އަންހެނަކަށް ގެވެށި އަނިޔާކުރި ކަމަށް ތުހުމަތުކުރާ މައްސަލައެއްގައި، "އަންހެނަކު ކޮންމެ ފަދަ ދޮގެއް ވެސް ހަދާފާނެ" ކަމަށް ވިދާޅުވެ، މާމިގިލީ ދާއިރާގެ މެންބަރު ގާސިމް އިބްރާހިމް ރައްޔިތުންގެ މަޖިލީހުގެ މެންބަރުން ތިއްބަވާ ގުރޫޕެއްގައި ދެއްކެވި ވާހަކަތަކާ މެދު ބައެއް މެމްބަރުން ހިތްހަމަނުޖެހުން ފާޅުކުރައްވައިފި އެވެ.
ރައްޔިތުންގެ މަޖިލީހުގެ ރައީސްކަން ވެސް ކުރައްވާފައިވާ ގާސިމް މަޖިލީހުގެ މެމްބަރުންނަށް މެސެޖެއް ފޮނުއްވީ ކެނދިކުޅުދޫ ދާއިރާގެ މެމްބަރު އަހްމަދު އީސާއާ މެދު ކުރާ ތުހުމަތުތަކުގެ ދިފާއުގައި ވާހަކަ ދައްކަވަމުންނެވެ. އޭނާ ކުރީގެ އަނބިކަނބަލުން އަސްރާ ނަސީމަށް ގެވެށި އަނިޔާގެ މައްސަލައެއް ތަހުގީގު ކުރަމުން އައި ނަމަވެސް އީސައަކީ އެފަދަ ކަމެއް ކުރައްވަފާނެ ބޭފުޅެއް ކަަމަށް ގަބޫލުނުކުރައްވާ މޭރަމުން ގާސިމް ވަނީ ވާހަކަ ދައްކަވައިފަ އެވެ.
އީސަ ދަރިކަލުންނާ އެކު ހުންނެވި ފޮޓޯ ފޮނުއްވި ވިދާޅުވެފައި ވަނީ، "މިފަދަ ލޯބިވާ ކުއްޖަކާ މެދު އެފަދަ އަމަލެއް ހިންގަފާނެ ކަމަށް ގަބޫލުކުރަން ވަރަށް ދަތި" ކަމަށެވެ.
ގާސިމް ވިދާޅުވި ގޮތުގައި "އަންހެނަކު ކޮންމެ ފަދަ ދޮގެއް ވެސް ހަދާފާނެ" އެވެ. މިހެން ވިދާޅުވުމަށް ފަހު ބްރެކެޓުގައި އަދި ފިރިހެނުން ވެސް ޖަހާފައިވެ އެވެ.
އެހެންވެ މައްސަލަ ތަހުގީގު ކުރަން ޖެހޭނީ ވަރަށް އިންސާފުން ކަމަށް ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި ގެވެށި އަނިޔާގެ ގާނޫނު އެ ވަނީ ހައްދެއް ނެތް މިންވަރަށް އަންހެން ބޭފުޅުން ހިމާޔަތްވާ ގޮތަށް،" ގާސިމް ވިދާޅުވި އެވެ.
ގާސިމް: އޭނާގެ މެސެޖަށް ވަނީ ފާޑުކިޔުން އަމާޒުވެފައި
އެއާއެކު، ރައްޔިތުންގެ މަޖިލީހުގެ 87 މެމްބަރުން ތިއްބަވާ ގްރޫޕްގެ ތެރެއިން ބައެއް މެމްބަރުން ވަނީ ގާސިމްގެ އެ މެސެޖަށް ވަރަށް ބޮޑަށް ފާޑުވިދާޅުވެފަ އެވެ.
ގާސިމްގެ ވާހަކަ ބަލައިނުގަނެވޭ ކަމަށް ވިދާޅުވެ ވިލިމާލެ ދާއިރާގެ މެމްބަރު އަހްމަދު އުޝާމް ވިދާޅުވީ "އަންހެނުންނަކީ ފިރިހެނުންނަށް ވުރެން ދަށު ދަރަޖައިގެ ބައެއް ކަމަށް" ގާސިމް ދެކެވަޑައިގަންނަވާ ވިސްނުން ބަދަލުކުރައްވަން ޖެހޭ ކަމަަށެވެ.
