ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެ ހުންނަ ނީލޯފަރު ހިނގުމުގައި ވެހިކަލް ހުސްކުރުމަށް ފަހު، އެކަން ކުރިން ނުވެ އޮތީ ތަކުރާރުކޮށް ޕްލޭނިން މިނިސްޓްރީގައި އެދިގެން ވެސް ޕާކުކުރާނެ ތަނެއް ހަަމަޖައްސައިނުދީގެން ކަމަށް މާލޭ ސިޓީ ކައުންސިލުން ރޭ ބުނެފި އެވެ.
ބޮމުގެ ހަމަލާއަށް ފަހު އެ މަގުގައި ވެހިކަލް ދުއްވުން އޮތީ މަނާކޮށްފަ އެވެ. އަދި މަގުގައި ޕާކުކޮށްފައި ހުރި އުޅަނދުތައް ނެގުމަށް ފަހު އެ ސަރަހައްދު ވަނީ ހުސްކޮށްފަ އެވެ.
ނަޝީދު ދިރިއުޅުއްވާ ގެކޮޅު ހުންނަ ނީލޯފަރު ހިނގުމުގައި ޕާކުކުރުން މަނާކުރުމާ ގުޅޭ މައްސަލަ ފެންމަތިވީ، މި މަހުގެ ހަ ވަނަ ދުވަހު އެ މަނިކުފާނު އަވަހާރަކޮށްލަން ދިން ބޮމުގެ ހަމަލާއަށް ފަހު އެވެ. އެ ބޮން އޮތީ ނިލޯފަރު މަގު މަޖީދީ މަގަށް ހުސްވާތާ ކައިރީގައި ޕާކުކޮށްފައި ހުރި ސައިކަލެއްގަ އެވެ.
އެ ހަމަލާއާ ގުޅިގެން ނަޝީދަށް ސެކިއުރިޓީ ދިނުމުގައި އެމްއެންޑީއެފުން އިހުމާލުވީ ކަމަށް ކުރެވުނު ތުހުމަތުތަކަށް ފަހު، ސަރަހައްދުގެ ގޮތުން ސެކިއުރިޓީ ދޭން އުނދަގޫ މައްސަލަ ފާހަގަކޮށްފައިވާ ކަން ހާމަކުރި އެވެ. އަދި ނީލޯފަރު ހިނގުމުގައި ޕާކުކުރުން މަނާކުރަން ސިޓީ ކައުންސިލުގައި ކުރިން އެދިފައިވާނެ ކަމަށް ސިފައިން ބުންޏެވެ.
މި މައްސަލައިގައި މާލެ ސިޓީ ކައުންސިލުން ކަން ކުރި ގޮތް ތަފްސީލުކޮށްދީ ނެރުނު ބަޔާނެއްގައި ބުނީ، ދުއްވާ އެއްޗެހި ދުއްވުން މަނާ މަގެއްގައި ގޮތުގައި ނީލޯފަރު ހިނގުން ކަނޑައަޅަން ނިންމީ ނިމުނު ޖެނުއަރީ މަހު ބޭއްވި ކައުންސިލްގެ ރަސްމީ ޖަލްސާއެއްގައި ކަމަށެވެ. އަދި އެއީ ސިޓީ ކައުންސިލުން ހިންގަމުން ދިޔަ "ހިތްފަސޭހަ މާލެއަކަށް މަގުފަހިކުރުން" ޕްރޮގްރާމްގެ ދަށުން ގެނައި ބަދަލެއް ކަމަށް ބުންޏެވެ.
މީގެ ކުރިން މާލޭގެ އެހެން ބައެއް ހަނި ގޯޅިތަކުގައި ޕާކު ކުރުން ވެސް މިގޮތަށް މަނާ ކުރެވުނެވެ. އެ ފަހަރު އެ މަސައްކަތް ކުރީ ސަރުކާރުގެ ހައުސިން މިނިސްޓްރީންނެވެ.
