަށްވެފައި، ސަލާމަތީ ހިދުމަތްތައް ހިނގާ ނުހިނގާ ގޮތް ބަލަމުން ގެންދިއުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 241 ވަނަ މާއްދާގެ ދަށުން މިކޮމިޓީގެ ދުސްތޫރީ ޒިންމާއަކަށް ވީހިނދު، މިކޮމިޓީއިން މިމައްސަލަ ބެލުމަށް ނިންމާފައިވާކަމުގައި ދަންނަވަން،" ބަޔާނުގައިވެ އެވެ.
"މިހާރު" ނޫހުގެ އެ ރިޕޯޓް އެމްޑީޕީން ވެސް ވަނީ ކުށްވެރި ކޮށްފަ އެވެ. އެއީ އެމަނިކުފާނަށް އިތުރަށް ފުރައްސާރައަކަށް ވާގޮތަށް ޕްރޮޕަގެންޑާ ފަތުރަން ކޮށްފައިވާ ކަމެއްގެ ގޮތުގައި އެ ޕާޓީން ސިފަ ކުރެ އެވެ.
ނަޝީދުގެ ސަލާމަތާ ބެހޭ ވާހަކަތައް ގިނަ ވެފައި މިވަނީ އެމަނިކުފާން އަވަހާރަކޮށްލުމަށް ޓެރަރިސްޓް ހަމަލާއެއް ދީފައި ވަނިކޮށެވެ. ގެއިން ނުކުންނަވައިގެން ކާރޮކޮޅަށް އަރާވަޑައިގަންނަވަން ދަނިކޮށް އައިއީޑީއެއް ގޮއްވައިލައިގެން ދިން އެ ހަމަލާގައި އެމަނިކުފާންގެ ފުރާނަ ސަލާމަތްވީ ކިރިޔާ އެވެ. ލިބުނު ގެއްލުންތަކަށް މިހާރު ވެސް އަންނަނީ ޖަރުމަނުން ފަރުވާ ހޯދަމުންނެވެ.
