ޕީއެންސީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާ މޫސާ އަލީ ޖަލީލުއަށް އެމްއެމްޕީއާރުސީން ފައިސާ ލިބުނު މައްސަލައިގައި ޕްރޮސެކިއުޓާ ޖެނެރަލްގެ އޮފީހުން ނިންމާފައި އޮތީ އޭނާގެ މައްޗަށް ދައުވާ ނުކުރަންކަން އެނގިއްޖެ އެވެ.
މޫސާ އަލީ ޖަލީލްއަށް އެމްއެމްޕީއާރުސީގެ ފައިސާއިން އެއް މިލިއަން ރުފިޔާ ލިބުނު މައްސަލަ ތަހުގީގު ކުރުމަށްފަހު، އެންޓި ކޮރަޕްޝަން ކޮމިޝަނުން ތައްޔާރުކުރި ރިޕޯޓުގައި ބުނީ، އެމްއެމްޕީއާރުސީން ޖަލީލްއަށް ލިބުނު ފައިސާއަކީ ކުށް ކޮށްގެން ހޯދާފައިވާ ފައިސާކަން ތަހުގީގަށް ހޯދިފައިވާ ކަމަށެވެ. އަދި، އެއީ ކުށް ކޮށްގެން ހޯދާފައިވާ ފައިސާކަން ޖަލީލްއަށް އެނގޭނެކަމަށް ބެލެވޭނެ މިންވަރަށް އެކަށީގެންވާ ސަބަބުތައް ވެސް ހުރިކަމަށް އެ ތަހުގީގުގައި ބުންޏެވެ.
އެމްއެމްޕީއާރުސީން ޖަލީލްއަށް އެއް މިލިއަން ރުފިޔާ ދިނީ ކުރީގެ ނައިބުރައީސް އަހުމަދު އަދީބް މެދުވެރިކޮށެވެ. އެ ފައިސާ ޖަލީލްގެ އަމިއްލަ އެކައުންޓަށް ފައިސާ ޖަމާކޮށް އޭނާގެ އަމިއްލަ ބޭނުމަށް ބޭނުންކުރިކަމަށް ވެސް ތަހުުގީގުން ސާބިތުވެފައިވާ ކަމަށް އޭރު އޭސީސީން ބުންޏެވެ.
އެ މައްސަލައިގައި މޫސާ އަލީ ޖަލީލުގެ މައްޗަށް ދައުވާ ކޮށްދިނުމަށް އެދި ޕީޖީ އޮފީހަށް ފޮނުވުމުން، ދައުވާ ކުރެވޭ މިންވަރަށް ހެކި ނެތްކަމަށް ޕީޖީ އޮފީހުން ނިންމީ 2023 ވަނަ އަހަރު އެވެ.
