ކޮވިޑް-19ގެ ހަތަރުވަނަ ރާޅަކާއެކު ރާއްޖޭގައި މިވަގުތު އެ ބަލި ފެތުރޭ މިންވަރު އިންތިހާއަށް ގޯސްވަމުންދާތީ ބަލި ކޮންޓްރޯލް ކުރުމަށް އަވަސް ފިޔަވަޅުތަކާއި އިންތިޒާމުތައް ހަމަޖެއްސުމަށް ސަރުކާރަށް ގޮވާލައި ރައްޔިތުންގެ މަޖިލީހަށް މިއަދު ހުށަހެޅި މައްސަލަ ބަލައިނުގަތް ރައްޔިތުންގެ މަޖިލީހުން މިއަދު ބޭރުކޮށްލައިފި އެވެ.
މަޖިލީހުގެ މަޑުއްވަރީ ދާއިރާގެ އިދިކޮޅު މެމްބަރު އާދަމް ޝަރީފް ހުށަހެޅުއްވި މައްސަލާގައި ބުނެފައިވަނީ ކޮވިޑުގެ ހާލަތު އިންތިހާއަށް ގޯސްވެ، މާލޭގެ އިތުރުން އަތޮޅު ތެރޭގައި ބަލި ފެތުރި ގިނަ ރަށްތަކަކަށް އަރައި ފޭބުން ވެސް މަނާކުރަންޖެހިފައިވާ ކަމަށެވެ.
މި ކަމުގެ ސަބަބުން، ސިއްހީ ހިދުމަތްތެރިން ވަރުބަލި، މުޅި ފަރުވާގެ ނިޒާމަށް ލޮޅުން އަރައި، އެ ބަލީގައި މީހުން މަރުވާ މިންވަރު ވެސް އެތައް ގުނައެއް އިތުރުވަމުންދާ ކަމަށް އެ މައްސަލާގައި ފާހަގަކޮށްފައިވެ އެވެ.
މީގެ އިތުރުން، ރާއްޖޭގައި ގިނަ ބަޔަކަށް ފުރަތަމަ ޑޯޒްގެ ގޮތުގައި ޖެހި ކޮވިޝީލްޑް ވެކްސިން ހުސްވެ، ދެވަނަ ޑޯޒް ނުޖެހި އެތަކެއް ހާސް ތިބިއިރު، ވެކްސިން ޕްރޮގްރާމް ވެސް ހުއްޓިފައިވާކަމަށް ބުނެފައިވެ އެވެ.
އެހެންކަމުން، ކޮވިޑު ފެތުރުން ކޮންޓްރޯލްކޮށް، ވެކްސިން ޕްރޮގްރާމް އަލުން ހިންގުމަށް އަވަސް ފިޔަވަޅުތަކާއި އިންތިޒާމު ހަމަޖައްސަން އާދަމް ޝަރީފް ހުށަހެޅުއްވި މައްސަލާގައި ސަރުކާރަށް ގޮވާލާފައިވެ އެވެ.
ނަމަވެސް، އެ މައްސަލަ މަޖިލީހަށް ބަލައިނުގަތް ބޭރުކޮށްލާފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 18 މެމްބަރުންގެ އަގުލަބިއްޔަތުންނެވެ. އެ މައްސަލަ ބަލައިގަތުމަށް ތާއީދުކޮށް 12 މެމްބަރުން ވޯޓު ދެއްވިއިރު، ތިން މެމްބަރަކު ވަކި ގޮތަކަށް ވޯޓު ނުދެއްވާ ތިއްބެވި އެވެ.
އެ މައްސަލަ މަޖިލީހުން ބޭރުކޮށްލާފައިވާއިރު، ޕޮޒިޓިވްވާ މީހުންގެ އަދަދު ރެކޯޑު އަދަދުތަކުން އިތުރުވެ، އެ ބަލީގެ ޝިކާރައަކަށްވާ މީހުން ވެސް ވަނީ އެތައް ގުނައެއް އިތުރުވެފަ އެވެ.
އެގޮތުން، މިއަދު އެކަނިވެސް އެ ބަލީގައި ހަތަރު މީހަކު ވަނީ މަރުވެފައިވާއިރު، ޖުމްލަ އަދަދު ވަނީ 110 އަށް އަރައިފަ އެވެ.
ޕޮޒިޓިވްވާ މީހުން އަދަދުތަކަށް ބަލާއިރު، އިއްޔެ ވެސް 1،465 މީހުނަށް އަލަށް ބަލިޖެހިފައިވެ އެވެ.
އެއާއެކު މިވަގުތު ހުރި ކޮވިޑުގެ އެކްޓިވް ކޭސްތަކުގެ އަދަދު ވަނީ 18،000 ހުރަސްކޮށްފަ އެވެ.
މާލޭގެ އިތުރުން އަތޮޅު ތެރޭގައި ވެސް ބަލި ފެތުރި، 50 އަށް ވުރެ ގިނަ ރަށަށް އަރައިފޭބުން ވަނީ މަނާކޮށްފަ އެވެ.
ބަލީގެ ނުރައްކާ ބޮޑުވެފައި އޮތުމުން ފިޔަވަޅުތައް ވެސް ވަނީ ހަރުކަށިކޮށްފަ އެވެ. މާލޭގައި މިހާރު ކޮންމެ ދުވަހަކު ހަވީރު ހަތަރަކުން ފަތިހު ހަތަރަކަށް އޮތީ ކާފިއު އިއުލާންކޮށްފަ އެވެ. ސަރުކާރުގެ އޮފީސްތައް ބަންދުކޮށް ގޭގައި މަސައްކަތް ކުރާ ގޮތަށް ހަމަޖައްސާފައިވާ އިރު ކިޔަވައިދެމުން އަންނަނީ އޮންލައިންކޮށެވެ.
