ހުޅުމާލޭގައި ގާއިމްކޮށްފައިވާ ކޮވިޑު ފެސިލިޓީގައި ގިނަ ބަޔަކު މަރުވަމުންދާއިރު، އެތަނުގައި ފަރުވާ ދިނުމުގައި ހުރި ދަތިތައް ބަލައި ހައްލުކޮށްދިނުމަށް ސަރުކާރަށް ގޮވާލައި ހުށަހެޅި މައްސަލަ ރައްޔިތުންގެ މަޖިލީހުން މިއަދު ބަލައިގެންފި އެވެ.
އިދިކޮޅުގެ ފަރާތުން ނައިފަރު ދާއިރާގެ މެމްބަރު އަހުމަދު ޝިޔާމް ހުށަހެޅުއްވި މައްސަލާގައި ބުނެފައިވަނީ މި މަހުގެ ތެރޭގައި ކޮވިޑު ބަލީގައި 50 އަށް ވުރެ ގިނަ މީހުން މަރުވެފައިވާއިރު، އޭގެ ތެރޭގައި ނިސްބަތުން އުމުރުން ހަގު މީހުން ވެސް ހިމެނޭ ކަމަށެވެ.
އަދި އޭގެ ތެރެއިން ގިނަ މީހުން މަރުވީ ހުޅުމާލޭ ކޮވިޑު ފެސިލިޓީގައި ކަމަށްވާއިރު ފަރުވާދިނުމުގައި އުޅޭ ސިއްހީ ހިދުމަތްތެރިންނަށް ދަތިތަކެއް ކުރިމަތިވެފައިވޭތޯ ބަލައި، އެކަންކަން ހައްލުކުރަން އެޅޭނެ ފިޔަވަޅުތަކެއް ހުރިތޯ މަޖިލީހުގެ ކަމާގުޅޭ ކޮމިޓީން ދިރާސާކޮށް، އަވަސް ފިޔަވަޅުތަކެއް އެޅުމަށް ސަރުކާރަށް ގޮވާލައި ކަމަށް އެ މައްސަލާގައި ބުނެފައިވެ އެވެ.
ކޮވިޑު ހާލަތު ގޯސްވުމުގެ ސަބަބުން މިއަދު އޮންލައިންކޮށް ކުރިއަށް ގެންދާ ޖަލްސާގައި، އެ މައްސަލަ ބަލައިގެންފައިވަނީ އެ ވޯޓުގައި ބައިވެރިވެވަޑައިގެންނެވި މެމްބަރުން އިއްތިފާގުންނެވެ.
އެ މައްސަލަ މަޖިލީހަށް މިއަދު ވައްދާފައިވަނީ ފެސިލިޓީގައި ކެއިން ބުއިމާއި ސާފުތާހިރުކަން ކުޑަވުމާއި އަޅާނުލާ ކަމުގެ ޝަކުވާތައް އިތުރުވެފައިވާ ދަނޑިވަޅެއްގަ އެވެ.
އަދި އެތަނުގައި ބަލި މީހުންގެ އަދަދު އިންތިހާއަށް އިތުރުވެ، އެ މީހުންނަށް އެކަށީގެންވާ ގޮތެއްގައި ފަރުވާދެވޭނެ ސިއްހީ ހިދުމަތްތެރިން ނެތް ކަމުގެ ކަންބޮޑުވުން ދަނީ އިތުރުވަމުންނެވެ.
އެ މައްސަލަ ބަލައިގަތުމަށް ފަހު ކުރިއަށްދާ ބަހުސްގައި ޝިޔާމް ވިދާޅުވީ މި ބަލިމަޑުކަމުގެ ތެރެއިން ދެ ބިލިއަނަށް ވުރެ ގިނަ ރުފިޔާ ހަރަދުކޮށްފައިވާއިރު، ކޮވިޑު ފެސިލިޓީގައި އެންމެ އާދައިގެ ބޭސް ވެސް ލިބެން ނެތް ކަމުގެ ޝަކުވާ ލިބެމުންދާ ކަމަށެވެ.
އެތަނުގައި ތިބި ސިއްހީ ހިދުމަތްތެރިން ވަރުބަލިވެ، މުޅި ނިޒާމަށް ބުރޫ އަރާފައިވަނީ ސަރުކާރުގެ ނާގާބިލު ސިޔާސަތުތަކުގެ ސަބަބުން ކަމަށެވެ.
ވަކިން ހާއްސަކޮށް ކޮވިޑު ފެސިލިޓީގައި ތިބި ސިއްހީ ހިދުމަތްތެރިން ބަދުނާމުނުވާ ގޮތަށް އެތަނުގެ ވަސީލަތްތައް އިތުރުކޮށްދިނުމަށް ޝިޔާމް ވަނީ ގޮވާލައްވައިފަ އެވެ.
