މާލޭގައި ރޭ އެކްސިޑެންޓެއް ހިނގައި މީހަކު މަރުވެފައިވާއިރު، އެކްސިޑެންޓްވީ ސައިކަލް ދުއްވަން އިން މީހާ އަދިވެސް ނުހޯދޭ ކަމަށް ފުލުހުން މިއަދު ބުނެފި އެވެ.
އެކްސިޑެންޓްގައި މަރުވީ ސައިކަލް ފަހަތުގައި އިން އުމުރުން 22 އަހަރުގެ އިސްމާއިލް ޔަޒްދާން އަލީ އެވެ. އޭޑީކޭ ހޮސްޕިޓަލަށް އޭނާ ގެންދިޔައިރު ވެސް އޭނާ އޮތީ މަރުވެފަ އެވެ.
އެ އެކްސިޑެންޓް ހިނގީ ހުވަފެނީ ގޯޅީގައި ބާވާފައި އޮތް ގާޑިޔަލެއްގައި ބާރު ސްޕީޑުގައި ދުއްވާފައި ދިޔަ އެ ސައިކަލު ޖެހިގެންނެވެ. އެކްސިޑެންޓް ހިނގުމާ އެކު ސައިކަލް ދުއްވަން އިން މީހާ ވަނީ ސައިކަލް ދޫކޮށް ފިލައިފަ އެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ އެ މީހާ ހޯދުމުގެ މަސައްކަތް ކުރަމުން އަންނަ ކަމަށެވެ. އިތުރު ތަފްސީލެއް ނުދެ އެވެ.
މަންޒަރުދުށް މީހަކު "އަދަދު"އަށް ކިޔައިދިން ގޮތުގައި އެކްސިޑެންޓް ހިނގުމާ އެކު ސައިކަލް ދުއްވަން އިން މީހާ ފިލައިގެން ދިޔައީ އެވެ. މަރުވި މީހާ ހޮސްޕިޓަލަށް ގެންދިޔައީ އެ ހިސާބުގައި ތިބި މީހުން އެމްބިއުލާންސްއަށް ގުޅައިގެން ކަމަށް އޭނާ ބުންޏެވެ.
އެކްސިޑެންޓްގައި މަރުވި މީހާގެ ކަރަށް ބޮޑެތި އަނިޔާތަކެއް ލިބިފައިހުރި ކަމަށް މަންޒަރު ދުށް މީހަކު ބުންޏެވެ.
"ގާޑިޔާގެ ދަށުގައި އޭނަގެ ކަރު ވަދެފަ ވަރަށް ބޮޑަށް ފަޅައިގެން ދިޔަ ކަމަށް ވަނީ،" އެ ސަރަހައްދުގައި ހުރި މީހަކު ބުންޏެވެ.
މާލޭގައި ކާފިއު ހިންގާފައި ވަނިކޮށް އެކްސިޑެންޓް ހިނގާފައިވާއިރު، އެ ސައިކަލް ދުއްވީ ހުއްދަ އޮތް ބައެއް ކަމެއް ނުވަތަ ނޫން ކަމެއް އަދި ނޭނގެ އެވެ.
