ޓެރަރިޒަމްގެ އަމަލުތަކަށް ސޯޝަލް މީޑިޔާގައި ތާއީދުކޮށް، ހިތްވަރުދީ ހަދާ ފަރާތްތަކާމެދު ގަނޫނީ ފިޔަވަޅު އަޅާނެކަމުގެ އިންޒާރު ފުލުހުން މިއަދު ދީފި އެވެ.
ރައްޔިތުންގެ މަޖިލީހުގެ ރައީސް ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއަށްފަހު ދީނީ ހަރުކަށި ފިކުރުގެ ބަޔަކު ސޯޝަލް މީޑިއާގައި އެ ހަމަލާއަށް ހިތްވަރުދީ ޓެރަރިޒަމްގެ ޝުއޫރުތައް ފާޅުކުރަމުންދާކަން ވަނީ ފާހަގަކުރެވިފަ އެވެ.
އެގޮތުން ނަޝީދަށް ދިން ހަމަލާއަކީ އިސްލާމް ދީނަށް ލިބުނު ނަސްރެއް ކަމަށް ބައެއް މީހުން ބުނެފައިވެ އެވެ. ނަޝީދަކީ ލޭ ހުއްދަ މީހެއް ކަމަށް ވެސް ބައެއް މީހުން ބުނެފައިވެ އެވެ. އަދި ވަރަށް ގިނަ ބަޔަކު އެފަދަ ލިޔުންތައް ޝެއާކޮށް ލައިކުކޮށް ހަދާފައިވެ އެވެ.
ފުލުހުންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އެކަމަށް އިޝާރާތް ކުރައްވައި އެސިސްޓެންޓް ޕޮލިސް ކޮމިޝަނަރު މުހައްމަދު ރިޔާޒް ވިދާޅުވީ ޓެރަރިޒަމްގެ އަމަލުތަކަށް އެއްވެސް ސިފައެއްގައި ތައުރީފު ކުރުމާއި، ހިތްވަރު ދިނުމާއި، ނުވަތަ ތާއީދުކުރާ ކުރުމަކީ ޓެރަރިޒަމްގެ ގާނޫނުގެ ދަށުން ވެސް މަނާކޮށްފައިވާ ކަމެއް ކަމަށެވެ.
އަދި އެއީ އެހެނިހެން ގާނޫނުތަކުން ވެސް އަދަބު ކަނޑައެޅިފައިވާ ޖިނައީ ކުށެއްކަން ރިޔާޒް ވަނީ ހަނދާން ކޮށްދެއްވައިފަ އެވެ.
އިތުރަށް ވިދާޅުވީ ކާކުކަން އެނގޭ ގޮތަށާއި އަދި ނޭނގޭ ގޮތަށް ވެސް ސޯޝަލް މީޑިއާ އެކައުންޓުތަކުން ޓެރަރިޒަމަށް ހިތްވަރު ދޭ ގޮތަށް ކޮށްފަ ހުރި ޕޯސްޓުތަކާއި ކޮމެންޓުތަކުގެ މައުލޫމާތު ނަގައި އެއީ ކޮން ބައެއްތޯ ބަލައި، އެ މައުލޫމާތުތައް އެއް ކުރަމުން އަންނަ ކަމަށެވެ.
"މިގޮތަށް ޓެރަރިޒަމްގެ އަމަލުތަކަށް ހިތވަރު ލިބިދޭ ގޮތަށް ކޮމެންޓުކޮށް ނޫނީ ތާއިދުކޮށް، އެމީހުންގެ މައްޗަށް ހަމްދަރުދީ އޮތްކަން ދައްކައިދޭ ކަހަލަ ކޮމެންޓް ކުރާ ފަރާތްތަކުގެ މައްސަލަ ބަލައި އެފަރާތްތަކާ މެދު އަޅަންޖެހޭ ގާނޫނީ ފިޔަަވަޅު އަޅާނެ ކަމުގައި ދަންނަވާލަން،" އޭނާ ވިދާޅުވި އެވެ.
އެ ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރު މުހައްމަދު ހަމީދު ވެސް ވިދާޅުވީ ސޯޝަލް މީޑިޔާގެ އިތުރުން ރައީސް ނަޝީދަށް ދިން ހަމަލާއާ ގުޅިގެން ނޫސްތަކުގައި ޝާއިއުކުރެވިފައިވާ ބައެއް ހަބަރުތަކަށް އެ ހަމަލާއަށް ތާއިދުކޮށް ކޮމެންޓުތައް ކުރަމުން އަންނަކަން ފާހަގަކުރެވިފައިވާ ކަމަށެވެ.
އެގޮތުން، އެފަދަ ކޮމެންޓުތަކާއި ޕޯސްޓުތައް މޮނިޓާކޮށް އެ މައުލޫމާތު އެއް ކުރަމުން އަންނަ ކަމަށް ހަމީދު މިއަދު ވިދާޅުވި އެވެ.
މިދިޔަ ބުރާސްފަތި ދުވަހުގެ ރޭ ނަޝީދަށް އަމާޒުކޮށް ގޮއްވާލި އައިއީޑީގެ ސަބަބުން އެމަނިކުފާނަށް ވަރަށް ބޮޑަށް އަނިޔާވެ، ހަށިކޮޅުގެ ގިނަ ސާޖަރީތަކެއް ހަދަންޖެހުނެވެ. ބޮމުގެ ތެރެއަށް ލާފައި އޮތް 11 ބެއަރިން ބޯލްސް ނުވަތަ ރޭޒަރު ފުއް އަދި ބޮން ހަރުކޮށްފައި އޮތް ސައިކަލުގެ ޕުލާސްޓިކުކޮޅެއް ވެސް ނަޝީދުގެ ހަށިކޮޅުން ޑޮކްޓަރުން ނެގި އެވެ.
އެ ހަމަލާއާ ގުޅިގެން އިއްޔެ ދެ މީހަކު ހައްޔަރުކޮށްފައިވާއިރު، މި ހަމަލާގައި އިސްކޮށް ހުރި ކަމަށް ފުލުހުން ތުހުމަތު ކުރާ މީހާ ވެސް މިއަދު ހެނދުނު ހުޅުމާލޭން ވަނީ ހައްޔަރުކޮށްފަ އެވެ.
މަސްތުވާތަކެއްޗާއި ވައްކަން ފަދަ އާއްމު ކުށްތަކުގެ ރެކޯޑް އޮންނަ އެ ތިން މީހުންގެ ބަންދުގެ މުއްދަތު ކްރިމިނަލް ކޯޓުން ވަނީ 15 ދުވަހަށް އިތުރުކޮށްދީފަ އެވެ.
އެ ތިން މިހުންނަކީ ވެސް ހަރުކަށި ފިކުރާ ގުޅުންއޮތް މީހުން ކަމަށް މިހާތަނަށް ތަހުގީގަށް ހޯދިފައިވީ ނަމަވެސް، ބޭރުގެ ޓެރަރިސްޓު ޖަމާއަތަކާ ގުޅުންއޮތް ކަމެއް އަދި ފުލުހުންނަށް ޔަގީންކުރެވިފައެއް ނުވެ އެވެ.
ނަމަވެސް، އެ ހަމަލާގެ ސީދާ މޯޓިވްގެ އިތުރުން ޝާމިލުވާ ހުރިހާ ފަރާތްތައް ވަރަށް އަވަހަށް ދެނެގަނެވޭނެކަމަށް ބުނެފައިވެ އެވެ.
