ރައްޔިތުންގެ މަޖިލީހުގެ އިޖުތިމާއީ ކޮމިޓީގެ މުގައްރިރު ކަމުން ކެނދިކުޅުދޫ ދާއިރާގެ މެމްބަރު އަހްމަދު އީސާ މިއަދު އިސްތިއުފާ ދެއްވައިފި އެވެ.
އޭނާ އެ މަގާމުން އިސްތިއުފާ މި ދެއްވީ، ތުހުމަތުކުރާ ގެވެށި އަނިޔާގެ މައްސަލައެއް ތަހުގީގީ އިދާރާތަކުން ބަލަމުން ދަނިކޮށެވެ. އީސަ މަގާމުން ވަކިކުރަން އިޖުތިމާއީ ކޮމިޓީ މިއަދު ބޭއްވި ނަމަވެސް ކޯރަމް ހަމަނުވެގެން އެކަން ނުވީ އެވެ.
އީސަ އާއްމުކުރެއްވި ބަޔާނެއްގައި ވިދާޅުވީ މަގާމުން އެކަހެރިވެވަޑައިގަތީ އޭނާ އަށް ތުހުމަތުކުރާ ގެވެށި އަނިޔާގެ މައްސަލައެއް ބަލާތީ މުއައްސަސަތަކަށް އެއްބާރުލުން ދެއްވުމުގެ ގޮތުން ކަަމަށެވެ.
"ދިވެހިރާއްޖޭގެ ގާނޫނުތަކާއި ގަވާއިދުތަކާ ހިލާފު އެއްވެސް އަމަލެއް އަޅުގަނޑު ކޮށްފައި ނުވާނެ ކަމުގެ ޔަގީންކަން އެންމެހާ ރައްޔިތުންނަށް އަދި ހާއްސަކޮށް ކެނދިކުޅުދޫ ދާއިރާގެ ލޮބުވެތި ރައްޔިތުންނަށް އަރުވަމެވެ،" ބަޔާނުގައި ވިދާޅުވި އެވެ.
އީސައާ ދެކޮޅަށް މައްސަލަ ހުށަހެޅުއްވީ ކުރީގެ އަނބިކަބަލުން އަސްރާ ނަސީމެވެ. އެ މައްސަލައިގެ ތަހުގީގަށް ފުލުހުންނަށް ބަޔާން ދެއްވުމަށް ފަހު އަސްރާ ފޭސްބުކްގައި ލިއުއްވި ގޮތުގައި އަނިޔާގެ އެ ތަޖުރިބާއަކީ ދުވަހަކު ވެސް ކުރިމަތިވެދާނެ ކަމަށް ހީކުރެއްވި ކަމެއް ނޫން ކަަމަށެވެ.
އޭނާ އާއި ދެ އަހަރު ނުވާ ދަރިފުޅަށް އަނިޔާކުރި ކަމަށް ވަނީ އިއްޔެ ރޭ ދަންވަރެވެ.
އަސްރާ ވިދާޅުވި ގޮތުގައި ވޭތުވެދިޔަ 24 ގަޑިއިރަކީ އޭނާ އާއި ދަރިފުޅަށް އުނދަގޫ އިހްސާސްތަކެއް ކުރަން ޖެހުނު ވަގުތެކެވެ. އެކަމަކު މިހާރު ދެމައިންގެ ވެސް ހާލު ރަނގަޅު ކަމަށް ވިދާޅުވި އެވެ.
އޭނާގެ ގާތް މީހަކު "އަދަދު"އަށް ކިޔައިދިން ގޮތުގައި، އަސްރާގެ ކޮނޑުހުޅާއި އަތަށް ވަނީ އަނިޔާ ލިބިފަ އެވެ. އަދި އެންމެ ބޮޑު ހިތްދަތިކަމަކީ ދަރިކަލުންނަށް ކުރިމަތިވި "ބިރުވެރި ވަގުތުކޮޅު" ކަމަށް ވެސް އޭނާ ބުންޏެވެ.
އީސަ ވަކިކުރަން ބޭއްވި ކޮމިޓީގައި އެކަން ނުވީ ކޯރަމް ހަމަވާން އެންމެ މެމްބަރަކު މަދުވެގެންނެވެ. ފަސް މެމްބަރުންގެ ވޯޓުން ވަކިވާ ގޮތަށް އޮންނައިރު، ކޮމިޓީގައި ބައިވެރިވެވަޑައިގަތީ މުގައްރިރުކަން ކުރެއްވި މަޑަވެލި ދާއިރާގެ މެމްބަރު ހުސެއިން ފިރުޝާން ހިމެނިވަޑައިގަންނަވާ ގޮތުން ހަތަރު މެމްބަރެކެވެ. މުގައްރިރަށް ވޯޓެއް ނުދެއްވެ އެވެ.