"ގާސިމްއާ ދިމާވެފައިވާ ބައެއް އަންހެނުން ތިގޮތަށް ކަންތައް ކޮށްފައި ހުރީ ކަމަށް ވެދާނެ. ހުރިހާ އަންހެނުން އެއީ ކޮންމެ ފަދަ ކަމަކަށް ވެސް ދޮގު ހަދާފާނެ ބައެއް ކަމަށް ދެއްކުމަކީ ރަނގަޅު ގޮތެއް ނޫން، އަންހެނުންނަކީ ފިރިހެނުންނަށްވުރެ ދަށު ދަރަޖައިގެ ބައެއް ކަމަށް ތި ދެކޭ ވިސްނުން ދޫކޮށްލަން ޖެހޭ،" އުސާމް ވިދާޅުވި އެވެ.
އުޝާމްގެ މި މެސެޖަށް ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހްމަދު ޝިޔާމް ވަނީ ތާއީދުކުރައްވައިފަ އެވެ.
ގާސިމާ މެދު ނުރުހުންވެ، ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ އެ މެސެޖަށް ރިޕްލައި ކުރައްވައި ވިދާޅުވީ، "ޝޭމްފުލް" ކަމަށެވެ.
އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވި ގޮތުގައި، ކޮންމެ މީހަކީ ވެސް ގާނޫނުއަސާސީ ބުނާ ގޮތުން ކުށެއް ސާބިތު ނުވާހާ ހިނދަކު މައުސޫމް މީހެއް ކަމާއި އެކަމަކު، އަންހެނުން ކޮންމެ ފަދަ ދޮގެއް ވެސް ހަދާފާނެ ކަމަށް ވިދާޅުވުން އެއީ ބަލައިގަނެވޭނެ ބަހުރުވައެއް ނޫނެވެ.
"ހާއްސަކޮށް ރައްޔިތުންގެ މަންދޫބުންގެ ފަރާތުން،" ރޮޒައިނާ ވިދާޅުވި އެވެ.
ދާންދޫ ދާއިރާގެ މެމްބަރު ޔައުގޫބު އަބްދުﷲ، ގާސިމްގެ މެސެޖް ސިފަ ކުރެއްވީ "އިސް އުފުލާލަން ނުކުރެވޭ ވަރުގެ ވާހަކައެއް،"ގެ ގޮތުގަ އެވެ.
މާފަންނު ހުޅަނގު ދާއިރާގެ މެންބަރު ފަލާހު ވިދާޅުވީ، "މަޖިލީހުގެ ރައީސްކަން ކޮށްފައި ހުރި މީހަކު މިކަހަލަ ---- ވާހަކައެއް ދައްކަން ނުވާނެ" ކަމަށެވެ.
ބިލެއްދޫ ދާއިރާގެ މެމްބަރު އަހުމަދު ހަލީމް ވިދާޅުވި ގޮތުގައި ގާސިމްގެ ވިސްނުމާއި މިހާރުގެ ކުދިންގެ ވިސްނުން އުޑާއި ބިމާހާ ތަފާތުވާނެ އެވެ. މިކަހަލަ ކަންތައްތަކުގައި ގާސިމް ނުބެހި ހުރުމުން ބުއްދިވެރިވާނެ ކަމަށް އޭނާ ވިދާޅުވި އެވެ.
"އަޅުގަނޑު ހެޔޮހިތުން ނަސޭހަތްތެރިވަން،" ހަލީމް ވިދާޅުވި އެވެ.
އެއާއެކު، ގާސިމް އަނެއްކާވެސް މެސެޖް ކުރައްވައި މެންބަރުންނަށް ރައްދު ދެއްވަން ފެއްޓެވި އެވެ. ގާސިމް ފާހަގަ ކުރެއްވީ އޭނާގެ މެޖެސްގައި ބްރެކެޓަށް ލާފައި "އަދި ފިރިހެނަކު ވެސް" ލިޔެފައި އޮތް ކަމެވެ. ނަމަވެސް، އޭގެފަހުން ވެސް ގުރޫޕްގައި އެ މައްސަލަ ފިންޏެއް ނުވެ އެވެ.
މަޖިލިސް މެމްބަރުންގެ މެދުގައި މައްސަލަ ހޫނުވެފައިވާއިރު، ސޯޝަލް މީޑިއާގައި ވެސް ގާސިމަށް ވަރަށް ބޮޑަށް ނުރުހުން ވަނީ އަމާޒުވެފަ އެވެ. ގާސިމްގެ ވާހަކަތަކަށް ކުށްވެރިކޮށް މާފަށް އެދުމަށް ވެސް ގިނަ ބަޔަކު ގޮވާލާފައިވެ އެވެ.
