ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ހަމަލާދިން މައްސަލާގައި ހައްޔަރުކޮށްފައިވާ ގއ. ކޮނޑޭ، ފޮޅޭމާ ތަހުމީން އަހުމަދަކީ ގޮއްވާލި ސައިކަލްގެ ވެރިމީހާކަން ޔަގީންވެއްޖެ އެވެ.
އިއްޔެ ހަމަލާއާ ގުޅިގެން 32 އަހަރުގެ ތަހުމީންގެ އިތުރުން މއ. ފޭރުގެ މުޖާޒް އަހުމަދު ވެސް ހައްޔަރުކުރި އެވެ. އޭގެތެރެއިން އެކަކީ ސައިކަލްގެ ވެރިމީހާ ކަމަށް އިއްޔެ ފުލުހުން ބުނެފައިވީ ނަމަވެސް، އެ ތަނުން އެމީހަކީ ކޮބައި ކަމެއް ސާފެއް ނުކޮށްދެ އެވެ.
"އަދަދު"އަށް ކަށަވަރުވެފައިވާ ގޮތުގައި އިއްޔެ ހުޅުމާލޭން ހައްޔަރުކޮށްފައިވަނީ ތަހުމީނެވެ. އަދި، އޭނާއަކީ ގޮއްވާލި ނޫކުލައިގެ ވޭވް ސައިކަލްގެ ވެރިމީހާ އެވެ. ދެން ހައްޔަރުކުރި މުޖާޒަކީ ގޮއްވާލުމުގައި ބައިވެރިވި ކަމުގެ ތުހުމަތަށް ހައްޔަރުކުރި މީހެކެވެ.
އިއްޔެ އޭސީޕީ މުހައްމަދު ރިޔާޒު ވިދާޅުވި ގޮތުގައި، ގޮއްވާލި ސައިކަލްގެ ނަންބަރު އޮޅުވާލައި، އިންޖީނުގެ ނަންބަރު ވެސް ފޮހެލުމަށް މަސައްކަތްތަކެއް ކޮށްފައި ހުއްޓެވެ. އެ ސައިކަލް ގެއްލުނު ކަމުގެ ރިޕޯޓެއް ނެތްކަން ވެސް އޭނާ ފާހަގަކުރެއްވި އެވެ.
އިތުބާރު ހިފޭ މަސްދަރަކުން މައުލޫމާތު ދީފައިވާ ގޮތުގައި ސައިކަލުގައި ބޭނުންކޮށްފައި ހުރި AA0F P6758 ނަންބަރު ޕްލޭޓަކީ ޓްރާންސްޕޯޓު މިނިސްޓްރީގެ ރެކޯޑުތަކުން ދައްކާ ގޮތުގައި ޕީ.ސީ.އެކްސް. ބްރޭންޑުގެ ސައިކަލެެއްގެ ނަންބަރު ޕްލޭޓެކެވެ. އެކަމަކު އެއްޗެއް ގޮއްވާލި ހާދިސާގައި މި ނަންބަރު ޕުލޭޓް ހަރުކޮށްފައި ވަނީ ވޭވް125 ސައިކަލެއްގަ އެވެ.
ފުލުހުން ވަނީ މިއަދު ހެނދުނު ވެސް މައްސަލާގައި މީހަކު ހައްޔަރުކޮށްފަ އެވެ. އެމީހާއަކީ ރައީސް ނަޝީދަށް ހަމަލާ ދިނުމަށް ޑިވައިސް ގޮއްވާލި ކަމަށް ތުހުމަތުވާ މީހާ އެވެ. މިއަދު ހެނދުނު އެ ތުހުމަތަށް ހުޅުމާލޭން ހައްޔަރުކޮށްފައިވަނީ ވ. ތިނަދޫ، ހިޔާ އަދުހަމް އަހްމަދެވެ.
