ޓެރަރިޒަމްގެ ނުރައްކާތެރި ހަމަލާ ދެވޭވަރުގެ ބަޔަކު މިހާރު ވެސް މޮނިކޮން އަމުރުގެ ދަށުން ފުލުހުން މޮނީޓާ ކުރަމުން އަންނަކަން "އަދަދު" އަށް އެނގިއްޖެ އެވެ.
"އަދަދު" އަށް އެނގިފައިވާ ގޮތުގައި ޓެރަރިޒަމްގެ ތުހުމަތު ކުރެވޭ މީހުން މޮނީޓާކޮށް މޮނިކޮން އަމުރު ގާތްގަނޑަކަށް އަށެއްކަ މީހުންގެ މައްޗަށް މިހާރު ވެސް އަންނަނީ ތަންފީޒު ކުރަމުންނެވެ.
ކުރީގެ ރައީސް މުހައްމަދު ނަޝީދުގެ ހަށިކޮޅަށް ގެއްލުން ދޭން ބޮމެއް ގޮއްވާލި ހާދިސާއާ ގުޅޭ ގޮތުން ފުރަތަމަ ބޭއްވި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ ނުރައްކާތެރި ހަމަލާތައް ދެވޭނެ ގާބިލް މީހުން މުޖުތަމައުގެ ތެރޭގައި އުޅެމުންދާ ކަމަށެވެ.
ނަޝީދަށް ދިން ހަމަލާއަށް ޝައްކު ކުރެވޭ ހަތަރު މީހަކު އެބަތިބި ކަމަށް ފުލުހުން ބުންޏަސް އޭގެ ތެރޭގައި މޮނިކޮން އަމުރުގައި ތިބި ބަޔަކު ހިމެނޭތޯ ސީޕީ ކަށަވަރެއް ނުކޮށްދެ އެވެ.
"ބައެއް މީހުން ޖަލުގައި އަނެއް ބައި މީހުން މިނިވަންކޮށް. އެހެންވީމަ މިފަދަ ވެއްޓަކަށް އެ ނުރައްކާ އޮންނާނެ. ފުލުހުން ގެންދާނީ ރައްޔިތުންގެ ރައްކާތެރިކަން ކަށަވަރު ކުރުމަށް ފިޔަވަޅުތައް އަޅަމުން،" ސީޕީ ހަމީދު ވިދާޅުވި އެވެ.
މޮނިކޮން އަމުރު ހިންގަނީ ޓެރަރިޒަމްގެ ގާނޫނުގައި ބުނާ ކުށްކުރާ ކަމަށް ތުހުމަތު ކުރެވޭ މީހުންގެ މައްޗަށެވެ. މުޖުތަމައަށް އެ މީހަކު ނުރައްކަލެއް ކުރިމަތިކޮށްފާނެ ކަމަށް ހޯމް މިނިސްޓަރަށް ފެންނަ ނަމަ އެ މީހުންގެ މައްޗަށް އަމުރު ނެރެވޭނެ ކަމަށް އެ ގާނޫނުގައި ބުނެ އެވެ.
މޮނިކޮން އަމުރަށް މިނިސްޓަރު އެދެން ޖެހެނީ ހައި ކޯޓުގަ އެވެ. އެ ތަންފީޒު ކުރުމުގެ މަރުހަލާ އާއި އަމުރު މުރާޖައާ ކުރުމުގެ ބާރު ވެސް އޮންނަނީ މިނިސްޓަރަށެވެ.
މޮނިކޮން އަމުރުގެ ދަށުން ތުހުމަތު ކުރެވޭ މީހާގެ ހަށިގަނޑުގައި ޓެގް ވެސް އެޅުވެ އެވެ. އަދި އެ މީހަކު ދިރިއުޅޭ ގެއެއް ވެސް މޮނީޓާ ކުރެވެ އެވެ. އަދި އެ އަމުރު ނެރެފައިވާ މީހަކު ވަކި ހިސާބެއްގެ ތެރޭގައި އުޅުމަށް ވެސް އެންގެ އެވެ.
މީގެ ކުރިން ވެސް ނުރައްކާތެރި އެތައް ކުށްވެރިއެއްގެ މައްޗަށް މޮނިކޮން އަމުރު ނެރެފައިވެ އެވެ.
