ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާއާ ގުޅޭ މައުލޫމާތެއް އޮތް ނަމަ ހިއްސާކޮށްދޭން ސަލާމަތީ ހިދުމަތްތަކަށް ރައްޔިތުންގެ މަޖިލީހުން މިއަދު ހުޅުވާލައިފި އެވެ.
ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާ ކުރުމަށްފަހު މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ނިންމީ ހަމަލާދިން އިރު ރައީސް ނަޝީދަށް ދެމުންދިޔަ ސެކިޔުރިޓީ ބްރީޗުވި ގޮތުގެ އިންކުޔަރީއެއް، ބޭރުގެ މާހިރުންގެ އެހީތެރިކަމާއެކު އެންމެ ފުޅާމިނެއްގައި ހެދުމަށެވެ.
ތާރީހުގައި ފުރަތަމަ ފަހަރަށް މަޖިލީހުން ކޮމިޓީ މެދުވެރިކޮށް ކުރިއަށް ގެންދާ އިންކުޔަރީއަށް ސަލާމަތީ ހިދުމަތްތަކުގެ އިތުރުން ކަމާގުޅޭ އެހެން މުއައްސަސާތައް ހާޒިރުކޮށް ދަނީ މައުލޫމާތު ސާފު ކުރަމުންނެވެ.
އަދި ކަމާގުޅޭ ކުރީގެ އަދި މިހާރުގެ މާހިރުންގެ ލަފާއާއި އިރުޝާދު ވެސް ކޮމިޓީން ދަނީ ހޯދަމުންނެވެ.
އެކަމާ ގުޅިގެން މަޖިލީހުން މިއަދު ނެރުނު އިއުލާނެއްގައި ބުނީ އެ އިންކުޔަރީއަށް މައުލޫމާތު ހުށަހަޅަން ބޭނުންވާ ސިފައިންނާއި ފުލުހުންނަށް އެ ފުރުސަތު ހުޅުވާލާފައިވާ ކަމަށެވެ.
މިގޮތުން ކޮމިޓީގެ އިމެއިލް އެޑްރެހަށް ނުވަތަ ހާއްސަ މޮބައިލް ނަމްބަރު މެދުވެރިކޮށް މައުލޫމާތު ހިއްސާ ކުރެވޭނެކަމަށް ބުންޏެވެ.
"ކޮމިޓީއާ މައުލޫމާތު ހިއްސާކުރައްވާ ފަރާތްތަކުގެ މައުލޫމާތު، ސިއްރުކުރެއްވުމަށް އެދިވަޑައިގަންނަވާނަމަ، އެކަން ފާހަގަކުރެއްވުމުން، އެފަރާތްތަކުގެ މައުލޫމާތު ސިއްރު ކުރާނެކަމުގައި ދެންނެވީމެވެ،" އެ އިއުލާނުގައި ބުނެފައިވެ އެވެ.
އެ އިންކުޔަރީއާ ހިއްސާ ކުރާ މައުލޫމަތަކާ ގުޅިގެން މުވައްޒަފަކާ މެދު އެއްވެސް ފިޔަވަޅެއް ނޭޅުމަށް ކޮމިޓީން މީގެ ކުރިން ވަނީ އިލްތިމާސްކޮށްފަ އެވެ.
އެ ކޮމިޓީން މިވަގުތު ދަނީ އެކި ފަރާތްތަކުން މައުލޫމާތު އެއް ކުރަމުން ކަމަށާއި، އެކަމާ ގުޅޭ ފަރާތްތަކާ ސުވާލުކުރާނީ އެ ހުރިހާ މައުލޫމާތެއް ދިރާސާކޮށް ނިމުމުން ކަމަށް އެ ކޮމިޓީ މުގައްރިރު މުހައްމަދު އަސްލަމް މިއަދު ވަނީ ނޫސްވެރިންނަށް ވިދާޅުވެފަ އެވެ.
ކޮމިޓީގެ ރިޕޯޓު އަންނަ މަހުގެ ނިޔަލަށް ނިންމަން އަމާޒުހިފާފައިވާއިރު، މި އިންއަޔަރީގެ ތެރެއިން ކޮމިޓީން ފާހަގަކުރެވޭ މައްސަލަތަކާއި ރަނގަޅު ކުރަންޖެހޭ ހުރިހާ ކަމެއް ހުށަހެޅުންތަކުގެ ތެރޭގައި ރިޕޯޓުގައި ހިމެނިގެންދާނެ ކަމަށް ވެސް ވިދާޅުވި އެވެ.
އެމްޑީޕީގެ ގިނަ މަޖިލިސް މެމްބަރުން ވެސް ހިމެނޭ ގޮތަށް ގިނަ މެމްބަރުން ގެންދަވަނީ އެ ހަމަލާއާ ގުޅިގެން ސަލާމަތީ ހިދުމަތްތަކަށް ފާޑުކިޔުން އަމާޒު ކުރަމުންނެވެ.
ޓެރަރިޒަމްގެ ހަމަލާއާ ގުޅިގެން ނަޝީދުގެ ފުރާނަ ސަލާމަތްކުރަން އޭޑީކޭ ހޮސްޕިޓަލުގެ ޑޮކްޓަރުންގެ ހާއްސަ ޓީމަކުން ގިނަ ސާޖަރީތައް ކުރުމަށްފަހު އެމަނިކުފާނު މިހާރު ވަނީ އިތުރު ފަރުވާއަށް ޖަރުމަނަށް ގެންދެވިފަ އެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ހަތަރު މީހަކު ވަނީ ހައްޔަރު ކޮށްފަ އެވެ. އެއީ ބޮންގޮއްވާލުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އާއި ލ. ގަން، ދުންފިނިއުފާ، އަހްމަދު ފާތިހު އެވެ.
އެ ހަތަރު މީހުންނަކީ ވެސް ހަރުކަށި ފިކުރާ ގުޅުންއޮތް މީހުން ކަމަށް ބެލެވޭކަމަށް ފުލުހުން ބުނެފައިވެ އެވެ.
