ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސާގެ ގެވެށި އަނިޔާގެ މައްސަލައެއް ރޭ ފުލުހުންނަށް ހުށަހަޅައިފި އެވެ.
އެ މައްސަލަ ފުލުހަށް ހުށަހަޅާފައިވަނީ ރޭ ދަންވަރު 1:30 ހާއިރު، އޭނާގެ ކުރީގެ އަނބިކަނބަލުން އަސްރާ ނަސީމްގެ އަވަށްޓެރިއެކެވެ.
އަސްރާއަކީ ނައިބު ރައީސް ފައިސަލް ނަސީމްގެ އެއްބަނޑު އެއްބަފާ ކޮއްކޯފުޅެކެވެ.
އަސްރާ ދިރިއުޅުއްވާ އެޕާޓްމެންޓް ހުންނަ އިމާރާތުގައި ދިރިއުޅޭ މީހަކު "އަދަދު"އަށް ކިޔައިދިން ގޮތުގައި އަނިޔާކުރާ ކަމުގެ ރިޕޯޓާ އެކު ރޭ ދަންވަރު ފުލުހުން ވެސް އެ ތަނަށް ދިޔަ އެވެ. އަނިޔާކުރީ، އޭނާ ބުނި ގޮތުގައި ދެ އަހަރު ނުވާ ދަރިފުޅުގެ ވެސް ކުރިމަތީގަ އެވެ.
"އަދަދު"އަށް ވާހަކަ ދެއްކި މީހާ ކިޔައިދިން ގޮތުގައި އީސަގެ ފަރާތުން އަސްރާއަށް ލިބިފައިވާ އަނިޔާތަކަށް ރޭ އައިޖީއެމްއެޗް ހޮސްޕިޓަލުން ވަނީ ފަރުވާ ވެސް ހޯއްދަވައިފަ އެވެ. އަނިޔާގެ ތަފްސީލްތައް ހޮސްޕިޓަލްގެ ރިޕޯޓުން ފެންނަން ހުރި ކަމަށް ވެސް އެ މައުލޫމާތު އެނގޭ މީހާ ބުންޏެވެ.
"ވަރަށް އަނިޔާވެފައި ހުރި،" އޭނާ ބުންޏެވެ.
މިކަމާ ގުޅިގެން އީސަގެ ކޮމެންޓެއް ހޯދުމަށް ގުޅުމުން ޖަވާބެއް ނުދެއްވިއިރު މެސެޖަށް ވެސް ޖަވާބެއް ނުދެއްވި އެވެ.
ފުލުހުން ބުނީ ރޭ ހުށަހެޅި ގެވެށިއަނިޔާގެ މައްސަލައިގެ ތަހުގީގުގަށް ކުރަން ޖެހޭ މަސައްކަތް ކުރަމުން އަންނަ ކަމަށެވެ. އެނގިފައިވާ ގޮތުގައި މި މައްސަލައިގެ ތަހުގީގަށް އަސްރާގެ ބަޔާން ވެސް ފުލުހުން ވަނީ ނަގައިފަ އެވެ.
