ރައީސް މުހައްމަދު މުއިއްޒުގެ އެއްބަނޑު ކޮއްކޮ އަދި ނިލަންދޫ ދާއިރާގެ މަޖިލިސް މެންބަރު ފާތިމަތު ސައުދާގެ އެކައުންޓަށް 2.4 މިލިއަން ރުފިޔާ ނަގުދު ފައިސާއިން ޖަމާކުރި މައްސަލައެއް ފަޅާއަރައިފި އެވެ.
ސައުދާގެ އެކައުންޓަށް މިލިއަނުން ނަގުދު ފައިސާ ޖަމާކުރި މައްސަލަ މަރުކަޒީ ބޭންކަށް ވެސް ފްލެގު ވެފައިވާކަން އަދަދު އަށް ވަނީ އެނގިފަ އެވެ. އަދި މަރުކަޒީ ބޭންކުގެ ފައިނޭންޝަލް އިންޓެލިޖެންސް ޔުނިޓުން އެ މައްސަލަ މިހާރު ބަލަމުންދާކަން ވެސް އެނގިފައިވެ އެވެ.
މި ނޫހުން ގުޅުމުން ސައުދާ ވަނީ އެ ފައިސާ އޭނާގެ އެކައުންޓަށް ޖަމާވެފައިވާނެ ކަމަށް އެއްބަސްވެފަ އެވެ. ސައުދާ ވިދާޅުވީ އެއީ ވިޔަފާރިވެރިއެއްގެ އަތުން އޭނާ ނެންގެވި ސްޓޫޑެންޓް ލޯނެއް ކަމަށެވެ.
"އާދެ، ވިޔަފާރިވެރިއަކު އަތުން ނެގި ސްޓޫޑެންޓް ލޯނެއް އެއީ. ކަމާ ގުޅޭ ހުރިހާ ލިޔުމެއް ވާނީ ބޭންކަށް ހުށަހަޅައިފަ،" ޓެކްސްޓު މެސެޖަކުން ޖަވާބު ދެއްވަމުން ސައުދާ ވިދާޅުވި އެވެ.
އޭނާއަށް ފައިސާ ދިނީ ކޮން ވިޔަފާރިވެރިއެއްތޯ އަދި އެ ފައިސާ ކޭޝްކޮށް، ނުވަތަ ނަގުދު ފައިސާއިން ހަވާލު ކުރީ ކީއްވެތޯ އެހުމުން އެ ސުވާލުތަކަކަށް ސައުދާ މިހާތަނަށް ޖަވާބެއް ނުދެއްވަ އެވެ.
ލޯކަލް ކައުންސިލްތަކުގެ އިންތިހާބު ބޯމަތިވެފައި އޮއްވައި، ވިޔަފާރިވެރިއެއްގެ އަތުން ސައުދާ 2.4 މިލިއަން ރުފިޔާ ނެގިއިރު، އޭނާއަކީ އަހަރަކު މިލިއަނެއްހާ ރުފިޔާގެ އާމްދަނީ ލިބޭ މީހެކެވެ.
އޭނާ މަޖިލީހަށް ހުށަހެޅި މާލީ ބަޔާނުން އެނގޭ ގޮތުގައި އަހަރެއްގެ ތެރޭގައި 990،000 ރުފިޔާ އޭނާއަށް މުސާރައިގެ ގޮތުގައި ވަނީ ލިބިފަ އެވެ. އެކަމަކު މާލީ ބަޔާން ހުށަހެޅިއިރު އެކައުންޓުގައި ހުރީ އެންމެ 78،000 ރުފިޔާ އެވެ.
އެ މައްސަލަ އެންޓި ކޮރަޕްޝަން ކޮމިޝަނުން ބަލަން ފެށިކަމެއް އަދި ނޭނގެ އެވެ. އެކަމަކު، މި ސަރުކާރުގެ ވެރިންނާ ގުޅޭ ގިނަ މައްސަލަތައް އެ ކޮމިޝަނުން ބަލަން ފެށި ނަމަވެސް ކުރިއަށްނުދާކަން އެނގިފައިވެ އެވެ. އޭގެ ތެރޭގައި ސީދާ ރައީސް މުއިއްޒާ ގުޅޭ ކޮރަޕްޝަންގެ ގިނަ މައްސަލަތަކެއް ވެސް ހިމެނެ އެވެ.
