ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ޓެރަރިސްޓް ހަމަލާއެއް ދިން މައްސަލާގައި ދެ މީހަކު ހައްޔަރުކޮށްފި އެވެ.
އެނގިފައިވާ ގޮތުގައި އެ ދެ މީހުން ވެސް ހައްޔަރުކޮށްފައިވަނީ މީގެ އިރުކޮޅެއް ކުރިންނެވެ.
ފުލުހުން މިހާރު ވެސް ގެންދަނީ އަލިކިލޭގެފާނު މަގުގައި ހުރި ގޯޅިއެއްގެ ތެރޭގައި ހުރި ގެއެއް ބަލާފާސްކުރުމުގެ އޮޕަރޭޝަނެއް ހިންގަމުންނެވެ.
ދެ މީހަކު ހައްޔަރުކޮށްފައިވާކަން ފުލުހުން ކަށަވަރުކޮށްދީފައިވީ ނަމަވެސް، އެކަމާ ގުޅޭ އިތުރު ތަފްސީލެއް ނުދެ އެވެ. ފުލުހުން ބުނި ގޮތުގައި މިއަދު މެންދުރުފަހު ނޫސްވެރިންގެ ބައްދަލުވުމެއް ބާއްވާ ތަފްސީލްތައް ހިއްސާ ކުރާނެ އެވެ.
"އަދަދު"އަށް އެނގިފައިވާ ގޮތުގައި ހައްޔަރުކޮށްފައިވަނީ ސައިކަލްގެ ވެރިމީހާ އާއި ޑިވައިސް ގޮއްވާލި މީހާ އެވެ.
ކޮމިޝަނާ އޮފް ޕޮލިސް މުހައްމަދު ހަމީދު އިއްޔެ ވިދާޅުވި ގޮތުގައި، ހަމަލާއާ ގުޅޭ ހަތަރު މީހަކު މިހާރު ވަނީ ފާހަގަ ކުރެވިފަ އެވެ. އެމީހުން ހައްޔަރު ކުރުމުގެ މަސައްކަތް ކުރިއަށް ގެންދާ ކަމަށް އިއްޔެ ހަމީދު ވިދާޅުވެފައިވެ އެވެ.
ވަރުގަދަ މި ހަމަލާގެ އެއްވެސް މައުލޫމާތެއް އިންޓެލިޖެންސް މައުލޫމާތެއް ލިބިފައެއް ނުވެ އެވެ.
ނަޝީދު އަވަހާރަކޮށްލަން އައިއީޑީ ގޮއްވާލީ ދިރިއުޅުއްވާ ގެކޮޅު ކައިރީގައި ހުރި ސައިކަލުގެ މަޑިދަށުގައި ބާއްވައިގެންނެވެ. ކެނެރީގެ ހުންނަ ނީލޯފަރުހިނގުމުން އެމަނިކުފާނު ހިންގަވާފައި މަޖީދީ މަގުގައި އޮތް ކާރުކޮޅާ ހަމައަށް 8:27 ގައި ފޯރުމާ އެކު އައިއީޑީ ގޮއްވާލުމުން ލިބުނު ޒަހަމްތަކާ އެކު ބިންމައްޗަށް ވެއްޓިވަޑައިގަތީ އެވެ. އެކުގައި ތިއްބެވި ސެކިއުރިޓީންނަށް ވެސް އަނިޔާވި އެވެ.
ޗީފް އޮފް ޑިފެންސް ފޯސް އަބްދުﷲ ޝަމާލު ވިދާޅުވި ގޮތުގައި، ރައީސް ނަޝީދަށް ހަމަލާދިނީ ކޮމާންޑް ޑިޓޮނޭޝަނަކުންނެވެ. އެއީ، މީހެއްގެ މޫވްމަންޓް ބަލާފައި ރިމޯޓް ކޮންޓްރޯލް ޑިވައިސަކުން ގޮއްވާލުމެވެ.
"މިއީ ޓައިމްކޮށްފައި އޮތް އައިއީޑީއެއް ނޫން. ފޯނަކަށް ވުރެން ބޮޑަށް ލަފާކުރެވެނީ ގޭމްކުޅޭށާއި އެކި ކަހަލަ ކަންކަމަށް ބޭނުންކުރާ ޑިވައިސަކުން ގޮއްވާލީ ކަމަށް." އޭނާ ވިދާޅުވި އެވެ.
މި އައިއީޑީގެ ބާރު، ޝަމާލް ވިދާޅުވި ގޮތުގައި، 2007 ގައި ސަލްޓަންޕާކުގައި ގޮއްވާލި އައިއީޑީއަށް ވުރެ އެތައް ގުނައެއް ބާރުގަދަ އެވެ. ބްލާސްޓް އިފެކްޓާއި އަޑު ވެސް ބާރުގަދަ ކަމަށާއި އޭގެ ތެރެއަށް ލާފައި ހުރީ ރޭޒާ ފުށްތަކެކެވެ. އެއީ ހަމަލާ އަމާޒުކުރާ މީހާއަށް ގެއްލުން ބޮޑު ކުރުމަށް ލާފައި ހުންނަ އެއްޗިއްސެވެ.
