ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ރޭ ދިން ހަމަލާއާ ގުޅޭ އެއްވެސް އިންޓެލިޖެންސް މައުލޫމާތެއް ފުލުހުންނަށް ލިބިފައިނުވާ ކަމަށާއި، އެކަމުގެ ޒިންމާ ފުލުހުން ނަގަންޖެހޭ ކަން އެނގޭނީ އެކަމުގެ ހާއްސަ ތަހުގީގަކަށް ފަހު ކަމަށް ޕޮލިސް ކޮމިޝަނަރު މުހައްމަދު ހަމީދު މިއަދު ވިދާޅުވެއްޖެ އެވެ.
ނަޝީދުގެ ގެކޮޅު ކައިރީގައި އެމަނިކުފާނަށް އަމާޒުކޮށް ދިން ހަމަލާއާ ގުޅިިގެން ފުލުހުން ބޭއްވި ފުރަތަމަ ނޫސްވެރިންގެ ބައްދަލުވުމުގައި އެފަދަ ނުރައްކާތެރި ޓެރަރިސްޓު ހަމަލާއެއްގެ މައުލޫމާތު ފުލުހުންނަށް ލިބިފައިނެތުމާ ގުޅޭގޮތުން ގިނަ ސުވާލުތަކެއް އަމާޒުވި އެވެ.
އެ ސުވާލުތަކަށް ޖަވާބު ދެއްވަމުން ހަމީދު ވިދާޅުވީ މި ހަމަލާއާ ގުޅޭ އިންޓެލްއެއް ފުލުހުންނަށް ވެސް އަދި އެހެން އެއްވެސް ފަރާތަކުން ވެސް ލިބިފައިނުވާ ކަމަށެވެ.
"އެ މައުލޫމާތު ނުލިބުނީ ކީއްވެގެންތޯ ބަލަން ޖެހޭ މީހުން ބަލާނެ. އަޅުގަނޑުމެންނަށް މިހާރު އޮތް ކަމަކީ، މި ހަމަލާއާ ގުޅިގެން އަޅަންޖެހޭ ފިޔަވަޅުތައް އަޅައި، މި ހަމަލާގައި ބައިވެރިވި މީހުން ހިފާ ހައްޔަރުކުރުން،" ސީޕީ ވިދާޅުވި އެވެ.
"އަދަދު"ގެ ނޫސްވެރިޔާ މިއަދުގެ ޕްރެސްގައި ސުވާލުކުރަނީ - ފޮޓޯ: ހުސެއިން ވަހީދު \ އަދަދު
ދައުލަތުގެ އެއް ބާރުގެ ވެރިޔާ އަށް މިފަދަ ޓެރަރިސްޓް ހަމަލާއެއް ދެވުމުގައި، ފުލުހުންގެ އިންޓެލިޖެންސް ފޭލުވި ކަމަށް ގަބޫލުކުރައްވަންތޯ އާއި އެކަމުގެ ޒިންމާ ޕޮލިސް ކޮމިޝަނަރުގެ ހައިސިއްޔަތުން ނަންގަވަންޖެހޭ ކަމަށް ގަބޫލުކުރައްވަންތޯ "އަދަދު" ނޫހުން ކުރި ސުވާލުގެ ޖަވާބުގައި ހަމީދު ތަކުރާރުކުރެއްވީ ކުރިން ދެއްވި ޖަވާބެވެ.
އިންޓެލް މައުލޫމާތު ނުލިބި އޮތުމުން އޭގައި ޒިންމާ ނަގަންޖެހޭކަން ބަލަން ޖެހޭނީ ތަހުގީގަކުން، އަޅުގަނޑުގެ އިހުމާލެއް ނުވަތަ ޒިންމާއެއް އޮތްކަން ވެސް އެނގޭނީ ތަހުގީގަކުން.
ނަޝީދު އަވަހާރަކޮށްލުމަށް ރޭ ޓެރަރިޒަމްގެ ހަމަލާ ދިން ކަމަށް ޝައްކުކުރެވޭ ހަތަރު މީހަކު ދެނެގަނެވިފައިވާ ކަމަށް އެ ބައްދަލުވުމުގައި ސީޕީ ހާމަކުރެއްވި އެވެ.
އެ ބައްދަލުވުމުގައި އެސިސްޓެންޓް ޕޮލިސް ކޮމިޝަނަރު މުހައްމަދު ރިޔާޒް ވިދާޅުވީ ޝައްކު ކުރެވޭ މީހުން ހައްޔަރު ކުރުމަށް ކުރަން ޖެހޭ މަސައްކަތްތައް ފުލުހުން ކުރަމުން ގެންދާ ކަމަށެވެ.
އެ މީހުން ހައްޔަރުކުރުން ލަސްވުމާ ގުޅޭގޮތުން ކުރި ސުވާލަކަށް ޖަވާބު ދެއްވަމުން ސީޕީ ހަމީދު ވިދާޅުވީ ހަމަލާދިން ކަމަށް ޝައްކު ކުރެވޭ އެ ހަތަރު މީހުންނާ ގުޅޭގޮތުން ޕްރޮސެކިޔުޓާ ޖެނެރަލް، ހުސައިން ޝަމީމާ މަޝްވަރާކޮށްފައިވާ ކަމަށެވެ.
"ގާނޫނުތަކުން ބާރު ލިބިފައި އޮތަސް ޖިނާއީ ނިޒާމްގެ ތެރެއިން ފުލުހުން އަމަލު ކުރަން ޖެހޭނީ. މީހަކު ހައްޔަރު ކުރެވޭނީ ހެކިތަކެއް އެމީހުންގެ މައްޗަށް ހުރެގެން،" ހަމީދު ވިދާޅުވި އެވެ.
މި ހަމަލާގެ ޒިންމާ އެއްވެސް ބަޔަކު ރަސްމީކޮށް އަދި ނަގާފައި ނުވާ ކަމަށް ފުލުހުން މިއަދު ބުންޏެވެ. އެ ހަމަލާގައި ރައީސް ނަޝީދުގެ އިތުރުން އެމަނިކުފާނުގެ ތިން ބޮޑީގާޑުންނާއި އާއްމު މީހަކާއި ބިދޭސީއަކަށް ވަނީ އަނިޔާވެފަ އެވެ.
ރައީސް ނަޝީދަށް އޭޑީކޭ ހޮސްޕިޓަލުގައި އަދިވެސް ފަރުވާދެމުންދާއިރު، އެމަނިކުފާނު ވަނީ ގިނަ ސާޖަރީތަކެއް ވެސް ހަދައިފަ އެވެ. މިހާރު އެމަނިކުފާނު އޮންނެވީ އައިސީޔޫގަ އެވެ.
