ބުރާސްފަތި ދުވަހުގެ ރޭ ހުޅުމާލޭގެ އިމާރާތެއްގެ މަތިން ޒުވާނަކު ވެއްޓުމުގައި އިތުރު މީހެއްގެ ދައުރު އޮތް ކަމަކަށް ތަހުގީގަށް އަދި ފާހަގަނުކުރެވޭ ކަމަށް ފުލުހުން މިއަދު ބުނެފި އެވެ.
އެ ރޭ ދަންވަރު ހުޅުމާލޭ ނިރޮޅުމަގުގެ ހަ ވަނަ ނަންބަރު ގޯޅީގައި ޒަހަމްތަކާ އެކު މީހަކު ވެއްޓިފައި އޮތް ކަމުގެ މައުލޫމާތު ލިބިގެން އެތަނަށް ފުލުހުން ދިޔަ އެވެ. އުމުރުން 21 އަހަރުގެ އެ މީހާ އައިޖީއެމްއެޗް ހޮސްޕިޓަލަށް ގެންގޮސް ފަރުވާދެމުން އަންނަ އިރު ހޮސްޕިޓަލަށް ގެންދިޔައިރު އެ މީހާގެ ހޭވެރިކަމެއް ނެތެވެ.
އެ މީހާ ވެއްޓިފައި އޮތް މަންޒަރު ފެންނަ ވީޑިއޯތަކެއް ސޯޝަލް މީޑިއާގައި އާއްމުވެފައިވާއިރު، އޭގެއިން ފެންނަ ގޮތުން އޭނާ އޮތީ ހަމައެކަނި ބޮކްސާއެއް ލައިގެންނެވެ. ގިނަ ޒަހަމްތަކެއް ލިބިފައިވާ ކަމަށް ބެލެވޭއިރު ގިނަ އަދަދަކަށް ލޭ ފައިބާފައި ހުއްޓެވެ.
އެ މައްސަލައިގެ ތަހުގީގާ ގުޅޭގޮތުން ފުލުހުން މިއަދު ބުނީ އެ ހާދިސާ ހިނގުމުގެ 10 މިނެޓް ކުރިން އޭނާ ވެއްޓުނު އިމާރާތަށް އެކަނި ގޮސް ވަންނަ މަންޒަރު ސީސީޓީވީން ފެންނަ ކަމަށެވެ. އޭނާ ފުރަތަމަ ވެއްޓުނީ ހަ ބުރީގެ އިމާރާތުން ޖެހިގެން ހުރި ތިން ބުރީގެ އިމާރާތުގެ ޓެރަސް މައްޗަށް ކަމަށް ވެސް ފުލުހުން ބުނެ އެވެ. އޭނާ މަގުމައްޗަށް ވެއްޓުނީ އެ ތިން ބުރީގެ އިމާރާތުގެ މަތިން ކަމަށް ފުލުހުން ބުންޏެވެ.
ފުލުހުން ބުނީ ވެއްޓުނު އިމާރާތަށް ވަނުމުގެ ކުރިން އޭނާ ހުޅުމާޅޭ މަގުތަކުގައި އަޑުގަދަކޮށް އެކަނި ކޮޅުކޮޅަށް ދުވެ އުޅެފައިވާކަން ސީސީޓީވީ ފްޓޭޖްތަކުންނާއި މަންޒަރުދުށް މީހުންގެ ބަހުން އެނގޭ ކަމަށެވެ.
މި މައްސަލައިގެ އިތުރުން އިމާރާތުން ވެއްޓުމުގެ ދެ ހާދިސާއެއް މިފަހުން ވަނީ ހިނގައިފަ އެވެ. އެ އެންމެނަށް ވެސް ވަނީ ފަރުވާ ދީފަ އެވެ.
