ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް ދިން ޓެރަރިސްޓް ހަމަލާ ތަހުގީގު ޓީމުގައި އިސްކޮށް ހުންނެވީ، އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒެވެ.
ހަމަލާގެ ތަހުގީގާ ގުޅޭ ގޮތުން ނޫސްވެރިންނަށް މައުލޫމާތު ދިނުމަށް މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ވެސް ބައިވެރިވެވަޑައިގެންނެވި ރިޔާޒަކީ މީގެކުރިން ވެސް މިފަދަ ބޮޑެތި މައްސަލަތަކުގައި ތަހުގީގުގައި އިސްކޮށް ހުންނެވި ބޭފުޅެކެވެ.
ރިޔާޒު އިސްކޮށް ތަހުގީގު ހިންގެވި ބައެއް ބޮޑެތި މައްސަލަތަކުގައި ކޯޓުގައި ކާމިޔާބު ވެސް ކޮށްފައިވެ އެވެ.
މިހާރު ވެސް ބޮޑެތި އެހެން ތަހުގީގުތަކުގައި ރިޔާޒު އިސްކޮށް އުޅުއްވަ އެވެ. އޭގެ ތެރޭގައި ޑްރަގް މައްސަލަތަކާއި ހަރުކަށި ފިކުރާ ދެކޮޅު އޮޕަރޭޝަންތައް ހިމެނެ އެވެ.
މިފަހުން ހިނގައިދިޔަ ބޮޑެތި މަރުތަކާ ގުޅޭ މައްސަލަތަކުގެ ތަހުގީގުތަކުގައި އޭނާ ބައިވެރިވެވަޑައިގެންފައި ނުވެ އެވެ. އެގޮތުން، ނޫސްވެރިޔާ އަހުމަދު ރިލްވާން ގެއްލުވާލި މައްސަލަ އާއި ބްލޮގާ ޔާމީން ރަޝީދުގެ މަރުގެ މައްސަލާގައި ތަހުގީގުތައް ހިންގިއިރު އޭނާ ހުރީ ފުލުހުންގެ ވަޒީފާއިން ވަކިކޮށްފަ އެވެ.
ރައީސް ނަޝީދަށް ދިން ހަމަލާގެ ތަހުގީގު ކުރިއަށްދާއިރު، ޝައްކު ކުރެވޭ ހަތަރު މީހަކު ފާހަގަ ކުރެވިފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވަނީ ވިދާޅުވެފަ އެވެ. ނަމަވެސް، އެމީހުންނާ ގުޅޭ ތަފްސީލެއް ފުލުހުން ނުދޭއިރު މިހާތަނަށް އެއިން މީހަކު ހައްޔަރުކޮށްފައެއް ވެސް ނުވެ އެވެ.
ނަޝީދަށް ރޭ ހަމަލާދިނީ މަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށް ނީލޯފަރުމަގުގައި ހަމަލާ ދިނީ ވޭވް ސައިކަލްގައި އެއްޗެއް ގޮއްވާލައިގެންނެވެ. އެ ސައިކަލް ހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
މިއަދު ރިޔާޒު ވިދާޅުވި ގޮތުގައި، ގޮއްވާލި އެތި ހަރުކޮށްފައިހުރި ސައިކަލްގެ މައުލޫމާތުތައް މިހާރު ހޯދިފައިވާ ކަމަށެވެ. ގޮއްވާލި ޑިވައިސްގައި މިލިޓަރީ ލެވެލްގެ އާލާތްތައް ނެތް ނަމަވެސް، އާންމުކޮށް ގޮއްވާލަން ބޭނުން ކުރާ އާލާތްތައް ބޭނުންކޮށްފައި ހުރިކަން ރިޔާޒު ފާހަގަ ކުރެއްވި އެވެ.