މަގު ހުސްކުރަން އަވަސް ވެގަތީ ޑިފެންސުން އެދިގެން
މާލެ ސިޓީ ކައުންސިލުން މަގުތައް ހުސްކުރަން ބޭނުންވީ އެ މަގުތަކުގައި ޕާކު ކުރާ އުޅަނދުތަކެއް ޕާކު ކުރާނެ އެހެން ސަރަހައްދެއް ހަމަޖައްސައި ދިނުމަށް ފަހު އެވެ. އެހެންކަމުން ޕާކު ކުރާނެ ސަރަހައްދެއް ހަމަޖެހެންދެން މަގުތަކުގައި ދުއްވުން މަނާ ކުރުން މަޑުޖައްސަލީ އެވެ.
ސިޓީ ކައުންސިލްގެ ބަޔާނުގައިވާ ގޮތުން، މަސައްކަތް މަޑުޖެހިފައި އޮތުމަށް ފަހު އަނެއްކާ މި މަސައްކަތައިގެން އަވަސް ވެގަތީ ނަޝީދުއަށް ސެކިއުރިޓީ ފޯރުކޮށްދޭން ދަތިވާ މައްސަލަ ފާހަގަކޮށް، ޑިފެންސް މިނިސްޓްރީން ސިޓީއެއް ފޮނުވި ހިސާބުންނެވެ. އެ ސިޓީގައި ޑިފެންސް މިނިސްޓްރީން ބުނީ ނިލޯފަރު ހިނގުމުގެ އެއް ފަރާތުގައި ސައިކަލް ޕާކުކޮށްފައި ހުރުމުގެ ސަބަބުން ނަޝީދަށް ސެކިއުރިޓީ ފޯރުކޮށްދޭން އުނދަގޫވާ ކަމަށް ބުނެފަ އެވެ.
ޑިފެންސުން އެ މައްސަލަ ފާހަގަކުރުމުން ސިޓީ ކައުންސިލުން ނީލޯފަރު ހިނގުމުގައި ހުރި ސައިކަލުތައް ނެގުމުގެ މަސައްކަތް އަވަސް ކުރަން ފެށި އެވެ. އަދި، އެހެން ޕާކިން ޒޯނެއް ހަމަޖައްސައިދޭން ސިޓީ ކައުންސިލުން ޕްލޭނިން މިނިސްޓްރީގައި އެދުނީ މާޗު 23ގަ އެވެ.
މާލެ ސިޓީ ކައުންސިލުން ބެލި ބެލުމުން އެ ސަރަހައްދުން ޕާކިން ޒޯނެއް އެންމެ ފަސޭހައިން ހެދޭނެ ވަރުގެ ޖާގައެއް އޮތީ ޖެންޑާ މިނިސްޓްރީ ހުންނަ ބިއްލޫރިޖެހިގޭ ގޯތިތެރެއިނެވެ. އެތަން ނުލިބިއްޖެ ނަމަ ހުށަހެޅީ، ވެށި ފަހި މާލެ ޕްރޮގްރާމުގެ ދަށުން ލިބިފައިވާ ފޭދޫކޮށިން ބިން ހަމަޖައްސައިދިނުމަށެވެ.
ސިޓީ ކައުންސިލުން ބުނި ގޮތުގައި މި މަސައްކަތް އަވަސް ކުރަން ވެގެން އެކި ފަހަރު މަތިން ޕްލޭނިން މިނިސްޓަރަށް ގުޅައިގެން އެކަން ކޮށްދޭން ކުރީގެ މޭޔަރު ޝިފާ މުހައްމަދު އެދިވަޑައިގަތެވެ. އަދި ޝިފާ ހުންނެވި މަޖިލިހެއްގައި، ރައީސް ނަޝީދު ވެސް އެކަން ކޮށްދެއްވަން އަސްލަމް އަރިހުގައި ދެންނެވި ކަމަށް ބަޔާނުގައި ބުނެފައިވެ އެވެ.
ސިޓީ ކައުންސިލުން ބުނިގޮތުގައި ޕްލޭނިން މިނިސްޓަރާއި މިނިސްޓްރީން ވެސް އެއްވެސް ވަރެއްގެ އެއްބާރުލުމެއް އެކަމުގައި ލިބިފައެއް ނުވެ އެވެ.
