ކުރީގެ ރައީސް މުހައްމަދު ނަޝީދު އަވަހަރާކޮށްލަން ދިން ބޮމުގެ ހަމަލާއާ ގުޅިގެން މާލޭގެ އިތުރުން އަތޮޅުތަކުގައި ވެސް ސަލާމަތީކަންކަން ވަރުގަދަކޮށްފި އެވެ.
އެމްއެންޑީއެފުން މިރޭ ބުނީ މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކުގައި ސެކިއުރިޓީގެ ކަންކަން ވަރުގަދަކޮށް، ހަތިޔާރާ އެކު ސިފައިން ހަރަކާތްތެރިވަމުން އަންނަ ކަމަށެވެ. އެކަމަކު އެއީ ނަޝީދަށް ދިން ހަމަލައާ ގުޅިގެން އިތުރު ނުރައްކަލެއް އޮވެގެންތޯ ސިފައިން ސާފުކޮށެއް ނުދެ އެވެ.
މިދިޔަ ހަފުތާގެ ބުރާސްފަތިދުވަހުގެ ރޭ ނީލޯފަރުމަގުގައި ބޮމެއް ގޮއްވާލައިގެން ނަޝީދަށް ދިން ހަމަލާއަށް ފަހު މާލެ ތެރެ ބެލެހެއްޓުން ވަރަށް ވަރުގަދަކުރި އެވެ. އެމްއެންޑީއެފުން ބުނީ ޓެރަރިސްޓު ހަމަލާއަކާ ގުޅިގެން ސެކިއުރިޓީ ލެވެލް އެންމެ މަތިކޮށްފައިވާ ކަމަށެވެ. މާލޭގެ ބައެއް މަގުތަކާއި ގޯޅިތައް ބަންދުކޮށް ހަތިޔާރާ އެކު ފޯރިމެރި އެވެ. އެކަމަކު އޭގެތެރެއިން ބައެއް މަގުތައް މިހާރު ވަނީ ހުޅުވާލައިފަ އެވެ.
ސިފައިން ހަތިޔާރާ އެކު މާލޭގައި: ހަރުކަށި ފިކުރުގެ ނުރައްކާ ރާއްޖޭގައި ބޮޑު ކަމަށް ބޮމުގެ ހަމަލާއާ ގުޅިގެން ބޭއްވި ނޫސްވެރިންގެ ބައްދަލުވުމުގައި އެމްއެންޑީއެފުން ވަނީ ބުނެފައި. -- ފޮޓޯ: ހުސެއިން ވަހީދު/ އަދަދު
ސައިކަލެއްގައި ބޮމެއް ހަރުކޮށްގެން އަވަހާރަކޮށްލަން އުޅުނު ނަޝީދަށް އޭޑީކޭގައި ފަރުވާ ދިނުމަށް ފަހު މިއަދު ޖަރުމަނަށް ފުރުވާލީ އެންމެ ހައި ސެކިއުރިޓީގަ އެވެ. ހޮސްޕިޓަލުން އެއާޕޯޓަށް ވަޑައިގެން އެއާއެމްބިއުލެންސަށް އަރާވަޑައިގަތުމާ ހަމައަށް ސިފައިންނާއި ފުލުހުން އެކި ސަރަހައްދުތަކުގައި ތިއްބެވެ.
ނަޝީދަށް ހަމަލާދިން ކަމުގެ ތުހުމަތަށް ތިން މީހަކު ހައްޔަރުކޮށް، ބަންދުގެ މުއްދަތު ދެ ހަފުތާއަށް ވަނީ އިތުރުކޮށްފަ އެވެ. އެ ތިން މީހުން ވެސް ހަރުކަށި ފިކުރާ ގުޅޭ ކަން ފުލުހުން އާއްމުކުރި މައުލޫމާތުތަކުންނާއި ދީނުގެ ނަމުގައި ތަބާވަމުންދާ ކަންތައްތަކުން އެނގެ އެވެ.
މާލެ އާއި ރަށްރަށުގެ ސަލާމަތީކަންކަން ވަރުގަދަކުރިއިރު، ހަރުކަށި ފިކުރުގެ ނުރައްކާ ރާއްޖޭގައި ވަރަށް ބޮޑުވެފައިވާ ކަަމަށް ފުލުހުންނާއި ސިފައިން ވަނީ ބުނެފަ އެވެ. އަމިއްލަ އަށް ބޮން ހެދުމުގެ ގާބިލްކަން ހުރި އަދި އެފަދަ ތަކެތިން މީހުންނަށް ގެއްލުންދޭން ފަސްނުޖެހޭނެ ދަރަޖައަށް ފިކުރު ގޯސްވެފައިވާ ބަޔަކު މުޖުތަމައުގައި ތިބިކަން އެމްއެންޑީއެފުން ބުނެފައިވެ އެވެ.
