ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާ ގުޅިގެން އެމަނިކުފާނަށް ސެކިއުރިޓީ ފޯރުކޮށްދިން ގޮތުގެ ރިޕޯޓު އެމްއެންޑީއެފުން ފޮނުވާފައިވާ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
މިދިޔަ ބުރާސްފަތި ދުވަހުގެ ރޭ ބޮމެއް ގޮއްވާލައިގެން ރައީސް ނަޝީދު އަވަހާރަކޮށްލަން ދިން ހަމަލާއާ ގުޅިގެން އެމަނިކުފާނަށް އެމްއެންޑީއެފްގެ ފަރާތުން ފޯރުކޮށްދޭ ސެކިއުރިޓީއާމެދު ގިނަ ބަޔަކު ދަނީ ސުވާލު އުފައްދަމުންނެވެ.
އަދި އެ ހަމަލާއާގުޅޭ އެއްވެސް އިންޓެލިޖެންސް މައުލޫމާތެއް ފުލުހުންގެ އިތުރުން އެމްއެންޑީއެފަށް ލިބިފައިނުވާކަމަށް ބުނެފައިވާއިރު، އެކަމާ ގުޅިގެން ވެސް ފާޑުކިޔުން ވަނީ އަމާޒުވެފަ އެވެ.
ރައީސް ނަޝީދަށް ދިން ހަމަލާއާ ގުޅޭ އެންމެ ފަހުގެ މައުލޫމާތު އެމްޑީޕީގެ ގައުމީ މަޖިލީހާ ހިއްސާކުރުމަށް ޒޫމް މެދުވެރިކޮށް މިރޭ ބައްދަލުވުމުގައި ރައީސް ވިދާޅުވީ ފުލުހުންނާއި ސިފައިންގެ އިންޓެލިޖެންސްގެ އޮޑިޓެއް ހަދަން ނެޝަނަލް ސެކިއުރިޓީ ކައުންސިލް މެދުވެރިކޮށް އެދިވަޑައިގެންފައިވާ ކަމަށެވެ.
ރައީސް ވިދާޅުވީ އެމަނިކުފާނަށް ގަބޫލު ކުރެއްވޭ ގޮތުގައި އިންޓެލިޖެންސް މިހާރަށް ވުރެ ރަނގަޅު ކުރަން ޖެހޭ ކަމަށެވެ. އަދި ސަލާމަތީ ކަންކަން ވެސް މިހާރަށް ވުރެ ރަނގަޅުވާން ޖެހޭ ކަމަށް ވިދާޅުވި އެވެ.
"އެމްއެންޑީއެފުން ރައީސް ނަޝީދުގެ ސެކިއުރިޓީއާ ބަލަހައްޓަމުން ގެންދިޔަ ގޮތާ ގުޅޭ ތަފްސީލީ ރިޕޯޓެއް އަޅުގަނޑަށް މިހާރު ވަނީ ލިބިފަ،" އޭގެ ތަފްސީލެއް ނުދެއްވާ އެމަނިކުފާނު ވިދާޅުވި އެވެ.
އޭގެ އިތުރުން، ދައުލަތުގެ ފަރާތުން ސެކިއުރިޓީ ފޯރުކޮށްދޭ ހުރިހާ ފަރާތްތަކެއްގެ ސެކިއުރިޓީ ރޭވިފައިވާ ގޮތުގެ ރިޕޯޓެއް ހެދުމަށް ވެސް ސިފައިންނާ ހަވާލު ކުރައްވާފައިވާ ކަމަށެވެ.
މިރޭގެ ބައްދަލުވުމުގައި ރައީސް ވިދާޅުވީ އެ ހަމަލާއާ ގުޅިގެން ކުރެވެމުންދާ ތަހުގީގުގައި ބޮޑެތި ކުރިއެރުންތައް ހޯދިފައިވާ ކަމަށެވެ.
މިގޮތުން، ބޮން ގޮއްވާލި މީހާއި އެ ހަމަލާގައި ސީދާ ގޮތުން ބައިވެރިވި ދެ މީހަކު ހައްޔަރުކުރެވިފައިވާކަން ފާހަގަކުރައްވަމުން ރައީސް ވިދާޅުވީ ފުލުހުން މިހާރު ވެސް ގެންދަނީ ކަމާގުޅުން ހުރި ފަރާތްތަކާއި ސުވާލުކޮށް ހެކި ހޯދުމުގެ މަސައްކަތް ކުރަމުން ކަމަށެވެ.
އަދި ތަހުގީގާ ގުޅޭ މައުލޫމާތުތައް ޕޮލިސް ކޮމިޝަނަރު ގެންދަވަނީ ވަގުތުން ވަގުތަށް އެމަނިކުފާނާ ހިއްސާކުރައްވަމުން ކަމަށާއި، މަޖިލީހުގެ 241 ކޮމިޓީއާ ވެސް ކޮންމެ 24 ގަޑިއިރަކުން ތަހުގީގު މައުލޫމާތު ހިއްސާ ކުރެވެމުންދާ ކަމަށް ވިދާޅުވި އެވެ.
ރައީސް މިރޭ ވިދާޅުވި ގޮތުގައި، ބޭރުގެ މާހިރުންގެ އެހީތެރިކަމާ އެކު ކުރަމުން އަންނަ ތަހުގީގުގައި ޕްރެސެކިޔުޓާ ޖެނެރަލްގެ އޮފީހުގެ ހާއްސަ ޓީމަކުން މަސައްކަތް ކުރަމުން އެބަދެ އެވެ.
އެ ހަމަލާއާ ގުޅިގެން މިހާތަނަށް ތިން މީހުން ފުލުހުން ވަނީ ހައްޔަރުކޮށްފަ އެވެ.
ރައީސް ނަޝީދަށް ދިން ހަމަލާއާ ގުޅިގެން މިހާތަނަށް ހައްޔަރުކޮށްފައިވާ ތިން މީހުން. -ފޮޓޯ: އަބްދުﷲ ޝަފީއު/ އަދަދު
އޭގެ ތެރޭގައި ބޮން ގޮއްވާލި ކަމަށް ބެލެވޭ މީހާ އާއި، އެ ހަމަލާއާ ސީދާ ގުޅުން ހުރި އިތުރު ދެ މީހުން ހިމެނެ އެވެ. އެ ތިން މީހުންގެ ކުށުގެ ރެކޯޑް އޮތް އިރު، މިކަމުގައި ތަހުގީގު ކުރިއަށް ގެންދަނީ އިތުރު ބައެއްގެ ބައިވެރިވުން އޮތް ކަމަށް ބަލައިގެން ކަމަށް ވެސް ފުލުހުން ބުނެފައިވެ އެވެ.
ރައީސް ނަޝީދަށް ދިން ހަމަލާއަކީ ރާއްޖޭގައި މިހާތަނަށް ދެވުނު އެންމެ ނުރައްކާތެރި ޓެރަރިސްޓު ހަމަލާގެ ގޮތުގައި ސިފަކުރައްވަމުން، ފުރިހަމަ ތަހުގީގެއްގެ ތެރެއިން މިކަމުގައި ޝާމިލުވާ ހުރިހާ ފަރާތްތަކެއް ހައްޔަރުކޮށް އިންސާފުގެ ކުރި މައްޗަށް ގެންނާނެ ކަމުގެ ޔަގީންކަން އެމަނިކުފާނު ދެއްވި އެވެ.
