ވޮލީބޯޅަ މުޅި ރާއްޖޭގައި ޑިވެލޮޕްކުރެވޭނެ ގޮތަށް ވިސްނައި 25 ރަށެއްގައި ފެންވަރު ރަނގަޅު އައުޓް ޑޯ ވޮލީ ކޯޓު އެޅުމަށް ޔޫތު މިނިސްޓްރީން އިއުލާނުކޮށްފި އެވެ.
ޔޫތު މިނިސްޓަރު އަހުމަދު މަހުލޫފް މިއަދު އިއުލާނުކުރެއްވި ރަށްތަކަކީ ހދ. ކުޅުދުއްފުށި، ހދ. ފިނޭ، ހދ. ކުމުންދޫ، ހދ. ނޭކުރެންދޫ، ށ. ފުނަދޫ، ށ. މިލަންދޫ، ބ. ކެންދޫ، ބ. ގޮއިދޫ، ޅ. ހިންނަވަރު، ކ. ތުލުސްދޫ، ވ. ކެޔޮދޫ، ވ. ފެލިދޫ، ވ. ފުލިދޫ، މ. ދިއްގަރު، ފ. މަގޫދޫ، ފ. ނިލަންދޫ، ތ. މަޑިފުށި، ތ. ހިރިލަންދޫ، ލ. ފޮނަދޫ، ގއ. ވިލިނގިލި، ގއ. ނިލަންދޫ، ގއ. ކޮލަމާފުށި، ގއ. ދާންދޫ، ޏ. ފުވައްމުލައް އަދި ސ. ފޭދު އެވެ.
ޔޫތު މިނިސްޓްރީން މައުލޫމާތުދޭ ގޮތުގައި މި ކޯޓުތައް އެޅުމަށް ގާތްގަނޑަކަށް ފަންސަވީސް މިލިއަން ރުފިޔާ ހަރަދުވާނެ އެވެ. މިނިސްޓްރީން ކުރި އިއުލާނުގައި ބުނެފައިވަނީ 25 ރަށެއްގައި އައުޓްޑޯ ވޮލީ ކޯޓް ތައްޔާރު ކޮށްދޭން ޝައުގުވެރިވާ ފަރާތްތަކަށް ފުރުސަތު ހުޅުވާލެވިފައިވާ ކަމަށާއި އެ މައުލޫމާތުތައް މިއަދު ގެޒެޓްކުރެވިފައިވާނެ ކަމަށެވެ.
މީގެ ކުރިން ސަރުކާރުން ވަނީ ރ. ކިނޮޅަހާއި އދ. ދިއްދޫގައި އައުޓް ޑޯ ވޮލީ ކޯޓް އަޅައިފަ އެވެ.
މިއަދު އިއުލާނުކުރި ރަށްތަކުގެ ތެރޭގައި އެންމެ ގިނައިން އެއް އަތޮޅަކަށް ނިސްބަތްވާ ގޮތަށް ހުރި ހދ އާއި ވ އަތޮޅެވެ. އެ ގޮތުން ހދ ހަތަރު ރަށެއްގައި ކޯޓު އަޅާއިރު، ވ އަތޮޅުގެ ތިން ރަށެއްގައި ކޯޓު ގާއިމްކުރާނެ އެވެ. މީގެ ތެރެއިން ހދ. އަތޮޅަކީ އަތޮޅު ފެންވަރުގައި ގިނަ ވޮލީބޯޅަ މުބާރާތްތައް ކުރިއަށްގެންދާ އަތޮޅެކެވެ.
ދެން ވ އަތޮޅަކީ ގައުމީ ލެވަލްގައި އެންމެ ގިނަ ކުޅުންތެރިން އުފައްދާ އަދި ގައުމީ ޓީމުގެ ގިނަ ކުޅުންތެރިންތަކެއް ނިސްބަތްވާ އަތޮޅެވެ. އަދި ލިސްޓުގައި ބ އަތޮޅުގެ ދެ ރަށް ހިމެނޭއިރު، އެއީ ވެސް ޒުވާން ކުޅުންތެރިން އުފެއްދުމުގައި މުހިއްމު މަސައްކަތްތަކެއް ކުރަމުން އަންނަ ދެ ރަށެކެވެ. އަދި ލިސްޓުގައި ހިމެނޭ ތ. އަތޮޅު ދެ ރަށް ކަމަށްވާ މަޑިފުއްޓާއި ހިރިލަންދޫ، ލ. ފޮނަދޫ އަދި ފުވައްމުލަކަކީ ވޮލީގެ ޝައުގުވެރިކަން ބޮޑު ރަށްތަކެކެވެ.
ވީއޭއެމްގެ ރައީސް މުހައްމަދު ރަނޭޝް (ރަނޭ) "އަދަދު" އަށް ވިދާޅުވީ މި 25 ކޯޓު ވެގެންދާނީ ދާއިމީ ގޮތެއްގައި ކުޅުންތެރިން ޑިވެލޮޕްކުރުމަށް ލިބޭ ރަނގަޅު ފެންވަރުގެ ފެސިލިޓީސްތަކަކަށް ކަމަށެވެ.
"މިއީ އަތޮޅު ތެރެއަށް ވޮލީބޯޅަ ގެންދަން ކުރެވޭ މަސައްކަތުގެ ފެށުމެއް،" ރަނޭ ވިދާޅުވި އެވެ.
މިދިޔަ މަހުގެ އެއް ވަނަ ދުވަހު ވީއޭއެމްގެ ލީޑަޝިޕާ ހަވާލުވި ރަނޭގެ ޕްލޭނުގައިވާ ގޮތުން ވޮލީ ބަހާލެވޭނީ ތިން ރީޖަނަކަށެވެ. އެއީ އުތުރާއި ސެންޓްރަލް އަދި ދެކުނަށެވެ. އޭގެ އިން ކޮންމެ ޒޯނެއް އިތުރު ސަބް ދެ ޒޯނަށް ބަހާލާފައި ގިނަ ޕްރޮގްރާމްތަކެއް ހިންގައި ރާއްޖެ އަށް ހުޅުވާލައިގެން ބޮޑު މުބާރާތެއް ބޭއްވުމަކީ ރަނޭގެ ތަސައްވުރެވެ.
