މަޝްހޫރު ކުރެހުންތެރިޔާ، ކުޅަދާނަ ޑައިވަރު އަދި އަތްތެރި މަސައްކަތްތަކުގައި އެފަދަ ދެ ވަނަ އެއް ނެތް ފަދަ ފަންނުވެރިޔާ މ. ނޫވިލު، ސަރުދާރު ދޮންމަނިކު (ސަރުދާރު ދޮންބެ) ރޭ ފަތިހު އަވަހާރަވެއްޖެ އެވެ.
އުމުރުން 93 އަހަރުގައި ސަރުދާރު ދޮންމަނިކު އަވަހާރަވީ، ސިއްހީ ހާލުކޮޅު ގޯސްވެ ރޭގެ ވަގުތެއްގައި އޭޑީކޭ ހޮސްޕިޓަލަށް ގެންގޮސް ފަރުވާ ދެމުން އަންނަނިކޮށެވެ. ދޮންމަނިކަށް މިދިޔަ އަހަރު ކޮވިޑް ޖެހިގެން ފަރުވާ ދީފައިވެ އެވެ. އޭނާގެ މައްޗަށް ކުރެވޭ ކަށުނަމާދު އޮންނާނީ މިއަދުގެ މެންދުރު ނަމާދަށް ފަހު އާސަހަރާ މިސްކިތުގަ އެވެ.
ކުރެހުންތެރިކަމުގެ ރޮނގުން 1996 ވަނަ އަހަރު ދިވެހި ސަރުކާރުން އާއްމު ހިދުމަތުގެ ޝަރަފްވެރިކަމުގެ އިނާމް ދީފައިވާ ދޮންމަނިކަކީ، 1950 ގެ އަހަރުތަކުން ފެށިގެން ނުވަދިހައިގެ އަހަރުތަކާ ހަމަޔަށް ރާއްޖޭގައި ހުރި އެންމެ ހުނަރުވެރި އެއް ކުރެހުންތެރިޔާ އެވެ. ގުދުރަތީ މަންޒަރުތަކާއި ޕޯޓްރެއިޓްތައް އޭނާ ކުރައްސަވާފައިވެ އެވެ. އޭގެ ތެރޭގައި ރާއްޖެ ވަޑައިގެންނެވި ބޭރުގެ އިއްޒަތްތެރިންނަށް މަރުހަބާ ކިޔުމަށް ސަރުކާރުގެ ފަރާތުން ކުރެއްސެވި އެ އިއްޒަތްތެރިންގެ ބޮޑެތި ތަސްވީރުތައް ހިމެނެ އެވެ.
ސަރުދާރު ދޮންމަނިކު ކުރައްސަވާފައިވާ ސްޓޭމްޕެއް. --ފޮޓޯ: ހާވޭ ތޯމަސް (ވޮނަދަނަ ރާއްޖެ)
ރާއްޖޭގައި ސްޓެންސިލުން ޗާޕުކޮށްގެން ނޫސްމަޖައްލާތައް ނެރުނުއިރު، ގާތްގަނޑަކަށް ހުރިހާ ނޫސް މަޖައްލާއެއްގެ އިލަސްޓްރޭޝަންތައް ކުރެއްސަވާފައިވަނީ ދޮންމަނިކެވެ. އަދި އެ ދުވަސްވަރު ނެރުނު ސްޓޭމްތަކުގެ އާޓްވޯކް އޭނާ ކުރައްސަވާފައިވެ އެވެ. އަދި މާލޭގައި އެކި މުނާސަބުތަކަށް ތައްޔާރުކުރި ގިޑިގެތައް ހެދުމުގައި ވެސް އިސް ދައުރެއް އަދާކުރެއްވި އެވެ.
ދޮންމަނިކުގެ ކާފަ މާކަނާ ކުޑަތުއްދުދީދީ އަކީ ވެސް ރާއްޖޭގައި އުފެދުނު މޮޅު ކުރެހުންތެރިއެކެވެ.
1960 ގެ އަހަރުތަކުގައި މާލޭގައި ބޭއްވި ކާނިވަލަކަށް ސަރުދާރު ދޮންމަނިކު ތައްޔާރުކުރައްވާފައިވާ ކުޅޭ އެއްޗެހިތަކެއް. --ފޮޓޯ: އައިޝަތު ޝާދިޔާ (ވޮނަދަނަ ރާއްޖެ)
އަތްތެރި މަސައްކަތުގެ މައުރަޒުތަކުން ރަންވަނަތައް ހާސިލްކުރައްވާފައިވާ ދޮންމަނިކު ވަނީ ރާއްޖޭގައި ރެޑީމޭޑް ކުޅޭއެއްޗެހި ލިބެން ނެތް ޒަމާނެއްގައި ބުމަރާއި އެނބުރޭ ބުރަފަތި ތަކެތި ތައްޔާރުކޮށް ވިއްކަވައިފަ އެވެ. އަދި މާލޭގައި ބޭއްވި ކާނިވާތަކަށް ކުޑަކުދިންނަށް އަރައި ބޭނުންކުރެވޭނެ ފަދަ ކުޅޭ އެއްޗެހި ތައްޔާރުކުރައްވައިފައިވެ އެވެ.
ދޮންމަނިކު ހިމެނެނީ ރާއްޖޭގައި އެންމެ ފުރަތަމަ ސްކޫބާ ޑައިވަރުންގެ ތެރޭގަ އެވެ. ޒުވާން ދުވަސްވަރު، ދަގަނޑު ހަރައިގެން މަސް ހިފަން ފީނުއްވި ދޮންމަނިކު ވަނީ ރާއްޖޭގެ ކަނޑުއަޑީގެ މަންޒަރުތައް އޭނާގެ ފިހިން އެތައް ބަޔަކަށް ސިފަކޮށްދެއްވައިފަ އެވެ. އޭނާ ކަނޑުއަޑީގެ ތަސްވީރުތަކާއި މަސްމަހާމެހީގެ ފޮޓޯތައް ކުރައްސަވާފައިވަނީ، ސީދާ އެ މަންޒަރުތައް ލޮލުން ދެކި ތަޖުރިބާކުރެއްވުމަށް ފަހު އެވެ.
