އެމްއެމްޕީއާރުސީގެ ހިޔާނާތުން މަންފާވި ކަމަށް ތަހުގީގީ އިދާރާތަކުން އެކުލަވާލި ލިސްޓުގައި އޮޑިޓަ ޖެނެރަލް ހަސަން ޒިޔަތުގެ ނަން އޮތް ކަން އެނގިއްޖެ އެވެ.
ކުރީގެ ސަރުކާރުގައި ހިންގިި ކޮރަޕްޝަންގެ މައްސަލަ ބެލުން ލަސްވާތީ މަޖިލީހުން އެކަމަށް އިސްނަގައި އެސެޓް ރިކަވަރީ ކޮމިޝަނުން ވަނީ ލިސްޓު ހޯދައިފަ އެވެ. އެ ލިސްޓު އާއްމުކުރަން ނިންމައި އޭގައި ހިމެނޭ، ދައުލަތުގެ އެކި މަގާމްތަކުގައި ތިބި މީހުންގެ މައްސަލަތައް އަވަސްކުރަން ތަހުގީގީ އިދާރާތަކުގައި އެދެން މަޖިލީހުގެ ކޮމިޓީގައި ވަނީ ނިންމައިފަ އެވެ.
މި ލިސްޓުގައި، ސަރުކާރުގެ އިދާރާތަކުގެ މާލީ ކަންކަން އޮޑިޓްކުރައްވާ ޒިޔަތުގެ ނަން ހިމެނިފައިވާ އިރު، އޭނާ މަގަމާ ހަވާލުވެވަޑައިގަތީ 2014 ގަ އެވެ.
މި ހިޔާނާތުގައި ޒިޔަތުގެ ކޮއްކޮ، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތަށް ހުކުމް އިއްވި އެވެ. އެ ހުކުމް ސުޕްރީމް ކޯޓުން ވަނީ ބާތިލްކޮށްފަ އެވެ. އެކަމަކު ޒިޔަތުގެ ތަހުގީގު އަދިވެސް ކުރިއަށް އެބަދެ އެވެ.
ތަހުގީގީ އިދާރާތަކުން ކުރިން އެކުލަވާލި ލިސްޓުގައި ހިމެނުނީ 267 ނަމެކެވެ. އެކަމަކު، ފަހުން ފޮނުވި ލިސްޓުގައި 281 މީހުން ހިމެނެ އެވެ. މަޖިލީހުން އާއްމުކުރަން ނިންމީ ދެ ލިސްޓެއް ވަކިންނެވެ. އެއީ މުޅި ލިސްޓާއި ދައުލަތުގެ އިސް މަގާމްތަކުގައި ތިބި 119 މީހުންގެ ނަން ވަކިންނެވެ.
މަޖިލީހުން އާއްމުކުރަން ނިންމާފައިވާ 281 މީހުންގެ ލިސްޓުގައި ރައްޔިތުންގެ މަޖިލީހުގެ މިހާރާއި އޭރުގެ މެމްބަރުންނާއި ދައުލަތުގެ އިސް މަގާމްތަކުގައި މިހާރު ތިއްބެވި މެމްބަރުންނާއި ކުރީގެ މެމްބަރުން ވެސް ހިމެނެ އެވެ. މިނިވަން މުއައްސަސާތަކާއި ކުންފުނިތަކާއި ޖުޑިޝަރީގެ އެކި މަގާމްތަކުގައި ކުރިން އުޅުއްވި ބޭފުޅުންގެ ނަންތައް ވެސް ހިމެނެ އެވެ.
