ރައީސުލްޖުމްހޫރިއްޔާގެ އިތުރުން ދައުލަތުގެ އަނެއް ދެ ބާރު ކަމަށްވާ ރައްޔިތުންގެ މަޖިލީހުގެ ރައީސާއި އުއްތަމަ ފަނޑިޔާރު ދިރިއުޅުއްވާނެ ރަސްމީ ގެކޮޅެއް ދައުލަތުން ހަމަޖައްސައިދިނުގެ މަސައްކަތް ކުރިއަށް ގެންދަން ރައީސް އިބްރާހިމް މުހައްމަދު ސޯލިހް މިއަދު ނިންމަވައިފި އެވެ.
ރައީސް އޮފީހުގެ ތަރުޖަމާން އިބްރާހިމް މަބްރޫކް އަޒީޒް މިރޭ ވިދާޅުވީ ދައުލަތުގެ ތިން ބާރުގެ ތެރެއިން ރައްޔިތުންގެ މަޖިލީހުގެ ރައީސާއި އުއްތަމަ ފަނޑިޔާރުގެ ސަލާމަތްތެރިކަމާއި ރައްކާތެރިކަން އިތުރަށް ކަށަވަރު ކުރުމަށް ގާނޫނީ ގޮތުން ކުރަން ޖެހޭ މަސައްކަތްތައް ކުރުމަށް ދައުލަތުގެ ބަންޑާރަ ނައިބް އިބްރާހިމް ރިފްއަތަށް ރައީސް އަންގަވާފައިވާ ކަމަށެވެ. މީގެ ތެރޭގައި އެ ބޭފުޅުންނަށް ރަސްމީ ގެކޮޅު ހަމަޖެއްސުން ހިމެނޭ ކަަމަށް ވިދާޅުވި އެވެ.
އޭގެ އިތުރުން ސަލާމަތްތެރިކަމާއި ރައްކާތެރިކަމުގެ ފިޔަވަޅުތައް އިތުރަށް ވަރުގަދަކުރަން ގާނޫނީ ގޮތުން ކުރަން ޖެހޭ ކަންކަން އާ ގާނޫނެއްގެ ތެރެއިން ނަމަވެސް ކުރަން ބަންޑާރަ ނައިބަށް އިރުޝާދު ދެއްވާފައިވާ ކަމަށް މަބްރޫކް ވިދާޅުވި އެވެ.
ދައުލަތުން މިހާރު ހަމަޖައްސައިދީފައި ވަނީ ރައީސުލްޖުމްހޫރިއްޔާ ދިރިއުޅުއްވާނެ ރަސްމީ ގެކޮޅެކެވެ. މަޖިލީހުގެ ރައީސާއި އުއްތަމަ ފަނޑިޔާރު ދިރިއުޅުއްވަނީ އެ ބޭފުޅުންގެ އަމިއްލަފުޅު ގެކޮޅުގަ އެވެ.
މަޖިލިސް ރައީސާއި އުއްތަމަ ފަނޑިޔާރަށް ދައުލަތުން ރަސްމީ ގެކޮޅު ހަމަޖައްސައިދޭން ރައީސް މި ނިންމެވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާއެއް ދީފައި ވަނިކޮށެވެ. ސެކިއުރިޓީންނާ އެކު އެމަނިކުފާނު ގެކޮޅުން ނުކުމެވަޑައިގެން ކާރުކޮޅަށް އަރާ ވަޑައިގަންނަވަނިކޮށް ބޮމެއް ގޮއްވާލައި ދިން ހަމަލާގައި ލިބިވަޑައިގަތް ޒަހަމްތަކަށް އޭޑީކޭގައި އަންނަނީ ފަރުވާ ދެމުންނެވެ.
މި ހަމަލާއަށް ފަހު އެމަނިކުފާނުގެ ސަލާމަތީ ކަންކަން އެންމެ ރަނގަޅަށް ބެލެހެއްޓުނުތޯ ސުވާލު އުފައްދައި އެކަންކަން އިތުރަށް ރަނގަޅުކުރަން ހުރި ކަންކަމާ ގުޅޭ ގޮތުން ކަމާބެހޭ އިދާރާތަކުން ވަނީ މަޝްވަރާކޮށްފަ އެވެ.
ނަޝީދު ދިރިއުޅުއްވާ ކެނެރީގެއަކީ ހަނި ގޯޅިއެއްގައި ހުންނަ ގެއެއް ކަމުން އެތަނަށް ކާރުކޮޅެއް ނުވެއްދެ އެވެ. ސެކިއުރިޓީ ބަލައްޓަން އުނދަގޫވުމާއި ރައްކާތެރިކަމަށްޓަކައި ސިފައިން ވަނީ އެ ގޯޅީގައި ޕާކް ނުކުރެވޭ ގޮތް ހެދުމަށް ސަރުކާރުގެ އިދާރާތަކުގައި އެދިފަ އެވެ. އެކަމަކު ހަމަލާ އަމާޒުވިއިރު އެކަން އޮތީ ހަމަނުޖެހި އެވެ.
