ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ހަށިކޮޅަށް ގެއްލުންދޭން ފޭކު ނަމްބަ ޕްލޭޓެއްގައި ބޭނުންކުރި ސައިކަލްގެ މައުލޫމާތު ހޯދިފައިވާ ކަމަށް ފުލުހުން މިއަދު ބުނެފި އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒް ވިދާޅުވީ ގޮއްވާލި ސައިކަލްގެ މައުލޫމާތު ހޯދިފައިވާ ކަމަށެވެ. އެކަމަކު ތަފްސީލެއް ނުދެ އެވެ.
ނަޝީދަށް ރޭ ހަމަލާދިނީ މަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށް ނީލޯފަރުމަގުގައި ހަމަލާ ދިނީ ވޭވް ސައިކަލްގައި އެއްޗެއް ގޮއްވާލައިގެންނެވެ. އެ ސައިކަލް ހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
"އަދަދު" އަށް އެނގިފައިވާ ގޮތުގައި ގޮއްވާލި ޑިވައިސް ހަރުކޮށްފައިވާ ސައިކަލްގައި ވަނީ ސައްހަ ނަމްބަރު ޕްލޭޓެއް ނޫނެވެ.
ނަޝީދަށް ހަމަލާދޭން ގޮއްވާލި ނޫ ކުލައިގެ ސައިކަލް: މި ސައިކަލްގައި ބޭނުންކޮށްފައި ވަނީ ސައްހަ ނޫން ނަމްބަ ޕްލޭޓެއް ކަމަށް ވޭ.
ނަޝީދަށް އަމާޒުކުރި ހަމަލާއާ ގުޅޭ ގޮތުން ފުރަތަމަ ފަހަރަށް ބޭއްވި ނޫސްވެރިންގެ ބައްދަލުވުމުގައި އޭސީޕީ ރިޔާޒް ވިދާޅުވީ ހަމަލާގައި ބޭނުންކުރި ސައިކަލުގެ ސައްހަ މައުލޫމާތު މިހާރު ހޯދިފައިވާ ކަމަށެވެ. ނަމަވެސް އެކަމާ ގުޅިގެން އިތުރު ތަފްސީލެއް ހާމަ ކުރެވެން ނެތް ކަމަށް އޭނާ ވިދާޅުވި އެވެ.
ޑިވައިސް ހަރުކޮށްފައި އޮތް ސައިކަލަށް ވެސް ވަނީ ބޮޑެތި ގެއްލުންތަކެއް ލިބިފަ އެވެ. ގޮއްވާލުމަށް ބޭނުންކުރި ޑިވައިސް އެ ސަރަހައްދުގައި ފެންނަން އޮތެވެ.
އިތުބާރު ހިފޭ މަސްދަރަކުން "އަދަދު"އަށް ރޭ މައުލޫމާތު ދީފައިވާ ގޮތުގައި ސައިކަލުގައި ބޭނުންކޮށްފައި ހުރި AA0F P6758 ނަންބަރު ޕްލޭޓަކީ ޓްރާންސްޕޯޓު މިނިސްޓްރީގެ ރެކޯޑުތަކުން ދައްކާ ގޮތުގައި ޕީ.ސީ.އެކްސް. ބްރޭންޑުގެ ސައިކަލެެއްގެ ނަންބަރު ޕްލޭޓެކެވެ. އެކަމަކު އެއްޗެއް ގޮއްވާލި ހާދިސާގައި މި ނަންބަރު ޕުލޭޓް ހަރުކޮށްފައި ވަނީ ވޭވް125 ސައިކަލެއްގަ އެވެ.
ނަޝީދުގެ އިތުރުން އެމަނިކުފާނުގެ ތިން ބޮޑީގާޑުންނާއި އާއްމު މީހަކާއި ބިދޭސީއަކަށް ވަނީ އަނިޔާވެފަ އެވެ. އެ އެންމެންގެ ހާލު ވެސް މިހާރު ރަނގަޅެވެ.
