ފުލުހުން ކުރިއަށް ގެންދިޔަ އެންޓި-ޓެރަރިޒަމް އޮޕަރޭޝަނެއްގައި ކ. ގުރައިދޫއާ އިންވެގެން އޮންނަ ކުޑަ ފަޅު ރަށް، ޅޮސްފުށި، ބަލައި ފާސްކޮށްފި އެވެ.
"އަދަދު" އަށް އެނގިފައިވާ ގޮތުގައި އެ އޮޕަރޭޝަން ހިންގާފައި ވަނީ ފުލުހުންނާއި ސިފައިން ގުޅިގެންނެވެ. ޅޮސްފުށީގައި ސަލަމާތީ ބާރުތަކުން ގާތްގަނޑަކަށް ތިން ގަޑިއިރު ހޭދަ ކުރި އެވެ. ނަމަވެސް އެ ހަރަކާތުގައި އެއްވެސް މީހަކު ހައްޔަރުކޮށްފައެއް ނުވެ އެވެ.
އެނގިފައިވާ ގޮތުގައި ފުލުހުންނާއި ސިފައިން ވަނީ ޅޮސްފުށި ބަލައި ފާސްކޮށްފަ އެވެ. އެކަމަކު އެ ރަށުން އެއްވެސް އެއްޗެއް ސަލާމަތީ ބާރުތަކުގެ ބެލުމުގެ ދަށަށް ގެންގޮސްފައިވާކަން އެނގިފައެއް ނުވެ އެވެ.
ޅޮސްފުއްޓަށް ފުލުހުންނާއި ސިފައިން އަރާފައި މި ވަނީ ޓެރަރިޒަމާ ދެކޮޅަށް އިއްޔެ އައްޑޫގައި ހިންގި އޮޕަރޭޝަނެއްގައި ހަތް މީހަކު ހައްޔަރުކޮށްފައި އޮއްވަ އެވެ.
މައުލޫމާތު ލިބިފައިވާ ގޮތުގައި އައްޑޫއިން ހައްޔަރު ކުރި ހަތް މީހުންނަކީ ޓެރަރިސްޓު ޖަމާއަތް އައިސިސްއަށް ނިސްބަތްވާ ކަމަށް ބެލެވޭ މީހުންނެވެ. އަދި އެއީ އައްޑޫގައި ހަރުކަށި ފިކުރު ފެތުރުމުގައި އިސްކޮށް ހަރަކާތްތެރިވި ކަމަށް ތުހުމަތު ކުރެވޭ ބައެއްކަން ވެސް އެނގިފައިވެ އެވެ.
ޓެރަރިޒަމާ ދެކޮޅު އޮޕަރޭޝަންތަކެއް ސަލާމަތީ ބާރުތަކުން މި ހިންގަނީ ކުރީގެ ރައީސް މުހައްމަދު ނަޝީދު އަވަހާރަކޮށްލުމަށް ބަޔަކު ބޮމެއް ގޮއްވާލައި އެމަނިކުފާނު ވަރަށް ބޮޑަށް ޒަހަމްކޮށްލާފައި ވަނިކޮށެވެ.
ރޭޒަރު ފުށްތަކެއް ލައިގެން ހެދި އައިއީޑީ މި މަހުގެ ހަ ވަނަ ދުވަހު ގޮއްވާލުމުން ނަޝީދުގެ އިތުރުން އެމަނިކުފާނުގެ ތިން ބޮޑީގާޑުންނާއި މަގު ހިނގާފައިފިޔަ ދިވެއްސެއް އަދި އިނގިރޭސިވިލާތުގެ ރައްޔިތަކަށް ވެސް ވަނީ އަނިޔާވެފަ އެވެ.
ނަޝީދުގެ ގެކޮޅު ކެނެރީގެ އާއި މަޖީދީމަގާ ދިމާވާ ކަންމަތީގައި ހުރި ސައިކަލެއްގެ ހަރުކޮށްފައި އޮތް ބޮން ރިމޯޓު ބޭނުންކޮށްގެން ގޮއްވާލާފައި ވަނީ ފާރަލައިގެން ބަލަން ހުރެ އެމަނިކުފާނާ ބޮމާ އެންމެ ކައިރިވި ވަގުތު ބެލުމަށްފަހު އެވެ.
ގާތްގަނޑަކަށް 16 ވަރަކަށް ގަޑިއިރުގެ އޮޕަރޭޝަނަކަށްފަހު ނަޝީދުގެ ހަށިކޮޅުން 10 ރޭޒަރު ފުށް ޑޮކްޓަރުން ނެގި އެވެ. އަދި ހަށިކޮޅުގައި ބޮން ހަރުކޮށްފައި ހުރި ސައިކަލުގެ ޕުލާސްޓިކު ކޮޅެއް ވެސް ތާށިވެފައި އޮތެވެ.
އިތުރު ފަރުވާއަށް މި ބުރާސްފަތި ދުވަހު ނަޝީދު ވަނީ ޖަރުމަނަށް ފުރާވަޑައިގެންފަ އެވެ.
