ށ. މިލަންދޫގައި، ކޮވިޑަށް ޕޮޒިޓިވްވި މީހަކު ފޫހިފިލުވަން ގޭ ދޮށަށް ރައްޓެހިން ގެންގޮސް ބައްދަލު ކުރުމުން 10،000ރ. އިން ޖޫރިމަނާ ކޮށްފި އެވެ.
މިލަންދޫ ކައުންސިލް މެމްބަރު އަހުމަދު ޝިޔާމް، "އަދަދު" އަށް ވިދާޅުވީ ރޭ ޖޫރިމަނާ ކުރީ އުމުރުން 32 އަހަރުގެ މީހެއް ކަމަށާއި އޭނާ ޕޮޒިޓިވްވެ ކަރަންޓީންގައި ހުންނަތާ އަދިވީ ހަފުތާއެއްހާ ދުވަސް ކަމަށެވެ.
އޭނާ ކަރަންޓީން ކޮށްފައި ހުރިގޭގެ ޖޯއްޔަކަށް ރައްޓެހިން ގެންނާތީ އެތައް ފަހަރަކު ނަސޭހަތްތެރިވި ކަމަށް ކައުންސިލަރު ވިދާޅުވި އެވެ. އެކަމަކު އެކަން ނުހުއްޓައި މުޅި ރަށް ނުރައްކަލަކަށް ހުށަހެޅޭތީ ފުލުހުން މެދުވެރިކޮށް ޖޫރިމަނާ ކުރީ އެވެ.
"ޖޫރިމަނާ ކުރި ފަހުން ނުފެނޭ ބޭރުތެރެއަށް ނުކުމެ އުޅޭ ތަނެއް،" ޝިޔާމް ވިދާޅުވި އެވެ.
އޭނާއަށް ކާން ގެންދާ މީހާ ކޮންޓެކްޓް ވެފައިވާތީ އެ މީހާ ދިރިއުޅޭގެ ވެސް މިހާރު ވަނީ ކަރަންޓީނަށް ލައިފަ އެވެ. އަދި ޕޮޒިޓިވް ވެފައިވާ މީހާ ބައްދަލުކުރި ރައްޓެހިން ދެނެގަތުމުގެ މަސައްކަތް ކުރަމުން އަންނަ ކަމަށް ވެސް ޝިޔާމް ވިދާޅުވި އެވެ.
މިލަންދޫން މީގެ ކުރިން ވެސް ވަނީ ޕޮޒިޓިވްވި މީހެއް ބޭރަށް ނުކުތުމުން ޖޫރިމަނާކޮށްފަ އެވެ. އާބާދީގައި 25،00 ހިމެނޭ އެރަށުން ކޮވިޑަށް ޕޮޒިޓިވް ދެ މީހުން މިހާރު ވެސް އެބަތިއްބެވެ.
ކަރަންޓީން އުސޫލާ ހިލާފުވާ މައްސަލަތައް ދޭތެރެ ދޭތެރެއިން ފެންމަތިވާއިރު ބޮޑެތި އަދަދުތަކުން ދަނީ ޖޫރިމަނާ ކުރަމުންނެވެ. މިހަފުތާގެ ތެރޭގައި ގއ. ވިލިނގިލީގައި ވެސް ކަރަންޓީން އުސޫލާ ހިލާފުވެ ކައިވެނި ކުރަން ކޯޓަށް ދިޔަ ދެ މީހަކު ވެސް 10،000ރ. އިން ޖޫރިމަނާ ކޮށްފައިވެ އެވެ.
