ބޮމުގެ ހަމަލާގައި ހަށިކޮޅަށް ލިބިވަޑައިގަތް ގެއްލުންތަކަށް އޭޑީކޭގައި ފަރުވާ ދެމުން އަންނަ ކުރީގެ ރައީސް މުހައްމަދު ނަޝީދުގެ އެންމެ ފަހުން ފެށި ސާޖަރީ ނިމިއްޖެ ކަމަށް އާއިލާ އިން ދެންމެ ބުނެފި އެވެ.
އާއިލާ އިން ވާހަކަ ދެއްކެވި ބޭފުޅަކު "އަދަދު"އަށް ވިދާޅުވީ ނަޝީދު މިހާރު އޮންނެވީ ސީސީޔޫގަ އެވެ. އެކަމަކު އޭޑީކޭ އިން ބުނީ އެމަނިކުފާނު އޮންނެވީ އައިސީޔޫގަ އެވެ. ހާލު ސީރިއަސް ކަމަށް ވެސް ބުންޏެވެ.
ނަޝީދަށް އަމާޒުކޮށް ހަމަލާދިނީ އެމަނިކުފާނު ދިރިއުޅުއްވާ ގެކޮޅު ކައިރީގައި ސައިކަލެއް ގޮއްވާލައިގެންނެވެ. މިއީ އެމަނިކުފާނުގެ ފުރާނައަށް ނުރައްކާކުރަން ދިން ޓެރަރިސްޓު ހަމަލާއެއްގެ ގޮތުގައި ފުލުހުން ވަނީ ތަހުގީގު ފަށައިފަ އެވެ. އެ ހަމަލާއަށް ޝައްކު ކުރެވޭ ހަތަރު މީހަކު ދެނެގަނެވިފައިވާ ކަމަށް ފުލުހުން ބުންޏެވެ.
އެ ހަމަލާގައި ނަޝީދަށް ލިބިވަޑައިގަތް އަނިޔާތަކަށް ފަރުވާދޭން އޭޑީކޭއަށް ގެންގޮސް ހަތަރު ސާޖަރީއެއް ކޮށްފައިވެ އެވެ.
ނަޝީދުގެ ހާލުކޮޅާ ގުޅޭ ގޮތުން "އަދަދު"އަށް ރޭ ވާހަކަ ދެއްކެވި މައުލޫމާތު އެނގިވަޑައިގަންނަވާ ބޭފުޅަކު ވިދާޅުވެފައި ވަނީ ބޭރުފުށުން ލިބިވަޑައިގެންނެވި ޒަހަމްތައް ގިނަ ކަމަށާއި ފަރުވާ ދެމުން އަންނަނީ ހޭނައްތައިގެންނެވެ. އެމަނިކުފާނުގެ އެއް އަތަށް ފުން ޒަހަމެއް ލިބިފައިވާ ކަމަށް ވެ އެވެ.
ނަޝީދަށް ހަމަލާދިނީ އެމަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށް ނީލޯފަރުމަގުގައި، ސައިކަލްގައި އެއްޗެއް ގޮއްވާލައިގެންނެވެ. އެ ސައިކަލް ހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
ބާރު ގަދަ އެ ގޮއްވާލުމުގައި ނަޝީދު ހިމެނިވަޑައިގަންނަވާ ގޮތުން ހަ މީހަކަށް ވަނީ އަނިޔާވެފަ އެވެ. އެއީ ތިން ސިފައިންނާއި އާއްމު މީހެއްގެ އިތުރުން ބިދޭސީއަކަށެވެ.
ސީރިއަސްކޮށް މައްސަލަ ތަހުގީގު ކުރަމުން އަންނަ އިރު ރާއްޖެ އިން ބޭރުގެ އެހީ ހޯދަން ވެސް ވަނީ ނިންމައިފަ އެވެ.
