ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާ ރޭވި މީހުންނާއި އެ ހަމަލާގައި ކުޑަ ނަމަވެސް ރޯލެއް އަދާކޮށްފައިވާ މީހެއް ހުރި ނަމަ އެ އެންމެން ވެސް ހައްޔަރު ކުރާނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެ އެވެ.
ސައިކަލެއްގައި ހަރުކޮށް، ރިމޯޓު ބޭނުންކޮށްގެން ގޮއްވާލި ބޮމުގެ ހަމަލާގައި ނަޝީދަށް ވަރަށް ބޮޑަށް އަނިޔާވެވަޑައިގެންފައިވެ އެވެ. ބޮމުން ލިބޭ ގެއްލުން ބޮޑުކުރުމަށްޓަކައި އަޅާފައި ހުރި ބެއަރިން ބޯލްސް ނުވަތަ ރޭޒަރު ފުށްތަކުގެ 11 އެތިކޮޅު ނަޝީދުގެ ހަށިކޮޅުން ޑޮކްޓަރުން ނެގި އެވެ.
ނަޝީދަށް ހަމާލިން މައްސަލައިގައި ފުލުހުން މިހާތަނަށް ހައްޔަރުކޮށްފައި ވަނީ މުޖާޒް އަހުމަދު، 21، އާއި ތަހުމީން އަހުމަދު، 32، އާއި އަހުމަދު އަދުހަމް ރަޝީދު، 25، އެވެ.
އަދުހަމަކީ ބޮން ގޮއްވި ސަރަހައްދުގައި ހަރަކާތްތެރިވެ ރިމޯޓު ބޭނުންކޮށްގެން އެ ގޮއްވާލި މީހާ ކަމަށް ފުލުހުން ވަނީ ބުނެފަ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ޕޮލިސް ކޮމިޝަނަރު ހަމީދު ވިދާޅުވީ ތަހުގީގުގެ ފޯކަހަކީ ހަމައެކަނި ގޮން ގޮއްވާލި މީހުން ހައްޔަރު ކުރުން ނޫން ކަމަށާއި އެކަން ރޭވި މީހުން ވެސް ހޯދާނެ ކަމަށެވެ.
"މިހާރު މި ހައްޔަރު ކުރީ އެންމެ ތިން ފަރާތެއް. ތަހުގީގުގެ ސްކޯޕް އޮތީ ހަމައެކަނި މި ޑިވައިސް ގޮއްވާލައިގެން މިކަން ކުރި ފަރާތްތައް ހޯދާފަ ނިންމާލާކަށެއް ނޫން. ތަހުގީގުގެ ސްކޯޕަކީ މީގަ ހިމެނޭ ހުރިހާ ފަރާތްތަކެއް ހޯދާ އެމީހުންނާ ދޭތެރޭގައި ގާނޫނުން އަޅަންޖެހޭ ފިޔަވަޅު އެޅުން،" އޭނާ ވިދާޅުވި އެވެ.
ހަމީދު ވިދާޅުވި ގޮތުގައި ބޮމުގެ ހަމަލާ ރޭވި މީހުންނާއި އެކަމުގައި އެއްވެސް ރޯލެއް އަދާކޮށްފައިވާ ފަރާތްތަކެއްވާ ނަމަ އެބަޔަކާ ދިމާލަށް ފުލުހުން ދާނެ އެވެ.
"މި ތަހުގީގުގައި މިކަން ކޮންސްޕަޔާ ކުރި މީހުން، ރޭވުމުގަ ހަރަކާތްތެރިވި މީހުން ނުވަތަ މިފަދަ ޓެރަރިސްޓު ހަމަލާއެއް ބަޔަކު މީހުން ބޭނުންކޮށްގެން ނުވަތަ ބައެއްގެ ތެރޭގައި ރާވައިގެން ހިންގުމަށްޓަކައި ބައިވެރިވި ނުވަތަ އެކަމުގައި ރޯލެއް އަދާ ކޮށްފައިވާ ފަރާތެއްވާ ނަމަ އެ ހުރިހާ ފަރާތްތަކެއްގެ ފަހަތުން އަޅުގަނޑުމެންގެ ތަހުގީގު ދާނެ،" ހަމީދު އިންޒާރު ދެއްވި އެވެ.
ހައްޔަރުކޮށްފައިވާ ތިން މީހުންނަކީ ވެސް ހަރުކަށި ފިކުރުމުގެ މީހުން ކަމަށް ފުލުހުން ބުނެ އެވެ. ނަމަވެސް މިހާތަނަށް ޓެރަރިސްޓު އެއްވެސް ނެޓުވޯކަކާ ހައްޔަރު ކުރި މީހުންނާ ގުޅުމެއް އޮތްކަން ތަހުގީގަށް މިހާތަނަށް އެނގިފައި ނެތް ކަމަށް ވެސް ފުލުހުން ބުންޏެވެ.
ނަޝީދުގެ އިތުރުން އެމަނިކުފާނުގެ ތިން ބޮޑީގާޑުންނާއި މަގުމަތިން ދިޔަ ދިވެއްސެއްގެ އިތުރުން އިނގިރޭސިވިލާތުގެ މީހަކަށް ވަނީ އަނިޔާވެފަ އެވެ.
